କରୋନା ଭାଇରସ
କେମିତି ଚାଲିବ ବିଧାନ ସଭା ଅଧିବେଶନ? ୭୫୭ ନମୁନାରୁ ୧୩୬ ଜଣ ପଜିଟିଭ୍ ବାହାରିଲେଣି
ରାଜ୍ୟ ବିଧାନ ସଭାର ମୌସୁମୀ ଅଧିବେଶନ ଆରମ୍ଭ ହେବାର ଦୁଇ ଦିନ ପୂର୍ବରୁ ଆସିଛି ପ୍ରଥମ କରୋନା ରିପୋର୍ଟ । ବିଧାନ ସଭାରେ ଟେଷ୍ଟ ହୋଇଥିବା ୭୫୭ ଜଣଙ୍କ ନମୁନାରୁ ୧୩୬ ଜଣ କରୋନା ପଜିଟିଭ୍ ଥିବା ଜଣାପଡିଛି ।
ଆସିଥିବା ରିପୋର୍ଟରେ ଦୁଇ ଜଣ ବିଧାୟକଙ୍କ ସହିତ କେତେକ ସାମ୍ବାଦିକ ଓ ବିଧାନ ସଭା କର୍ମଚାରୀ ପଜିଟିଭ୍ ଚିହ୍ନଟ ହୋଇଛନ୍ତି । ଏହି ଫଟୋରେ କରୋନା ଟେଷ୍ଟ ସମୟରେ ଉପସ୍ଥିତ ଅଛନ୍ତି ବାଚସ୍ପତି ସୂର୍ଯ୍ୟନାରାୟଣ ପାତ୍ର (ବାମ), ବିଜେଡିର ମୁଖ୍ୟ ସଚେତକ ପ୍ରମୀଳା ମଲ୍ଲିକ ଓ ବଡ଼ମ୍ବା ବିଧାୟକ ଦେବୀପ୍ରସାଦ ମିଶ୍ର ।
ସରକାରୀ ଦଳ ବିଜେଡିର ମୁଖ୍ୟ ସଚେତକ ପ୍ରମୀଳା ମଲ୍ଲିକ ଓ ବଡ଼ମ୍ବା ବିଧାୟକ ଦେବୀପ୍ରସାଦ ମିଶ୍ର କରୋନା ପଜିଟିଭ୍ ଥିବା ଜଣାପଡିଛି ।
ସୋମବାର ପର୍ଯ୍ୟନ୍ତ ହେବାକୁ ଥିବା ଏହି କରୋନା ଟେଷ୍ଟରେ ବିଧାନ ସଭା ଓ ଲୋକସେବା ଭବନର କର୍ମଚାରୀଙ୍କ ସହ ବିଧାୟକମାନଙ୍କ ଡ୍ରାଇଭର ଓ ବ୍ୟକ୍ତିଗତ ସୁରକ୍ଷା କର୍ମୀଙ୍କର ବି ଟେଷ୍ଟ ହେଉଛି ।
ଯେଉଁ ବିଧାୟକଙ୍କ ରିପୋର୍ଟ ନେଗେଟିଭ ଆସିବ କେବଳ ସେହି ବିଧାୟକଙ୍କୁ ଗୃହରେ ବସିବାକୁ ଅନୁମତି ମିଳିବ ବୋଲି ବାଚସ୍ପତି କହିଛନ୍ତି ।
ଏହି ଅଧିବେଶନରେ ସରକାରଙ୍କୁ ଘେରିବାକୁ ବିଭିନ୍ନ ପ୍ରସଙ୍ଗକୁ ନେଇ ଲମ୍ବା ତାଲିକା କରିଛନ୍ତି ବିରୋଧୀ ଦଳମାନେ । ଶାସକ ବିଜେଡି କହିଛି ‘‘ଜବାବ ଦେବାକୁ ଆମେ ପ୍ରସ୍ତୁତ’’ ।
ଦିନକୁ ମାତ୍ର ସାଢ଼େ ଚାରି ଘଣ୍ଟା ଚାଲିବ ଗୃହ କାର୍ଯ୍ୟ । ଏହି ସଂକ୍ଷିପ୍ତ ଅଧିବେଶନରେ ୧୨ଟି ଅଧ୍ୟାଦେଶ ଉପସ୍ଥାପିତ ହେବା କାର୍ଯ୍ୟକ୍ରମ ରହିଛି ।
