ଓଲିଉଡ ଅଭିନେତା ତଥା କେନ୍ଦ୍ରାପଡ଼ା ସାଂସଦ ଅନୁଭବ ମହାନ୍ତି (Anubhav Mohanty) କିଛି ଦ୍ନ ତଳେ ଜାଗୃତି ଶୁକ୍ଳା ନାମ୍ନୀ ନିଜ ବାନ୍ଧବୀଙ୍କ ସହ ଦୁଇଟି ଫଟୋ ଶେୟାର୍ କରିଥିଲେ । ବିବାହ ବିଚ୍ଛେଦ ମାମଲାରେ ଛନ୍ଦି ରହିଥିବା ଅନୁଭବ ମହାନ୍ତି ଓ ଜାଗୃତି ଶୁକ୍ଳାଙ୍କୁ (Jagruti Shukla) ସାଙ୍ଗରେ ଭୋଜନ କରୁଥିବା ଦେଖିବାକୁ ମିଳିଥିଲା । ଫଟୋ ଦୁଇଟି ପୋଷ୍ଟ କରି ଅନୁଭବ ଲେଖିଥିଲେ, “ତୁମ ପରି ଜଣେ ଆତ୍ମନିର୍ଭରଶୀଳ ଓ ସଶକ୍ତ ମହିଳାଙ୍କୁ ଭେଟିବା ସବୁ ବେଳେ ଏକ ସୁନ୍ଦର ଅନୁଭବ, ମୋ’ ପ୍ରିୟ ବାନ୍ଧବୀ । ଦୀର୍ଘ ବାଟ ଯିବାକୁ ଅଛି ।” ସେହି ଫଟୋ ଶେୟାର୍ କରିବାର ତିନି ଦିନ ତଳେ ଅନୁଭବ ମହାନ୍ତି ନିଜର ଏହି ଫଟୋ ଶେୟାର୍ କରି ଲେଖିଥିଲେ, ‘‘ଆପଣ ସଚ୍ଚୋଟ ଥିଲେ ଏକା ଏକା ସବୁ ତକ ଯନ୍ତ୍ରଣା ମୌନ ଭାବେ ନିଜେ ନେବା ସହଜ ନୁହେଁ, କିନ୍ତୁ ଆପଣ ମୁହଁ ଖୋଲିଲେ ଲୋକେ ଆପଣଙ୍କୁ ଖୁବ୍ ଖରାପ ବୋଲି ଭାବନ୍ତି!!!’’ ଜାଗୃତି ଶୁକ୍ଳାଙ୍କ (Jagruti Shukla) ସହ ଅନୁଭବ ମହାନ୍ତିଙ୍କ ଫଟୋ ଯୋଡ଼ିକ ସୋସିଆଲ୍ ମିଡ଼ିଆରେ ଭାଇରାଲ୍ ହେବାରେ ଲାଗିଥିଲା ଓ ଦୁହିଁଙ୍କ ମଧ୍ୟରେ ସମ୍ପର୍କକୁ ନେଇ ଚର୍ଚ୍ଚା ଆରମ୍ଭ ହୋଇଯାଇଥିଲା । ଜାଗୃତି ଶୁକ୍ଳା ପେଶାରେ ଜଣେ ଟେଲିଭିଜନ୍ ସାମ୍ବାଦିକା । ସେ ମଧ୍ୟ ଜଣେ କବି । ସେ ଦିଲ୍ଲୀରେ ରହନ୍ତି । ଡିସେମ୍ବର ୧୩, ୨୦୨୦ରେ ଜାଗୃତି ଶୁକ୍ଳା ନିଜକୁ ଅନୁଭବ ମହାନ୍ତିଙ୍କର ଜଣେ ‘‘ଭଲ ବନ୍ଧୁ’’ ଭାବରେ ପରିଚୟ ଦେଇ ଏକ ଫେସବୁକ୍ ପୋଷ୍ଟ ଲେଖିଥିଲେ । ସେହି ଫେସବୁକ୍ ପୋଷ୍ଟରେ ଜାଗୃତି କହିଥିଲେ ଯେ ଜଣେ ସାମ୍ବାଦିକା ଭାବେ ତାଙ୍କୁ ସାଂସଦମାନଙ୍କ ସହ କଥାବାର୍ତ୍ତା କରିବାକୁ ହୁଏ ଓ ଅନୁଭବଙ୍କ ସହ ତାଙ୍କର