ବିଶ୍ୱ ଦେଖିବ ଲଉଡି ଖେଳର କମାଲ୍: ପ୍ରତି ଜିଲ୍ଲାରେ ଲଉଡି ମହୋତ୍ସବ ପାଇଁ ବ୍ଲୁ ପ୍ରିଣ୍ଟ୍

ଓଡ଼ିଶାର ଲଉଡି ଖେଳକୁ ମିଳିବ ସ୍ବତନ୍ତ୍ର ପରିଚୟ । ବିଲୁପ୍ତ ପ୍ରାୟ ଯାଦବ ସମ୍ପ୍ରଦାୟର ଏହି ପାରମ୍ପରିକ ଲୋକନୃତ୍ୟ ବିଶ୍ବ ଦରବାରରେ ପରିଚିତ କରାଇବାକୁ ସରକାର ପ୍ରସ୍ତୁତ କରିଛନ୍ତି ବ୍ଲୁ ପ୍ରିଣ୍ଟ।

ତୃଣମୁଳ ସ୍ତରରୁ କଳାକାରଙ୍କୁ ଚିହ୍ନଟ ପରେ ସେମାନଙ୍କୁ ଦିଆଯିବ ତାଲିମ । ଲୁକକାୟିତ ପ୍ରତିଭାକୁ ଚିହ୍ନଟ କରି ଏହି ପାରମ୍ପରିକ ଲୋକନୃତ୍ୟକୁ କିଭଳି ବିଶ୍ବ ଦରବାରରେ ପରିଚୟ ମିଳିବ ସବୁ ପଦକ୍ଷେପ ଗ୍ରହଣ କରାଯିବ ବୋଲି ରାଜ୍ୟ ସଂସ୍କୃତି ନିର୍ଦ୍ଦେଶକ ରଞ୍ଜନ କୁମାର ଦାସ କହିଛନ୍ତି । ପ୍ରଥମ କରି ଢେଙ୍କାନାଳ ଜିଲ୍ଲାରୁ ଏହାର ଅଭିଯାନ ଆରମ୍ଭ ହୋଇଛି।

ଢେଙ୍କାନାଳ ଜିଲ୍ଲା ଭୁବନ ବ୍ଲକ ଅନ୍ତର୍ଗତ ଜିରାଳ ଗାଁ ପଡିଆରେ ରାଜ୍ୟ ସଂସ୍କୃତି ବିଭାଗ ଓ ସଙ୍ଗିତ ନାଟକ ଏକାଡେମୀ ଆନୁକୂଲ୍ୟରେ ଲଉଡି ଖେଳ ମହୋତ୍ସବ ଆୟୋଜନ କରାଯାଇଛି। ଏଥିରେ ରାଜ୍ୟର ପ୍ରାୟ ୧୨ଟି ଯାଦବ ସମ୍ପ୍ରଦାୟର ଲଉଡି ଦଳ ସାମିଲ ହୋଇ ନିଜର ସାମରିକ କଳା ପ୍ରଦର୍ଶନ କରିଥିଲେ ।

ଏହି ମହୋତ୍ସବରେ ତିନି ହଜାରରୁ ଅଧିକ କଳାପ୍ରେମୀ ବ୍ୟକ୍ତି ବିଶେଷ ମଧ୍ୟ ଉପସ୍ଥିତ ରହିଥିଲେ। ଆଗକୁ ରାଜ୍ୟ ସ୍ତରୀୟ ଲଉଡିଖେଳ ମହୋତ୍ସବ ଭଳି ଆୟୋଜନ ଭଳି କାର୍ଯ୍ୟକ୍ରମ ହାତକୁ ନିଆଯିବ ବୋଲି କୁହାଯାଇଛି।

ହଜିଯିବନି ଗାଁର ପ୍ରିୟ ଗଉଡ଼ ବାଡି ଖେଳ ବା  ଲଉଡି ଖେଳ । ରାଜ୍ୟ ସଂସ୍କୃତି ବିଭାଗ ଓ ସଂଗୀତ ନାଟକ ଏକାଡେମୀ ପକ୍ଷରୁ ଏହାର ଉତ୍ଥାନ ପାଇଁ ଆରମ୍ଭ ହୋଇଛି ଉଦ୍ୟମ । ପ୍ରଥମ ବିଗୁଲ ବାଜିଛି ଢେଙ୍କାନାଳର ଜିରାଳରେ । ପ୍ରଥମ ଲଉଡି ମହୋତ୍ସବର ସଫଳତା ହିଁ ପ୍ରମାଣ କରୁଛି  ଆଧୁନିକତାର ସ୍ପର୍ଶରେ ଲୋପ ପାଇବାକୁ ବସିଥିବା ଯାଦବ ସମ୍ପ୍ରଦାୟର ଏହି ଲଉଡି ଖେଳକୁ ବ୍ରାଣ୍ଡ ମିଳିଲେ, ରାଜ୍ୟ ନାଁରେ ଯୋଡି ହେବ ନୂଆ ଗୌରବ । ରାଜ୍ୟ ସଂସ୍କୃତି ବିଭାଗ  ନିର୍ଦ୍ଦେଶକ ରଞ୍ଜନ କୁମାର ଦାଶଙ୍କ ଉଦ୍ୟମ ଏ ଦିଗରେ ପ୍ରଶଂସନୀୟ ।