CAA ବିରୋଧ ପ୍ରଦର୍ଶନ ସମୟରେ ପ୍ରେମ, ଆଉ ଏବେ ବିବାହ; ସ୍ବରା-ଫହାଦଙ୍କ ପ୍ରେମ କାହାଣୀ
Swara Marriage: ବର୍ତ୍ତମାନ ବଲିଉଡରେ ଚାଲିଛି ବିବାହ ଋତୁ। ଗୋଟିଏ ପରେ ଗୋଟିଏ ସେଲିବ୍ରିଟି ବିବାହ କରୁଥିବାର ନଜର ଆସୁଛନ୍ତି। ନିକଟରେ ଆଥିଆ ଶେଟ୍ଟୀ ଓ କ୍ରିକେଟର କେଏଲ ରାହୁଲ ବିବାହ ବନ୍ଧନରେ ଆବଦ୍ଧ ହୋଇଥିଲେ। ଆଉ ଏବେ ନିଜ ପ୍ରେମିକଙ୍କୁ ବିବାହ କରିଛନ୍ତି ନିଜ ବୟାନକୁ ନେଇ ବିବାଦ ଘେରରେ ରହୁଥିବା ବଲିଉଡ ଅଭିନେତ୍ରୀ ସ୍ବରା ଭାସ୍କର। ଆସନ୍ତୁ ଜାଣିବା ସ୍ବରାଙ୍କ ଏହି ଲଭ ଷ୍ଟୋରି ବିଷୟରେ...
ଦୁଇବର୍ଷ ତଳେ ଆନ୍ଦୋଳନ ମଞ୍ଚରେ ହୋଇଥିଲା ପ୍ରଥମ ଦେଖା ସାକ୍ଷାତ। ଆଉ ତା ପରେ ପ୍ରେମ। ଏବେ ହେଲା ବିବାହ। ଟ୍ବିଟରରେ ଫହାଦଙ୍କ ସହ ସାକ୍ଷାତ ଏବଂ ଭଲ ପାଇବା ବେଳର ଭିଡିଓ ମଣ୍ଟାଜ୍ ଛାଡ଼ି ପ୍ରଶଂସକଙ୍କୁ ବିବାହ ଖବର ଦେଇଛନ୍ତି ସ୍ବରା ଭାସ୍କର । ନାଗରିକ ସଂଶୋଧନ ଆଇନ- CAAକୁ ନେଇ ୨୦୨୦ରେ ଦେଶରେ ତୀବ୍ର ବିରୋଧ ଦେଖା ଦେଇଥିଲା। ଯାହାର ବିରୋଧ ପ୍ରଦର୍ଶନରେ ସାମିଲ ହୋଇଥିଲେ ସ୍ବରା।
ଦିଲ୍ଲୀରେ ଆନ୍ଦୋଳନର ନେତୃତ୍ବ ନେଇଥିଲେ ସୋସିଆଲ୍ ତଥା ପଲିଟିକାଲ୍ ଆକ୍ଟିଭିଷ୍ଟ ଫହାଦ ଜିରାର୍ ଅହମ୍ମଦ। CAAକୁ ବିରୋଧ କରି ସେହି ଆନ୍ଦୋଳନ ମଞ୍ଚକୁ ଯାଇଥିଲେ ଅଭିନେତ୍ରୀ ସ୍ବରା ଭାସ୍କର। ଆଉ ପହିଲି ଦେଖାରେ ସୃଷ୍ଟି ହୋଇଥିବା ଦୁର୍ବଳତା ପରେ ପ୍ରେମକୁ ରୂପାନ୍ତରିତ ହୋଇ ଏବେ ବିବାହ ବନ୍ଧନରେ ପରିଣତ ହୋଇଛି। ବିବାହ ପାଇଁ ଗତ ଜାନୁଆରି ୬ ତାରିଖରେ କୋର୍ଟରେ ଆବେଦନ କରିଥିଲେ ସ୍ବରା ଭାସ୍କର ଏବଂ ଫହାଦ୍। ପରେ ଉଭୟ ପରିବାରର ଉପସ୍ଥିତିରେ ସେମାନଙ୍କର ବିବାହ ହୋଇଛି।
ସ୍ୱତନ୍ତ୍ର ବିବାହ ଅଧିନିୟମ ଅନୁଯାୟୀ ସ୍ୱରା ଏବଂ ଫହାଦ୍ ବିବାହ କରିଛନ୍ତି। ଏହି ବିବାହ ପାଇଁ ସ୍ୱରା ନିଜ ଧର୍ମ କିମ୍ବା ଫହାଦ୍ ମଧ୍ୟ ନିଜ ଧର୍ମ ବଦଳାଇ ନାହାଁନ୍ତି। ନିକଟରେ ସ୍ୱରା ସୋସିଆଲ ମିଡ଼ିଆରେ ଏକ ଭିଡିଓ ସେୟାର କରିଛନ୍ତି ଏବଂ ସେ ଫହାଦଙ୍କୁ କିପରି ଭେଟିଛନ୍ତି ସେ ବିଷୟରେ କହିଥିଲେ। ଏହି ଭିଡିଓରେ ସେ ଦର୍ଶାଇଛନ୍ତି ଯେ CAA ବିରୋଧୀ ତଥା NRC ବିରୋଧ ସମୟରେ ସେ ଫହାଦଙ୍କୁ କିପରି ଭେଟିଥିଲେ। ଶାହିନ୍ ବାଗରେ ଉଭୟଙ୍କର ଅନେକ ମିଟିଂ ହୋଇଥିଲା।
