Year End: ୨୦୨୨ରେ ଲିଭି ଯାଇଛି ଏହି କଳାକାରଙ୍କ ଜୀବନ ଦୀପ

୨୦୨୨ ବର୍ଷ ଆଉ କିଛି ଦିନ ପରେ ଶେଷ ହୋଇଯିବ। ଏହି ବର୍ଷ କେବଳ ସାଧାରଣ ଲୋକଙ୍କ ପାଇଁ ନୁହେଁ, ସେଲିବ୍ରିଟିମାନଙ୍କ ପାଇଁ ମଧ୍ୟ କଷ୍ଟସାଧ୍ୟ ଥିଲା। ବଲିଉଡରୁ ଟିଭି ଇଣ୍ଡଷ୍ଟ୍ରି ପର୍ଯ୍ୟନ୍ତ ଅନେକ ଲୋକପ୍ରିୟ କଳାକାର ହୃଦଘାତ ଯୋଗୁଁ ନିଜର ଲକ୍ଷ ଲକ୍ଷ ଦର୍ଶକଙ୍କୁ ଛାଡ଼ି ଚାଲିଯାଇଛନ୍ତି। ଏହି କଳାକାରଙ୍କ ମଧ୍ୟରୁ ଅଧିକାଂଶ ସେମାନଙ୍କ ଫିଟନେସକୁ ନେଇ ଗମ୍ଭୀର ଥିଲେ।

ଜଣାଶୁଣା ଟିଭି ଆକ୍ଟର ସିଦ୍ଧାନ୍ତ ବୀର ସୂର୍ଯ୍ୟବଂଶୀ ମାତ୍ର ୪୬ ବର୍ଷ ବୟସରେ ଦୁନିଆ ଛାଡ଼ି ଚାଲିଯାଇଛନ୍ତି। ସିଦ୍ଧାନ୍ତ ଜିମରେ ୱାର୍କଆଉଟ କରୁଥିବା ସମୟରେ ସେ ହୃଦଘାତରେ ଆକ୍ରାନ୍ତ ହୋଇ ହଠାତ୍ ଟଳିପଡ଼ିଥିଲେ। ୧ ଘଣ୍ଟା ଚିକିତ୍ସା ପରେ ତାଙ୍କୁ ମୃତ ଘୋଷଣା କରାଯାଇଥିଲା।

ଭେଟେରାନ ହାସ୍ୟ ଅଭିନେତା ରାଜୁ ଶ୍ରୀବାସ୍ତବ ୫୯ ବର୍ଷ ବୟସରେ ଦୁନିଆକୁ ଅଲବିଦା କହି ଚାଲିଯାଇଛନ୍ତି। ଜିମରେ ୱାର୍କଆଉଟ କରୁଥିବାବେଳେ ଅଗଷ୍ଟ ୧୦ ତାରିଖରେ ସେ ହୃଦଘାତ ଶିକାର ହୋଇଥିଲେ, ଏହା ପରେ ସେ ଲଗାତାର ୪୧ ଦିନ ଭେଣ୍ଟିଲେଟରରେ ଥିଲେ। ପରିଶେଷରେ ସେପ୍ଟେମ୍ବର ୨୧ରେ ଜୀବନ ଯୁଦ୍ଧରେ ହାରିଯାଇଥିଲେ।

ଭେଟେରାନ୍ ଫିଲ୍ମ ଅଭିନେତ୍ରୀ ତବ୍ବସୁମ ୭୮ ବର୍ଷ ବୟସ ମୃତ୍ୟୁ ବରଣ କରିଛନ୍ତି। ନଭେମ୍ବର ୧୮ ତାରିଖ ସନ୍ଧ୍ୟାରେ ତାଙ୍କର ହୃଦଘାତ ହୋଇଥିଲା। ସଙ୍ଗେ ସଙ୍ଗେ ତାଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଥିଲା କିନ୍ତୁ ସେତେବେଳକୁ ସେ ଜୀବନ ଯୁଦ୍ଧରେ ହାରି ଯାଇଥିଲେ।

କେକେ ନାମରେ ଫ୍ୟାନ୍ସଙ୍କ ମନ କିଣିଥିବା ଭେଟେରାନ୍ ସଙ୍ଗୀତ କମ୍ପୋଜର ତଥା ଗାୟକ କ୍ରୀଷ୍ଣାକୁମାର କୁନାଥ ମାତ୍ର ୫୩ ବର୍ଷ ବୟସରେ ଆରପାରିକୁ ଚାଲିଯାଇଛନ୍ତି। ମେ ୩୧ରେ କୋଲକାତାରେ ଏକ ନାଇଟ କନସର୍ଟ ସମୟରେ ସେ ହୃଦଘାତରେ ପୀଡିତ ହୋଇଥିଲେ।