ଚନ୍ଦା ମୁଣ୍ଡ ଥିବା ପୁରୁଷମାନଙ୍କଠାରେ କରୋନା ସଂକ୍ରମିତ ହେବା ପରେ ମୃତ୍ୟୁ ସମ୍ଭାବନା ଅଧିକ: ରିସର୍ଚ୍ଚ

ଗବେଷଣାରୁ ଜଣାପଡିଛି ଯେ ଚନ୍ଦା ମୁଣ୍ଡ ଥିବା ପୁରୁଷମାନଙ୍କର (bald men) ବା ମଥାରେ ଖୁବ୍‌ କମ୍‌ ବାଳ ଥିବା ପୁରୁଷମାନଙ୍କର ଭଲ ବାଳ ଥିବା ପୁରୁଷମାନଙ୍କଠାରୁ କରୋନା ଭାଇରସ୍ ସଂକ୍ରମଣରେ ମୃତ୍ୟୁ ହେବାର ସମ୍ଭାବନା ଅଧିକ ଅଛି ।

ଚୀନରେ କରୋନା ଭାଇରସ୍‌ (Coronavirus) ଉତ୍ପନ୍ନ ହେବା ପରଠାରୁ ଗବେଷକମାନେ ଚନ୍ଦା ମୁଣ୍ଡ ଥିବା ପୁରୁଷମାନଙ୍କର ଏହି ସଂକ୍ରମଣରେ ଅଧିକ ସଂଖ୍ୟାରେ ମୃତ୍ୟୁ ହେଉଥିବା ଲକ୍ଷ୍ୟ କରିଛନ୍ତି ।

ବୈଜ୍ଞାନିକମାନେ ବିଶ୍ୱାସ କରୁଛନ୍ତି ଯେ ହୁଏତ ଆଣ୍ଡ୍ରୋଜେନ୍, ଅର୍ଥାତ ଟେଷ୍ଟୋଷ୍ଟେରନ୍ ପରି ପୁରୁଷ ଯୌନ ହରମୋନ୍, କରୋନା ଭାଇରସର କୋଷ (cells) ଉପରେ ଆକ୍ରମଣ କରିବାର କ୍ଷମତା ବଢ଼ାଇଥାଏ । ଏହାର ଅର୍ଥ ହେଉଛି ବାଳ ପାଇଁ ଚିକିତ୍ସା, ଯାହା ଏହି ହରମୋନଗୁଡ଼ିକୁ ଦବେଇ ରଖେ, ତାହା କରୋନା ଭାଇରସ୍ ସହ ଲଢ଼ିବାରେ ସହାୟକ ହୁଏ ।

ସ୍ପେନରେ ହୋଇଥିବା ଦୁଇଟି ଛୋଟ ଅଧ୍ୟୟନରୁ ଆଣ୍ଡ୍ରୋଜେନ୍ ଓ ଗୁରୁତର କରୋନା ସଂକ୍ରମଣ ମଧ୍ୟରେ ଥିବା ସମ୍ପର୍କ ଜଣାପଡ଼ିଛି । ପ୍ରଥମ ଅଧ୍ୟୟନରେ ମାଡ୍ରିଡର ତିନୋଟି ଡାକ୍ତରଖାନାରେ ଥିବା ୧୨୨ ଜଣ ରୋଗୀ ସାମିଲ ଥିଲେ, ଆଉ ସେଠାରେ ଦେଖାଯାଇଥିଲା ଯେ COVID ରେ ପୀଡିତ ୭୯% ପୁରୁଷ ଚନ୍ଦା ମୁଣ୍ଡିଆ ଥିଲେ ।

ପୂର୍ବରୁ ହୋଇଥିବା ଅନ୍ୟ ଏକ ଅଧ୍ୟୟନରୁ ଜଣାପଡିଛି ଯେ ସ୍ପେନର ଏକ ଡାକ୍ତରଖାନାର ୪୯ ଜଣ COVID ରୋଗୀଙ୍କ ମଧ୍ୟରୁ ୭୧% ଚନ୍ଦା ଥିଲେ । ଅଳ୍ପ ସଂଖ୍ୟକ ମହିଳାଙ୍କ ମଧ୍ୟରେ ମଧ୍ୟ ଏହି ସମାନ ସମ୍ପର୍କ ଦେଖିବାକୁ ମିଳିଥିଲା ।

‘‘ଆମେ ପ୍ରକୃତରେ ଭାବୁଛୁ ଯେ ଚନ୍ଦା ମୁଣ୍ଡ କରୋନା ଭାଇରସ୍‌ ସଂକ୍ରମଣ ଗୁରୁତର ହେବାର ଏକ ପୂର୍ବାନୁମାନ,’’ କହିଛନ୍ତି ଏହି ବିଷୟରେ ଅଧ୍ୟୟନ କରିଥିବା ବ୍ରାଉନ୍ ୟୁନିଭରସିଟିର ପ୍ରଫେସର୍‌ କାର୍ଲୋସ ୱାମ୍ବିୟର୍ । ‘‘ଆମେ ଭାବୁଛୁ ଆଣ୍ଡ୍ରୋଜେନ୍‌ ବା ପୁରୁଷ ହରମୋନଗୁଡ଼ିକ କରୋନା ଭାଇରସ୍‌ ଆମ କୋଷ (cell) ଭିତରେ ପଶିବାର ମୁଖ୍ୟ ରାସ୍ତା,’’ ସେ କହିଛନ୍ତି ।

କରୋନା ସଂକ୍ରମିତ ହୋଇ ସୁସ୍ଥ ହେଉଥବା ଲୋକଙ୍କଠାରେ ବି ବାଳ ଝଡ଼ିବା ଓ ଚନ୍ଦା ହୋଇଯିବା ସମସ୍ୟା ଦେଖାଯାଉଥିବା ପରିଲକ୍ଷିତ ହେଉଛି ।