ମୋଦି-ମମତା କଳି: ବେଙ୍ଗଲରେ ଟିକା ସାର୍ଟିଫିକେଟରୁ ମୋଦିଙ୍କ ଫଟୋ ହଟାଇ ନିଜ ଫଟୋ ଛାପିଲେ ମମତା

ପ୍ରଧାନ ମନ୍ତ୍ରୀ ନରେନ୍ଦ୍ର ମୋଦି ଓ ପଶ୍ଚିମ ବଙ୍ଗର ମୁଖ୍ୟ ମନ୍ତ୍ରୀ ମମତା ବାନାର୍ଜୀଙ୍କ ମଧ୍ୟରେ କଳହ ଆହୁରି ବଢ଼ିଚାଲିଛି ।

ଦେଶ ସାରା କରୋନା ଟିକା ନେବା ପରେ ଲୋକଙ୍କୁ ମିଳୁଥିବା ପ୍ରମାଣପତ୍ରରେ ପ୍ରଧାନ ମନ୍ତ୍ରୀ ନରେନ୍ଦ୍ର ମୋଦିଙ୍କ (Prime Minister Narendra Modi) ଫଟୋ ରହୁଥିଲା । ହେଲେ ଏବେ ପଶ୍ଚିମ ବଙ୍ଗରେ (West Bengal) ତାହା ହେବନି ।

ମୁଖ୍ୟ ମନ୍ତ୍ରୀ ମମତା ବାନାର୍ଜୀଙ୍କ (Mamata Banerjee) ସରକାର ନିଷ୍ପତ୍ତି ନେଇଛି ଯେ ରାଜ୍ୟରେ ଟିକାକରଣର ତୃତୀୟ ପର୍ଯ୍ୟାୟରେ ୧୮ରୁ ୪୪ ବର୍ଷ ବୟସ୍କ ଲୋକଙ୍କୁ ଟିକାକରଣ ପରେ ମମତାଙ୍କ ଫଟୋ ଥିବା ପ୍ରମାଣପତ୍ର ଦିଆଯିବ ।

ମମତାଙ୍କ ଦଳ ତୃଣମୂଳ କଂଗ୍ରେସ (Trinamool Congress) କିଛି ମାସ ପୂର୍ବରୁ ଟିକାକରଣ ପ୍ରମାଣପତ୍ରରେ ମୋଦିଙ୍କ ଫଟୋ ରହୁଥିବାରୁ ବିଜେପି ଓ ମୋଦିଙ୍କୁ (Narendra Modi) କଡ଼ା ସମାଲୋଚନା କରିଥିଲା ।

ନିକଟରେ ଅନୁଷ୍ଠିତ ବେଙ୍ଗଲ୍ ବିଧାନ ସଭା ନିର୍ବାଚନ (West Bengal Assembly Polls) ସମୟରେ ତୃଣମୂଳ କଂଗ୍ରେସ (TMC) ଏହି ପ୍ରସଙ୍ଗରେ ନିର୍ବାଚନ ଆୟୋଗଙ୍କ ନିକଟରେ ଅଭିଯୋଗ ବି କରିଥିଲା । ଟିକାକରଣ (Corona Vaccination) ପରେ ଲୋକଙ୍କୁ ମିଳୁଥିବା ପ୍ରମାଣପତ୍ରରେ ଆଚରଣ ବିଧି ଉଲ୍ଲଙ୍ଘନ ହେଉଛି ବୋଲି କହିଥିଲା ତୃଣମୂଳ କଂଗ୍ରେସ ।

