ଖାଲି ଶିଳ୍ପା ଶେଟ୍ଟି ନୁହେଁ, ଏହି ବଲିଉଡ୍ ଅଭିନେତ୍ରୀମାନେ ବି ନିଜ ପତିଙ୍କ ପାଇଁ ସମାଲୋଚିତ ହୋଇଥିଲେ

ଯେବେଠୁ ଅଶ୍ଳୀଳ ଫିଲ୍ମ ତିଆରି ମାମଲାରେ ରାଜ କୁନ୍ଦ୍ରାଙ୍କ (Raj Kundra) ନାମ ପଦାକୁ ଆସିଲାଣି ସେବେଠୁ ଶିଳ୍ପା ଶେଟ୍ଟୀଙ୍କୁ (Shilpa Shetty) ଅନେକ ଅସୁବିଧାର ସମ୍ମୁଖୀନ ହେବାକୁ ପଡୁଛି । ଲୋକେ ତାଙ୍କୁ ସୋସିଆଲ ମିଡି଼ଆରେ ବହୁତ ଟ୍ରୋଲ୍‌ କରୁଛନ୍ତି । ହେଲେ ଫିଲ୍ମ ଇଣ୍ଡଷ୍ଟ୍ରିରେ ଏହା ପ୍ରଥମ ଘଟଣା ନୁହେଁ ଯେତେବେଳେ ସ୍ୱାମୀଙ୍କ କାର୍ଯ୍ୟକଳାପ ଯୋଗୁଁ ଜଣେ ସେଲିବ୍ରିଟିଙ୍କୁ ଟ୍ରୋଲ୍‌ ହେବାକୁ ପଡି଼ଛି । ଶିଳ୍ପାଙ୍କ ପୂର୍ବରୁ କେତେକ ତାରକା ନିଜ ସ୍ୱାମୀଙ୍କ କାରଣରୁ ସମସ୍ୟାର ସମ୍ମୁଖୀନ ହୋଇଥିଲେ । 

ଅଶ୍ଳୀଳତା ମାମଲାରେ ମୁମ୍ବାଇ ପୋଲିସ ରାଜ କୁନ୍ଦ୍ରାଙ୍କୁ ଗିରଫ କରିଛି । ରାଜ କୁନ୍ଦ୍ରା ପୋଲିସ ହେପାଜତକୁ ଯିବା ପରଠାରୁ ଶିଳ୍ପା ଶେଟ୍ଟୀଙ୍କୁ ଲୋକେ ଅନେକ କଥା କହୁଛନ୍ତି । ନେଟିଜେନମାନେ କହୁଛନ୍ତି ଯେ ରାଜଙ୍କର ଏହି କାର୍ଯ୍ୟ ବିଷୟରେ ଶିଳ୍ପା ପୂର୍ବରୁ ଜାଣିଥିଲେ । ସେ ଟଙ୍କା ଦେଖିବା ପରେ ରାଜଙ୍କୁ ବିବାହ କରିଥିଲେ । ଏହି କଥାଗୁଡ଼ିକରୁ ଆଘାତ ପାଇ ଶିଳ୍ପା ଟିଭି ସୋ 'ସୁପର ଡାନ୍ସର୍'ର ସୁଟିଂରୁ ନିଜକୁ ଦୂରେଇ ରଖିଥିଲେ । 

କିଛି ଦିନ ପୂର୍ବରୁ ନିଶା ରାୱଲ୍‌ (Nisha Rawal) ନିଜ ସ୍ୱାମୀ ତଥା ଅଭିନେତା କରଣ ମେହେରାଙ୍କ ଉପରେ ଘରୋଇ ହିଂସା ଅଭିଯୋଗ ଆଣିଥିଲେ । ସେତେବେଳେ ଗଣମାଧ୍ୟମରେ ଏହି ପ୍ରସଙ୍ଗ ବହୁତ ଚର୍ଚ୍ଚାରେ ରହିଥିଲା । ନିଶା ଏହା ବି କହିଥିଲେ ଯେ କରଣଙ୍କର ଏକ ବିବାହ ବାହାରର ସମ୍ପର୍କ ରହିଛି । ହେଲେ କରଣ ଏହି ସବୁ ଅଭିଯୋଗକୁ ଅସ୍ୱୀକାର କରିଥିଲେ ।