ଏକ ‘‘ସୁସ୍ଥ, ପେଶାଗତ ସମ୍ପର୍କ’’’ ଅଛି । ହେଲେ ଜାଗୃତି ସେହି ଫେସବୁକ୍ ପୋଷ୍ଟରେ ଅନୁଭବ ମହାନ୍ତିଙ୍କ ସହ ତାଙ୍କ ସମ୍ପର୍କକୁ ନେଇ ଚାଲିଥିବା ଚର୍ଚ୍ଚା ଉପରେ ବି ଲେଖିଥିଲେ ଓ କହିଥିଲେ ଯେ ଲୋକେ ଅକାରଣରେ ଏହି ସମ୍ପର୍କୁ ନେଇ ‘‘ଅସ୍ୱାସ୍ଥ୍ୟକର, ଅପମାନଜନକ ଓ ସମ୍ପୂର୍ଣ୍ଣ ଅଗ୍ରହଣୀୟ’’ ମନ୍ତବ୍ୟ ଦେଉଛନ୍ତି । ଜାଗୃତି ଆହୁରି ଲେଖିଥିଲେ ଯେ ଏମିତି ମନ୍ତବ୍ୟ ଦେଉଥିବା ଲୋକେ ହେଉଛନ୍ତି ଅନୁଭବଙ୍କ ପତ୍ନୀ ତଥା ଓଲିଉଡ ଅଭିନେତ୍ରୀ ବର୍ଷା ପ୍ରିୟଦର୍ଶିନୀଙ୍କ (Varsha Priyadarshini) ଫ୍ୟାନ୍ । ଜାଗୃତି ଶୁକ୍ଳାଙ୍କ କବିତା ସଂକଳନ ‘ରୁହ୍‘ (ଆତ୍ମା) ଗତ ବର୍ଷ ପ୍ରକାଶିତ ହୋଇଥିଲା । ଅଭିନେତ୍ରୀ ବର୍ଷା ପ୍ରିୟଦର୍ଶିନୀ (Varsha Priyadarshini) ଓ ତାଙ୍କ ସ୍ୱାମୀ ଅନୁଭବ ମହାନ୍ତିଙ୍କ ମଧ୍ୟରେ ବର୍ଷାଧିକ କାଳ ଧରି ପାରିବାରିକ ବିବାଦ କୋର୍ଟରେ ଲାଗି ରହିଛି । ଅନୁଭବ ମହାନ୍ତି ଦାୟର କରିଥିବା ଛାଡପତ୍ର ଆବେଦନକୁ ବିନା ଶୁଣାଣିରେ ଖାରଜ କରିଦେବାକୁ ବର୍ଷା ପ୍ରିୟଦର୍ଶିନୀ କରିଥିବା ଆବେଦନକୁ କୋର୍ଟ ଅଗଷ୍ଟ ୨୦୨୧ରେ ଖାରଜ କରିଦେଇଥିଲେ । ଅନୁଭବ ମହାନ୍ତି ଓ ବର୍ଷା ପ୍ରିୟଦର୍ଶିନୀ ଓଡ଼ିଆ ଫିଲ୍ମ ଜଗତର ଲୋକପ୍ରିୟ ଯୋଡ଼ିମାନଙ୍କ ମଧ୍ୟରୁ ଅନ୍ୟତମ । ସିନେମା ପରଦାରେ ଖୁବ୍ ସଫଳତା ପାଇବା ପରେ ଅନୁଭବ ମହାନ୍ତି ଓ ବର୍ଷା ପ୍ରିୟଦର୍ଶିନୀ ପରସ୍ପରକୁ ବିବାହ କରିଥିଲେ । ୨୦୧୯ ଲୋକସଭା ନିର୍ବାଚନରେ କେନ୍ଦ୍ରାପଡ଼ାରୁ ବିଜେପି ସାଂସଦ ଥିବା ବୈଜୟନ୍ତ ପଣ୍ଡାଙ୍କୁ ହରାଇ ବିଜେଡି ଟିକେଟରେ ଲଢ଼ିଥିବା ଅନୁଭବ ମହାନ୍ତି ସେହି ଆସନ ଜିତିଥିଲେ । (ସବୁ ଫଟୋ ସୌଜନ୍ୟ: ଇନଷ୍ଟାଗ୍ରାମ୍, ଫେସବୁକ୍, ଟ୍ୱିଟର୍ ଓ ନ୍ୟୁଜ୍୧୮)
