ଆଇ.ସି.ଏମ୍.ଆର୍.ର ଅଧ୍ୟୟନ ଅନୁଯାୟୀ ଗର୍ଭାବସ୍ଥାରେ ସବୁ ଗର୍ଭବତୀ ମହିଳାଙ୍କ ରୋଗ ପ୍ରତିରୋଧକ ଶକ୍ତି ଯଥେଷ୍ଟ କମିଯାଇଥାଏ । ତେଣୁ ଗର୍ଭବତୀ ମହିଳାଙ୍କୁ ସଂକ୍ରମଣ ହେବାର ଆଶଙ୍କା ବହୁତ ଅଧିକ ଥାଏ । କରୋନା ଭାଇରସ ସଂକ୍ରମଣର ଏହି ସମୟରେ ଅପରିପକ୍ୱ ପ୍ରସବ (premature delivery) ମାମଲା ବୃଦ୍ଧି ପାଇଛି, କିନ୍ତୁ ତାହା କରୋନା କାରଣରୁ ହୋଇଛି କି ନା ତାହା ଏ ପର୍ଯ୍ୟନ୍ତ ପ୍ରମାଣିତ ହୋଇନାହିଁ । ଏହି ପ୍ରସଙ୍ଗରେ ଗବେଷଣା ଜାରି ରହିଛି ।
ସଂକ୍ରମିତ ଗର୍ଭବତୀ ମହିଳାଙ୍କ ଠାରୁ ଏହି ସଂକ୍ରମଣ ତାଙ୍କ ଗର୍ଭରେ ଥିବା ଶିଶୁକୁ ଯେ ପହଞ୍ଚିବ ତାହା ଜରୁରୀ ନୁହେଁ । କିନ୍ତୁ ଅନେକ ଥର ଏମିତି ଘଟୁଥିବା ଦେଖାଯାଇଛି । ଉଦାହରଣ ସ୍ୱରୂପ ଯଦି ଜଣେ ମହିଳାଙ୍କର ମ୍ୟାଲେରିଆ ଥାଏ, ତେବେ ତାହା ତାଙ୍କ ଗର୍ଭସ୍ଥ ଶିଶୁ ପାର୍ଯ୍ୟନ୍ତ ମଧ୍ୟ ପହଞ୍ଚିଥାଏ । ଅନ୍ୟ ପକ୍ଷରେ ଏମିତି ବି ଘଟେ ଯେ ଏଚ.ଆଇ.ଭି. ପରି ପରିସ୍ଥିତିରେ ଏହି ସଂକ୍ରମଣ ମା’ଠାରୁ ପିଲା ପର୍ଯ୍ୟନ୍ତ ବ୍ୟାପିବାର ସମ୍ଭାବନା କମ୍ ଥାଏ ।
ଗର୍ଭବତୀ ମହିଳାମାନଙ୍କଠାରେ କରୋନା ଭାଇରସ୍ ସଂକ୍ରମଣ ମାମଲାରେ ଆଇ.ସି.ଏମ୍.ଆର୍. କରିଥିବା ଅନୁଧ୍ୟାନରେ ଦେଖାଯାଇଛି ଯେ ଏହି ସଂକ୍ରମଣ ସାମାନ୍ୟ ଥିଲା ଓ ତାହା ଶୀଘ୍ର ସୁସ୍ଥ ହୋଇଯାଇଥିଲା । କିନ୍ତୁ ଗର୍ଭଧାରଣର ୨୮ ସପ୍ତାହ ପରେ ସଂକ୍ରମଣ ଶୀଘ୍ର ଓ ଅଧିକ ହେବାର ଆଶଙ୍କା ବଢ଼ିଥାଏ । ତେଣୁ ସେହି ସମୟରେ ଅଧିକ ଯତ୍ନ ନେବା ଆବଶ୍ୟକ ବୋଲି ଏହି ଅନୁଧ୍ୟାନ ପରେ କୁହାଯାଇଛି । ବିଶେଷ କରି ଗର୍ଭଧାରଣ ସମୟରେ ହୃଦୟ ସମ୍ବନ୍ଧୀୟ ସମସ୍ୟା ଦେଇ ଗତି କରୁଥିବା ମହିଳାମାନଙ୍କୁ ଅଧିକ ସାବଧାନ ରହିବା ପାଇଁ କୁହାଯାଇଛି ।
ଆଇ.ସି.ଏମ୍.ଆର୍.ରେ କରାଯାଇଥିବା ଅଧ୍ୟୟନ ଅନୁଯାୟୀ ଶିଶୁକୁ ମା’ର କ୍ଷୀର ଦିଆଯାଇପାରେ । ଏହି ଅଧ୍ୟୟନ ଅନୁଯାୟୀ ମା’ର କ୍ଷୀରରେ କୋଭିଡ-୧୯ ଦେଖାଯାଇ ନାହିଁ । ଯଦି ମା’ କରୋନା ସଂକ୍ରମିତ ହୋଇଛନ୍ତି ତେବେ ସେ ନିଜ ଶିଶୁକୁ ଅଲଗା ରଖି ବ୍ରେଷ୍ଟ୍ ପମ୍ପ୍ ମାଧ୍ୟମରେ ନିଜ କ୍ଷୀର ବାହାର କରି ଶିଶୁକୁ ପିଇବାକୁ ଦେଇପାରିବେ । ମନେ ରଖନ୍ତୁ ଯେ ପମ୍ପଟି ଭଲ କରି ପରିଷ୍କାର ହୋଇଥିବା ଓ ମା’ ନିଜ ହାତ ଭଲ ଭାବରେ ଧୋଇଥିବା ଦରକାର । ଏହି ସମୟ ମଧ୍ୟରେ ମା’ ମାସ୍କ ଲଗାଇବା ବି ଜରୁରୀ ।
