‘‘ଜଣେ ପ୍ରଡ୍ୟୁସର୍ ମୋତେ ହିରୋଙ୍କ ସହ ଶୋଇବାକୁ କହିଥିଲେ… ସବୁ ଇଣ୍ଡଷ୍ଟ୍ରୀରେ ଏମିତି ହୁଏ…’’

ବଲିଉଡ୍ ଅଭିନେତ୍ରୀ କିଶ୍ୱର୍ ମର୍ଚ୍ଚାଣ୍ଟ (Kishwer Merchant)

ଅଭିନେତ୍ରୀ କିଶ୍ୱର୍ ମର୍ଚ୍ଚାଣ୍ଟ କାଷ୍ଟିଂ କାଉଚର ଏକ ଅପ୍ରୀତିକର ଅନୁଭୂତି ବିଷୟରେ ସର୍ବସାଧାରଣରେ କହିଛନ୍ତି । ସେଇଥି ପାଇଁ ତାଙ୍କୁ ଏକ ଫିଲ୍ମରୁ ବାହାରିଯିବାକୁ ହୋଇଥିଲା । ଏହି ଫିଲ୍ମରେ ସେ ଫିଲ୍ମ ଇଣ୍ଡଷ୍ଟ୍ରିର ଜଣେ ବଡ଼ ତାରକା ଓ ବଡ଼ ନିର୍ମାତାଙ୍କ ସହିତ କାମ କରିବାର ସୁଯୋଗ ପାଇଥିଲେ ।

କାଷ୍ଟିଂ କାଉଚ୍ ବିଷୟରେ ଚମକପ୍ରଦ ଖୁଲାସା କରି କିଶ୍ୱର କହିଛନ୍ତି ଯେ ତାଙ୍କୁ ସେହି ଫିଲ୍ମର 'ହିରୋଙ୍କ ସହ ଶୋଇବାକୁ' କୁହାଯାଇଥିଲା । ସେ ଆହୁରି ମଧ୍ୟ କହିଛନ୍ତି ଯେ ସେ ହିରୋ ଓ ନିର୍ମାତା ଚଳଚ୍ଚିତ୍ର ଇଣ୍ଡଷ୍ଟ୍ରିର ଦୁଇ ଜଣ ‘ବଡ଼ ନାମ’ ।

କିଶ୍ୱର ମର୍ଚ୍ଚାଣ୍ଟ୍‌ ‘ହମ୍ ତୁମ୍’ ଓ ‘ଭେଜା ଫ୍ରାଇ ୨’ ଫିଲ୍ମରେ କାମ କରିଛନ୍ତି । ସେ କେବେ କାଷ୍ଟିଂ କାଉଚର ସାମ୍ନା କରିଛନ୍ତି କି ବୋଲି ପଚରାଯିବାରୁ ସେ କହିଥିଲେ, ‘‘ହଁ, ମୁଁ ଏହାକୁ ଥରେ ଅନୁଭବ କରିଛି। ଏହି ଫିଲ୍ମ ପାଇଁ ମୁଁ ଏକ ବୈଠକରେ ଭାଗନେବାକୁ ଯାଇଥିଲି, ଆଉ ସେତିକି ବେଳେ ଏହା ଘଟିଥିଲା । ମୋ’ ମା’ ମଧ୍ୟ ସେତେବେଳେ ମୋ ସହିତ ଥିଲେ ।’’

‘‘ମୁଁ ସେହି ଫିଲ୍ମରେ କାମ କରିବାକୁ ମନା କରି ସେଠାରୁ ଚାଲିଆସିଥିଲି । ମୁଁ କହିବି ନାହିଁ ଯେ ଏମିତି କାଷ୍ଟିଂ କାଉଚ୍‌ ଘଟଣା ବହୁତ ଘଟେ ବା ଏହା ସ୍ୱାଭାବିକ । ବଲିଉଡ୍‌ ଇଣ୍ଡଷ୍ଟ୍ରୀ କୁଖ୍ୟାତ, କିନ୍ତୁ ଏମିତି ଘଟଣା ପ୍ରତ୍ୟେକ ଇଣ୍ଡଷ୍ଟ୍ରୀରେ ଘଟେ,’’ ସେ କହିଛନ୍ତି । ସେହି ଅଭିନେତା ଓ ନିର୍ମାତାଙ୍କ ନାମ ସେ କହି ନାହାଁନ୍ତି, କିନ୍ତୁ କହିଛନ୍ତି ଯେ ସେ ଦୁହେଁ ଫିଲ୍ମ ଇଣ୍ଡଷ୍ଟ୍ରିରେ ଦୁଇ ବଡ଼ ନାମ ।

