ବଲିଉଡ ଅଭିନେତ୍ରୀ ମଲ୍ଲିକା ଶେରାୱତ (Mallika Sherawat) ହରିୟାଣାରେ ଏକ ଜାଟ ପରିବାରରେ ଜନ୍ମ ଗ୍ରହଣ କରିଥିଲେ । ତାଙ୍କ ପ୍ରକୃତ ନାମ ହେଉଛି ରୀମା ଲାମ୍ବା (Reema Lamba) । ରୀମାଙ୍କ ପରିବାର ସେ ଚଳଚ୍ଚିତ୍ରରେ କାମ କରିବାକୁ କଡ଼ା ବିରୋଧ କରିଥିଲେ । ମଲ୍ଲିକା ଦିଲ୍ଲୀର ମିରାଣ୍ଡା କଲେଜରୁ ସ୍ନାତକ ପାସ୍ କରିବା ପରେ ତାଙ୍କ ପିତା ଚାହୁଁଥିଲେ ଯେ ସେ ଏକ ସରକାରୀ କର୍ମଚାରୀ ହୁଅନ୍ତୁ । କିନ୍ତୁ ରୀମାଙ୍କ ମନ ଚମତ୍କାର ଫିଲ୍ମ ଦୁନିଆରେ ଥିଲା । ୨୪ ଅକ୍ଟୋବର ୧୯୭୬ରେ ଜନ୍ମ ଗ୍ରହଣ କରିଥିବା ମଲ୍ଲିକା ନିଜ ଇଚ୍ଛା ପୂରଣ କରିବା ପାଇଁ ଘରୁ ବାହାରି ଆସିଥିଲେ । ଯେତେବେଳେ ସେ ମାୟାନାଗରୀ ମୁମ୍ବାଇରେ ପହଞ୍ଚିଲେ, ତାଙ୍କୁ କାମ ପାଇବା ପାଇଁ ବହୁତ ସଙ୍ଘର୍ଷ କରିବାକୁ ପଡି଼ଥିଲା । ରୀମା ଲାମ୍ବା ଯେତେବେଳେ ଶୋ’ ବିଜର ଏକ ଅଂଶ ହୋଇଗଲେ, ସେତେବେଳେ ସେ ନିଜ ନାମ ବଦଳାଇ ମଲ୍ଲିକା ଶେରାୱତ୍ ରଖିଥିଲେ । ଗଣମାଧ୍ୟମକୁ ଦେଇଥିବା ଏକ ସାକ୍ଷାତକାରରେ ସେ କହିଥିଲେ ଯେ ସେ ନିଜ ମା’ଙ୍କ ଉପନାମ ଶେରୱତ୍ ଗ୍ରହଣ କରିଛନ୍ତି। ମଲ୍ଲିକା ଶେରାୱତ ମଡେଲିଂରୁ ନିଜ କରିଅର୍ ଆରମ୍ଭ କରିଥିଲେ । ସେ ଟିଭି ବିଜ୍ଞାପନରେ ଅମିତାଭ ବଚ୍ଚନ ଓ ଶାହାରୁଖ ଖାନଙ୍କ ପରି ବଡ଼ କଳାକାରଙ୍କ ସହ କାମ କରିବାର ସୁଯୋଗ ପାଇଥିଲେ । ଚଳଚ୍ଚିତ୍ର ଜଗତରେ ନିଜକୁ ସ୍ଥାପିତ କରିବାକୁ ଚେଷ୍ଟା କରୁଥିବା ମଲ୍ଲିକା ୨୦୦୨ ମସିହାରେ ଫିଲ୍ମ ‘ଜୀନା ସିର୍ଫ୍ ମେରେ ଲିୟେ’ରେ ଏକ ଛୋଟ ଭୂମିକା ପାଇଥିଲେ । କିନ୍ତୁ ୨୦୦୩ର ଫିଲ୍ମ ‘ଖ୍ୱାଇସ୍’ରେ ମଲ୍ଲିକା ଚୁମ୍ବନ ଦୃଶ୍ୟ ଯୋଗୁଁ ଲାଇମ୍ ଲାଇଟକୁ ଆସିଥିଲେ । ମଲ୍ଲିକା ଶେରାୱତ ନିଜ ପରବର୍ତ୍ତୀ ଫିଲ୍ମ ‘ମର୍ଡ଼ର’ରେ ଏପରି ବୋଲ୍ଡ ଦୃଶ୍ୟ ଦେଇଥିଲେ ଯେ ତାଙ୍କ ନାମ ଲୋକେ ବାରମ୍ବାର ନେବା ଆରମ୍ଭ କରିଥିଲେ । ଅନୁରାଗ ବସୁଙ୍କ ଏହି ଫିଲ୍ମରେ କାମ କରିବା ପରେ ମଲ୍ଲିକାଙ୍କ ଚର୍ଚ୍ଚା ଆନ୍ତର୍ଜାତୀୟ ସ୍ତରରେ ହୋଇଥିଲା । ମଲ୍ଲିକା ଶେରୱାତଙ୍କୁ ସେହି ଫିଲ୍ମରୁ ଲାଭ ବି ମିଳିଥିଲା । ସେ ହଲିଉଡ ଚଳଚ୍ଚିତ୍ରରେ କାମ ପାଇଥିଲେ । ଯେତେବେଳେ ମଲ୍ଲିକା ଫିଲ୍ମ ‘ମିଥ୍'ରେ ଜ୍ୟାକି ଚାନଙ୍କ (Jackie Chan) ସହ କାମ କଲେ, ସେତେବେଳେ ବି ତାଙ୍କୁ ନେଇ ଜବରଦସ୍ତ ଚର୍ଚ୍ଚା ହୋଇଥିଲା ଓ ତାଙ୍କ ଖ୍ୟାତି ବଢ଼ିଥିଲା । ମଲ୍ଲିକା ଶେରାୱତ 'ହିସ୍', 'ଡବଲ୍ ଧମାଲ', 'ଡର୍ଟି ପଲିଟିକ୍ସ', 'ବଚକେ ରେହନା ରେ ବାବା', 'କିସ୍ କିସ୍ କୀ କିସ୍ମତ୍', 'ପ୍ୟାର୍ କେ ସାଇଡ୍ ଇଫେକ୍ଟସ୍' ଭଳି ଚଳଚ୍ଚିତ୍ରରେ କାମ କରିଛନ୍ତି। ମଲ୍ଲିକା ଶେରାୱତଙ୍କ ଚଳଚ୍ଚିତ୍ର ଯାତ୍ରାରେ ତାଙ୍କ ବ୍ୟକ୍ତିଗତ ଜୀବନର ଖବର ବି ଚର୍ଚ୍ଚାରେ ରହିଥିଲା । ସେ ବିବାହିତା ଓ ଏକ ସନ୍ତାନର ମା’ ହୋଇଥିବା କଥା ବି ଅନେକ ହେଡଲାଇନ ସୃଷ୍ଟି କରିଥିଲା । ଗଣମାଧ୍ୟମକୁ ଦେଇଥିବା ଅନେକ ସାକ୍ଷାତକାରରେ ମଲ୍ଲିକା କହିଛନ୍ତି ଯେ ତାଙ୍କୁ ବଡ଼ କଷ୍ଟଦାୟକ ସମୟ ଦେଇ ଗତି କରିବାକୁ ପଡି଼ଛି । ମଲ୍ଲିକା ଶେରୱତ ୱେବ୍ ସିରିଜରେ ବି ଅଭିନୟ କରିଛନ୍ତି । ମଲ୍ଲିକା ଶେରାୱତ୍ ଜଣେ ଭଲ ଅଭିନେତ୍ରୀ ହୋଇଥିଲେ ବି ଆଜି ତାଙ୍କ ଅଭିନୟ ଅପେକ୍ଷା ତାଙ୍କ ବୋଲ୍ଡ ସିନ୍ ବିଷୟରେ ଅଧିକ ଚର୍ଚ୍ଚା ହୁଏ । (ସବୁ ଫଟୋ କ୍ରେଡିଟ୍: ମଲ୍ଲିକାଶେରାୱତ / ଇନଷ୍ଟାଗ୍ରାମ୍)