ମମତା ବାନାର୍ଜୀ ଅନେକ ଥର ଦାବି କରିଛନ୍ତି ଯେ ସବୁ ଲୋକଙ୍କୁ ମାଗଣାରେ ଟିକା ଦିଆଯାଉ । ଏବେ ଭ୍ୟାକ୍ସିନ୍ ସାର୍ଟିଫିକେଟ୍ ଉପରୁ ମୋଦିଙ୍କ ଫଟୋ ହଟାଇ ସେ କେନ୍ଦ୍ର ସରକାର ଓ ମୋଦିଙ୍କ ସହ ନିଜ କଳହକୁ ଆଉ ପାଦେ ଆଗକୁ ନେଇଛନ୍ତି । ତାଙ୍କ ଦଳ ଅନୁଭବ କରୁଛି ଯେ ସାର୍ଟିଫିକେଟରେ ମମତାଙ୍କ ଫଟୋ ରହିବା ଭୁଲ୍ ନୁହେଁ ।

ତୃଣମୂଳ କଂଗ୍ରେସ ନେତା ସୌଗତ ରାୟ କହିଛନ୍ତି ଯେ ବିଜେପି ଲୋକେ ଏମିତି ପୂର୍ବରୁ କରିସାରିଛନ୍ତି । ‘‘ଯଦି ସେମାନେ ଏହା କରିପାରିବେ, ତେବେ ଆମେ ବି ତାହା କରିପାରିବୁ । ଯଦି ସେମାନେ ଏମିତି କରି ନ ଥାନ୍ତେ, ଆମେ ବି କରି ନ ଥାନ୍ତୁ,’’ ସେ କହିଛନ୍ତି ।

ମମତା ସରକାରଙ୍କ ଏହି ନିଷ୍ପତ୍ତି ପରେ ବିଜେପି ଆହୁରି ରାଗିଛି । ବରିଷ୍ଠ ବିଜେପି ନେତା ତଥା ଦଳର ରାଜ୍ୟ ମୁଖପାତ୍ର ସମିକ ଭଟ୍ଟାଚାର୍ଯ୍ୟ କହିଛନ୍ତି ଯେ ତୃଣମୂଳ କଂଗ୍ରେସ ପ୍ରଧାନ ମନ୍ତ୍ରୀ ପଦର ଗାରିମାକୁ ସ୍ୱୀକାର କରୁନାହିଁ । ତୃଣମୂଳ କଂଗ୍ରେସ ପଶ୍ଚିମ ବଙ୍ଗକୁ ଏକ ଅଲଗା ଆତ୍ମନିର୍ଭରଶୀଳ ଦେଶ ବୋଲି ଭାବି ଆଚରଣ କରୁଛି ବୋଲି ସେ କହିଛନ୍ତି । ‘‘ତୃଣମୂଳ କଂଗ୍ରେସ ମାନିବାକୁ ପ୍ରସ୍ତୁତ ନୁହେଁ ଯେ ସେମାନେ ଯେଉଁଠି ଅଛନ୍ତି ତାହା ଭାରତର ଏକ ରାଜ୍ୟ,’’ ସେ କହିଛନ୍ତି ।

ପଶ୍ଚିମ ବଙ୍ଗର ପୂର୍ବତନ ମୁଖ୍ୟ ସଚିବ ଆଲାପନ ବନ୍ଦୋପାଧ୍ୟାୟଙ୍କୁ ନେଇ ବି ଏବେ ମୋଦି ଓ ମମତା ସରକାରଙ୍କ ମଧ୍ୟରେ ଟଣାଓଟରା ଚାଲିଛି । ମୋଦି ସରକାର ଆଲାପନଙ୍କୁ କେନ୍ଦ୍ରକୁ ଆସି ଯୋଗଦେବାକୁ କହିବା ସତ୍ତ୍ୱେ ସେ ତାହା ନ ମାନି ନିଜ ପଦରୁ ଇସ୍ତଫା ଦେଇଥିଲେ ।

ମୋଦି ସରକାରଙ୍କ କଥା ଆଲାପନ ବନ୍ଦୋପାଧ୍ୟାୟ ଅମାନ୍ୟ କରିବା ପରେ ମମତା ତାଙ୍କୁ ପୁରସ୍କାର ସ୍ୱରୂପ ନିଜ ମୁଖ୍ୟ ପରାମର୍ଶଦାତା ପଦରେ ତିନି ବର୍ଷ ପାଇଁ ନିଯୁକ୍ତ କରିଛନ୍ତି ।