ଖାଦ୍ୟ ସାମଗ୍ରୀର ମୂଲ୍ୟ ବୃଦ୍ଧି ହେତୁ ହୋଲସେଲ ମୂଲ୍ୟ ଉପରେ ଆଧାରିତ ମୁଦ୍ରାସ୍ଫୀତି ବୃଦ୍ଧି ପାଇଛି

News18 Odia Digital

WPI Inflation: ମାର୍ଚ୍ଚ ମାସରେ ମୁଦ୍ରାସ୍ଫୀତି ପୁଣି ବୃଦ୍ଧି ପାଇଛି। ମାର୍ଚ୍ଚ ୨୦୨୨ ମାସରେ ହୋଲସେଲ ମୂଲ୍ୟ ସୂଚକାଙ୍କ ଭିତ୍ତିକ ମୁଦ୍ରାସ୍ଫୀତି ହାର (WPI based Inflation) ୧୪.୫୫ ପ୍ରତିଶତ ହୋଇଛି। ଫେବୃଆରୀ ୨୦୨୨ରେ, ହୋଲସେଲ ମୂଲ୍ୟ ସୂଚକାଙ୍କ ଉପରେ ଆଧାରିତ ମୁଦ୍ରାସ୍ଫୀତି ହାର ୧୩.୧ ପ୍ରତିଶତ ଥିଲା।

ହୋଲସେଲ ମୁଦ୍ରାସ୍ଫୀତିର ଚାରି ମାସର ଏହା ହେଉଛି ସର୍ବୋଚ୍ଚ ସ୍ତର। ଜାନୁଆରୀ ୨୦୨୨ରେ ମୁଦ୍ରାସ୍ଫୀତି ହାର ୧୨.୯୬ ପ୍ରତିଶତ ଥିଲା। ଏହା ଏକ ଚିନ୍ତାର ବିଷୟ ଯେ ଗତ ଏକ ବର୍ଷ ଧରି ମୁଦ୍ରାସ୍ଫୀତି ହାର କ୍ରମାଗତ ଭାବରେ ଦୁଇଗୁଣରେ ରହିଛି। ମାର୍ଚ୍ଚ ୨୦୨୧ରେ ହୋଲସେଲ ଭିତ୍ତିକ ମୁଦ୍ରାସ୍ଫୀତି ୭.୮୯ ପ୍ରତିଶତ ଥିଲା।

ମାର୍ଚ୍ଚ ମାସରେ ଖାଦ୍ୟ ମୁଦ୍ରାସ୍ଫୀତି ହାରରେ ତୀବ୍ର ବୃଦ୍ଧି ଘଟିଛି। ଏହି ସମୟ ମଧ୍ୟରେ ଖାଦ୍ୟ ମୁଦ୍ରାସ୍ଫୀତି ହାର ୮.୪୭ ପ୍ରତିଶତରୁ ୮.୭୧ ପ୍ରତିଶତକୁ ବୃଦ୍ଧି ପାଇଛି। ଆଳୁର ହୋଲସେଲ ଭିତ୍ତିକ ମୁଦ୍ରାସ୍ଫୀତି ହାରରେ ଏକ ବଡ଼ ଧରଣର ଜମ୍ପ ହୋଇଛି। ଆଳୁର ମୁଦ୍ରାସ୍ଫୀତି ହାର ୧୪.୭୮ ପ୍ରତିଶତରୁ ୨୪.୬୨ ପ୍ରତିଶତକୁ ବୃଦ୍ଧି ପାଇଛି। ଯଦି ଆମେ ଇନ୍ଧନ ଓ ଶକ୍ତିର ମୁଦ୍ରାସ୍ଫୀତି ହାରକୁ ଦେଖିବା, ଫେବୃଆରୀ ୨୦୨୨ରୁ ଏହା ୩୧.୫୦ ପ୍ରତିଶତ ଥିଲା, ଯାହା ୩୪.୫୨ ପ୍ରତିଶତକୁ ବୃଦ୍ଧି ପାଇଛି।

ମାର୍ଚ୍ଚ ମାସରେ ଖୁଚୁରା ମୁଦ୍ରାସ୍ଫୀତି ହାର ୬.୯୫ ପ୍ରତିଶତ ଥିଲା। ଖୁଚୁରା ମୁଦ୍ରାସ୍ଫୀତିର ଏହି ଆକଳନ ୧୮ ମାସ ମଧ୍ୟରେ ସର୍ବୋଚ୍ଚ ସ୍ତର। ଖୁଚୁରା ମୁଦ୍ରାସ୍ଫୀତି ୬.୯୫ ପ୍ରତିଶତରେ ପହଞ୍ଚିଛି, ଯାହା ଆରବିଆଇ ଦ୍ୱାରା ସ୍ଥିର ହୋଇଥିବା ୬ ପ୍ରତିଶତ ଉପର ସୀମାଠାରୁ ଅଧିକ। NSOର ତଥ୍ୟ ଅନୁଯାୟୀ, ସହରାଞ୍ଚଳରେ ମୁଦ୍ରାସ୍ଫୀତିରେ ବହୁତ ବୃଦ୍ଧି ଘଟିଛି।