ପ୍ରଥମ ଓଡ଼ିଆ ମେଗାଷ୍ଟାର ଶ୍ରୀରାମ କାହିଁକି ଛାଡ଼ିଥିଲେ ଫିଲ୍ମ କ୍ୟାରିୟର; ଦମଦାର ଥିଲା ଅଭିନୟ ଯାତ୍ରା

ଓଲିଉଡ଼ ଜଗତର ସୁପରଷ୍ଟାର ଶ୍ରୀରାମ ପଣ୍ଡା କେବଳ ଜଣେ ଅଭିନେତା ନୁହଁନ୍ତି ଜଣେ ନିର୍ଦ୍ଦେଶକ ଓ ପ୍ରଯୋଜକ ରୂପେ ମଧ୍ୟ କାମ କରିଥିଲେ। ନିଜର ଅଭିନୟ ଦ୍ୱାରା ଲକ୍ଷ ଲକ୍ଷ ଲୋକଙ୍କ ହୃଦୟ ଜୟ କରିଥିବା ଶ୍ରୀରାମ ପଣ୍ଡା ୧୯୫୪ ମସିହା କୋରାପୁଟ ନବରଙ୍ଗପୁରରେ ଜନ୍ମ ଗ୍ରହଣ କରିଥିଲେ।। ତାଙ୍କର ସିନେମା କ୍ୟାରିୟର ସେ ୧୯୭୨ ମସିହା ‘ଧରିତ୍ରୀ’ ଚଳଚ୍ଚିତ୍ରରୁ ଆରମ୍ଭ କରିଥିଲେ।

ଶରତ ପୂଜାରୀ ଓ ଧଳ ବିଶ୍ଵାଳ ତାଙ୍କର ପ୍ରତିଭାରେ ମୁଗ୍ଧ ହୋଇ ତାଙ୍କୁ ସୁଯୋଗ ଦେଇଥିଲେ ଆଗକୁ ବଢ଼ିବା ପାଇଁ। ‘ଧରିତ୍ରୀ’ ଚଳଚ୍ଚିତ୍ରରେ ଅଭିନୟ ନଜାଣି ବି ଖୁବ୍ ସୁନ୍ଦର ଅଭିନୟ କରିଥିଲେ ଶ୍ରୀରାମ ପଣ୍ଡା।

ସୁନ୍ଦର ଅଭିନୟ ସହିତ ସୁନ୍ଦର ଚେହେରାରେ ଦର୍ଶକଙ୍କୁ ଅଭିନୟ ଯାଦୁ ଦେଖାଇଥିଲେ ଶ୍ରୀରାମ। ଏହାପରେ ‘ଯାଯାବର’ ଚଳଚ୍ଚିତ୍ରରେ ସେ ଅଭିନୟ କରିଥିଲେ।

ଅଭିନେତ୍ରୀ ତ୍ରିପୁରା ମିଶ୍ରଙ୍କ ସହିତ ‘ସିନ୍ଦୂର ବିନ୍ଦୁ’ ଚଳଚ୍ଚିତ୍ରରେ ଅଭିନୟ କରିଥିଲେ। ଏହି ଚଳଚ୍ଚିତ୍ର ସୁଟିଂ ସେଟରୁ ଶ୍ରୀରାମ ପଣ୍ଡା ଏବଂ ତ୍ରିପୁରା ମିଶ୍ରଙ୍କ ପ୍ରେମ ସମ୍ପର୍କ ଗଢ଼ି ଉଠିଥିଲା।

‘ସୁବର୍ଣ୍ଣ ସୀତା’ ଚଳଚ୍ଚିତ୍ରରେ ଅଭିନୟ କରିବା ସମୟରେ ଉଭୟ ଶ୍ରୀରାମ ପଣ୍ଡା ଏବଂ ତ୍ରିପୁରା ମିଶ୍ର ବିବାହ କରିଥିଲେ। ଏହାପରେ ତାଙ୍କର ଏକ ପୁତ୍ର ସନ୍ତାନ ଜନ୍ମ ଲାଭ କରିଥିଲା।

ଏହାପରେ ତାଙ୍କ ପତ୍ନୀ ଅଭିନୟ ଛାଡ଼ି ଦେଇଥିଲେ। ୬୦ ରୁ ୭୦ ଟି ଚଳଚ୍ଚିତ୍ରରେ ଅଭିନୟ କରିଥିଲେ ଶ୍ରୀରାମ ପଣ୍ଡା। ‘ଜୋର୍ ଜାର ମୁଲକ ତାର’, ‘ଚକା ଆଖି ସବୁ ଦେଖୁଛି’, ‘ଯାଯାବର’, ‘ମାନିନୀ’ ଏମିତି ଅନେକ ଚଳଚ୍ଚିତ୍ରରେ ଶ୍ରୀରାମ ପଣ୍ଡାଙ୍କ ଅଭିନୟ ଖୁବ୍ ପସନ୍ଦ କରୁଥିଲେ ଦର୍ଶକମାନେ। ‘କୁରୁକ୍ଷେତ୍ର’, ‘ଦୃତରାଜ’ ଓ ଝିଲିମିଲି ଫିଲ୍ମରେ ନିର୍ଦ୍ଦେଶନା ଦେଇଥିଲେ ଶ୍ରୀରାମ ପଣ୍ଡା।

‘କୁରୁକ୍ଷେତ୍ର’ ପରେ ସେ ଆର୍ଥିକ ଓ ମାନସିକ କ୍ଷେତ୍ରରେ ବହୁତ ଦୁର୍ବଳ ହୋଇପଡ଼ିଥିଲେ। କଷ୍ଟ ଏବଂ ସଙ୍କଟମୟ ସମୟରେ ଗତି କରୁଥିଲେ ଶ୍ରୀରାମ ପଣ୍ଡା। ୧୯୯୦ ମସିହାରେ ତାଙ୍କର ଦେଖା ହୋଇଥିଲା ସ୍ଵାମୀ ନିରଜାନନ୍ଦ ସରସ୍ୱତୀଙ୍କ ସହିତ। ତାଙ୍କ ସହ ସେ ପ୍ରଭାବିତ ହୋଇ ସନ୍ୟାସୀ ଜୀବନକୁ ବାଛି ନେଇଥିଲେ। ଯାହା ପରେ ସେ ଫିଲ୍ମ ଦୁନିଆକୁ ବାଏ ବାଏ କରିଦେଇଥିଲେ।