ଯେତେବେଳେ ହ୍ରିତିକ ରୋଶନଙ୍କ (Hritik Roshan) ନାମ ତାଙ୍କ ସହ-ଅଭିନେତ୍ରୀ ବାର୍ବାରା ଓ କଙ୍ଗନା ରାନାୱତଙ୍କ ସହ ଯୋଡ଼ା ଯାଇଥିଲା ସେତେବେଳେ ତାଙ୍କ ପତ୍ନୀ ସୁଜେନଙ୍କୁ (Sussanne Khan) ଅନେକ କଥା ଶୁଣିବାକୁ ପଡି଼ଥିଲା। ସେତେବେଳେ ସୁଜେନ୍‌ ଖାନ ଓ ହ୍ରିତିକଙ୍କ ସମ୍ପର୍କକୁ ନେଇ ବହୁତ ଆଲୋଚନା କରାଯାଇଥିଲା । ଏହି ସବୁ କଥା ଦ୍ୱାରା ସୁଜନ ବହୁତ ଆଘାତ ପାଇଥିଲେ । ଶେଷରେ ସେ ହ୍ରିତିକଙ୍କଠାରୁ ଅଲଗା ହୋଇଯାଇଥିଲେ ।

ଅଭିନେତ୍ରୀ ଜରିନା ୱାହାବଙ୍କ (Zarina Wahab) ସ୍ୱାମୀ ଆଦିତ୍ୟ ପାଞ୍ଚୋଲିଙ୍କର (Aditya Pancholi) ବିବାଦ ସହ ଦୀର୍ଘ ଦିନ ଧରି ସମ୍ପର୍କ ରହିଆସିଛି । ଚଳଚ୍ଚିତ୍ର ଅପେକ୍ଷା ସେ ନିଜ କାର୍ଯ୍ୟକଳାପ କାରଣରୁ ଚର୍ଚ୍ଚାରେ ରହନ୍ତି । ଗଣମାଧ୍ୟମ ରିପୋର୍ଟ ଅନୁଯାୟୀ ତାଙ୍କ ବିରୁଦ୍ଧରେ ଦୁଇ ଥର ବଳାତ୍କାର ମାମଲା ରୁଜୁ କରାଯାଇଥିଲା । ଏହି ବିବାଦ ଯୋଗୁଁ ଜରିନାଙ୍କୁ ମଧ୍ୟ ବହୁତ କଥା ଶୁଣିବାକୁ ଓ କଷ୍ଟ ସହିବାକୁ ପଡ଼ିଥିଲା ।

ଦିବ୍ୟା କୁମାର ଖୋସଲାଙ୍କୁ (Divya Kumar khosla) ନିଜ ସ୍ୱାମୀ ତଥା ଟି-ସିରିଜ୍ କମ୍ପାନୀର ମାଲିକ ଭୂଷଣ କୁମାରଙ୍କ କାରଣରୁ ବହୁ ସମସ୍ୟାର ସମ୍ମୁଖୀନ ହେବାକୁ ପଡି଼ଥିଲା । ପ୍ରକୃତରେ ଜଣେ ମଡେଲ୍‌ ଭୂଷଣ କୁମାରଙ୍କ ଉପରେ ତାଙ୍କୁ ବଳାତ୍କାର କରିଥିବା ଅଭିଯୋଗ କରିଥିଲେ । ତା’ପରେ ଏହି ବିଷୟ ଅନେକ ଦିନ ଧରି ଚର୍ଚ୍ଚାରେ ରହିଥିଲା । ଏହି ଅଭିଯୋଗକୁ ଭୂଷଣ ତୀବ୍ର ଭାବେ ଅସ୍ୱୀକାର କରିଥିଲେ ।