ହେଲେ କାଷ୍ଟିଂ କାଉଚର ସେହି ଅପ୍ରୀତିକର ଅନୁଭୂତି କିଶ୍ୱର ମର୍ଚ୍ଚାଣ୍ଟଙ୍କୁ ଫିଲ୍ମ ଦୁନିଆରୁ ଦୂରେଇ ନେଇଛି କି? ଏହାର ଉତ୍ତରରେ ଅଭିନେତ୍ରୀ କହିଛନ୍ତି, ‘‘ନା, ମୁଁ ମୋ’ କାମ ଉପରେ ବହୁତ ଧ୍ୟାନ ଦେଉଥିଲି । ମୁଁ ଟିଭି ପ୍ରତି ଅଧିକ ଆଗ୍ରହୀ ଥିଲି । ମୁଁ କ୍ୱାଲିଟି ଓ କ୍ୱାଣ୍ଟିଟିର କାମ ପାଇବାକୁ ଲାଗିଲି । ମୋ’ କରିୟରର ରୂପରେଖ ନେଇ ମୁଁ ବହୁତ ଖୁସି ।’’

ଏବେ କିଶ୍ୱର ଗର୍ଭବତୀ ଅଛନ୍ତି । ସେଥି ପାଇଁ ତାଙ୍କ ସ୍ୱାମୀ ସୁୟଶ ରାୟ ବହୁତ ଖୁସି ଖୁସି ବୋଲି ସେ କହିଛନ୍ତି । କିଶ୍ୱରଙ୍କ ମା’ ପିଲା ପାଇଁ ତାଙ୍କ ପଛରେ ପଡ଼ିଥିଲେ । ଅଭିନେତ୍ରୀ କହିଛନ୍ତି, ‘‘ମା’ ଚାହୁଁଥିଲେ ମୋ’ର ଏକ ସନ୍ତାନ ଜନ୍ମ ହେଉ । ଗର୍ଭଧାରଣର ସପ୍ତାହେ ପୂର୍ବରୁ ସେ ମୋତେ ମୋ’ ଏଗ୍‌ସ (ଅଣ୍ଡା) ଫ୍ରିଜ୍ କରିବାକୁ ବି କହିଥିଲେ ।’’

ଶିଶୁ ଜନ୍ମ ହେବା ପରେ ସେ ସୁଟିଂ ସେଟକୁ ଫେରିବେ ବୋଲି କହିଛନ୍ତି କିଶ୍ୱର ମର୍ଚ୍ଚାଣ୍ଟ୍‌ । ‘’୪୦ ବର୍ଷ ବୟସରେ ଗର୍ଭବତୀ ହୋଇ ବି ମୁଁ ଖୁସି ଅଛି । ସେଟକୁ ଫେରିବା ପାଇଁ ମୁଁ ବର୍ଷେ ସମୟ ନେବି । ଘରେ ମୋ’ର ଭଲ ବ୍ୟବସ୍ଥା ଅଛି । ଯଦି ମୋତେ ଭଲ ଭୂମିକା ମିଳେ ତାହେଲେ ମୁଁ ସେଟକୁ ଶୀଘ୍ର ଫେରିଆସିବି । ଦେଖାଯାଉ କ’ଣ ହେଉଛି ।’’

କିଶ୍ୱର କହିଛନ୍ତି, ‘‘ମୁଁ ଯେତେବେଳେ ଗର୍ଭବତୀ ହେଲି, ଆମେ ଆଶ୍ଚର୍ଯ୍ୟ ହୋଇଗଲୁ କାରଣ ଆମେ ପିଲା ବିଷୟରେ ଯୋଜନା କରି ନ ଥିଲୁ । ବାସ୍ତବରେ, ମୁଁ କିଛି ଦିନ ପାଇଁ ଦୁର୍ବଳ ଅନୁଭବ କରୁଥିଲି । ମୁଁ ମୋ’ ସ୍ୱାମୀ ସୁୟଶ ରାୟଙ୍କୁ କହିଲି ଯେ ମୁଁ ଭାବୁଛି କିଛି ଅଡୁଆ ଅଛି, ଆଉ ଆମେ ବୋଧହୁଏ ଗର୍ଭଧାରଣ ପରୀକ୍ଷା କରିବା ଉଚିତ୍ । ସେ ମୋ’ ଆଡକୁ ଚାହିଁ କହିଲେ, ‘ତୁମେ ନିଶ୍ଚିତ କି?’ ମୁଁ କହିଲି, ‘ହଁ, ଚାଲ ପରୀକ୍ଷା କରାଇବା’ । ଟେଷ୍ଟ୍‌ ପଜିଟିଭ୍ ଆସିବା ପରେ ଆମେ ଉଭୟ ଏତେ ଖୁସି ହେଲୁ ଓ ରାତାରାତି ପ୍ରସ୍ତୁତି ଆରମ୍ଭ କରିଦେଲୁ ଯେ ଲାଗିଲା ସତେ ଯେମିତି ଆମେ ପିତାମାତା ହେବାକୁ ଚାହୁଁଥିଲୁ । (ସବୁ ଫଟୋ ସୌଜନ୍ୟ: @ kishwersmerchantt / Instagram)