ଟିଭିରୁ ଅଭିନୟ କ୍ୟାରିୟର ଆରମ୍ଭ କରିଥିଲେ ପିଣ୍ଟୁ ନନ୍ଦ; ଏହି ଫିଲ୍ମ ପାଇଁ ପାଇଥିଲେ ଶ୍ରେଷ୍ଠ ପୁରସ୍କାର

ମାସେ ଧରି ଦିଲ୍ଲୀ ଓ ପରେ ହାଇଦ୍ରାବାଦରେ ଚିକିତ୍ସିତ ହୋଇଥିଲେ ଅଭିନେତା। ହେଲେ ଶେଷର ଜୀବନ ଯୁଦ୍ଧ ହାରିଯାଇଛନ୍ତି ପିଣ୍ଟୁ। ମାତ୍ର ୪୫ ବର୍ଷ ବୟସରେ ସେ ସମସ୍ତଙ୍କୁ ଅଲବିଦା କହି ଚାଲିଯାଇଛନ୍ତି।

ସେହିପରି ତାଙ୍କର ଲିଭର ଟ୍ରାନ୍ସପ୍ଲାଣ୍ଟ ହେବ ବୋଲି ଡାକ୍ତର କହିଥିଲେ। ହେଲେ ଏହା ପୂର୍ବରୁ ସେ ଶେଷ ନିଶ୍ବାସ ତ୍ୟାଗ କରିଛନ୍ତି।

ଓଡ଼ିଆ ଇଣ୍ଡଷ୍ଟ୍ରିର ଲୋକପ୍ରିୟ ଅଭିନେତା ପିଣ୍ଟୁ ନନ୍ଦ ୧୯୭୭ ମସିହା ଜୁଲାଇ ୭ରେ ଜଗତସିଂହପୁରରେ ଜନ୍ମ ଗ୍ରହଣ କରିଥିଲେ। ତାଙ୍କ ପିତା ଅଶୋକ କୁମାର ନନ୍ଦ ଓ ମାତା କାନ୍ତିଲତା ନନ୍ଦ। ସେମାନେ ଦୁଇ ଭାଇ ଓ ଗୋଟିଏ ଭଉଣୀ। ତାଙ୍କ ବଡ଼ ଭାଇ ଅଭିରାମ ନନ୍ଦ ଜଣେ ବଂଶୀବାଦକ। ପିଣ୍ଟୁ ଜଗତସିଂହପୁରର ଏସ୍. କେ ଏକାଡେମିରୁ ବିଦ୍ୟାଳୟ ଶିକ୍ଷା ଶେଷ କରିବା ପରେ ଦିଲ୍ଲୀରେ ଉଚ୍ଚଶିକ୍ଷା ଗ୍ରହଣ କରିଥିଲେ। ପିଣ୍ଟୁଙ୍କର ଦୁଇ ପୁଅ ମଧ୍ୟ ଅଛନ୍ତି।

ଟେଲିଭିଜନରୁ ସେ ତାଙ୍କ ଅଭିନୟ କ୍ୟାରିୟର ଆରମ୍ଭ କରିଥିଲେ। ଅନେକ ବର୍ଷ ସେ ଓଡ଼ିଆ ସିନେମା ଜଗତରେ ଆକ୍ଟିଭ ରହିଥିଲେ। ଫିଲ୍ମରେ ଦର୍ଶକ କେତେବେଳେ ତାଙ୍କୁ ଖଳନାୟକ, ତ ଆଉ କେତେବେଳେ ସହନାୟକ ତ ପୁଣି କେତେବେଳେ କମେଡିଆନ ଭୂମିକାରେ ଦମଦାର ଅଭିନୟ କରୁଥିବାର ଦେଖିବାକୁ ପାଇଥିଲେ।

ସେହିପରି ତାଙ୍କ ଆଲବମ ‘ଏ ଗଉରା’ ତାଙ୍କୁ ଲୋକପ୍ରିୟ କରାଇଥିଲା। ମାତ୍ର ୧୭ ବର୍ଷ ବୟସରୁ ସେ ଛୋଟ ଛୋଟ ଭୂମିକାରେ ଅଭିନୟ କରିଥିଲେ। ଆଉ ୧୮ ବର୍ଷ ବୟସରେ ସେ ୧୯୯୬ରେ ‘କୋଇଲି’ ଫିଲ୍ମରେ ଜଣେ ନଣ୍ଡା ଭୂମିକାରେ ଅଭିନୟ କ୍ୟାରିୟର ଆରମ୍ଭ କରିଥିଲେ।

ତାଙ୍କର ଲୋକପ୍ରିୟ ଫିଲ୍ମ ହେଲା ୨୦୨୨ରେ ଆସିଥିବା ‘ରଙ୍ଗ ନମ୍ବର’, ୨୦୦୬ରେ ଆସିଥିବା ‘ପ୍ରେମ ଋତୁ ଆସିଲାରେ’, ୨୦୧୧ରେ ଆସିଥିବା ‘ଦୋସ୍ତି’, ୨୦୧୧ ହାତ ଧରି ଚାଲୁଥା’ ଓ ୨୦୧୩ରେ ଆସିଥିବା ରୁମ୍‌କୁ ଝୁମା।

‘ରଙ୍ଗ୍ ନମ୍ବର’ ଫିଲ୍ମ ପାଇଁ ଶ୍ରେଷ୍ଠ ହାସ୍ୟ ଅଭିନେତା ପୁରସ୍କାର ପାଇଥିଲେ ପିଣ୍ଟୁ ନନ୍ଦ।