କେରଳରେ ଅଚାନକ ବନ୍ୟା ଯୋଗୁଁ ୨ଜଣଙ୍କର ମୃତ୍ୟୁ; ୪ଟି ଜିଲ୍ଲାରେ ପାଣିପାଗ ବିଭାଗର ରେଡ୍ ଆଲର୍ଟ

News 18 Odisha Digital

ତିରୁବନନ୍ତପୁରମ୍: କେରଳର ରାଜଧାନୀ ତିରୁବନନ୍ତପୁରମର ପାଲୋଡେ ଅଞ୍ଚଳର ମାନକାୟାମ ଜଳପ୍ରପାତରେ ଆଠ ବର୍ଷର ଶିଶୁ ସମେତ ଦୁଇ ଜଣଙ୍କର ମୃତ୍ୟୁ ଘଟିଛି । ସୋମବାର ପୋଲିସ ଏହି ସୂଚନା ଦେଇଛି । ବନ୍ୟାରେ ପ୍ରାଣ ହରାଇଥିବା ଉଭୟ ବ୍ୟକ୍ତି ସେହି ଗୋଷ୍ଠୀର ଅଂଶ ଥିଲେ ଯେଉଁମାନେ ରବିବାର ସନ୍ଧ୍ୟାରେ ହଠାତ୍ ଆସିଥିବା ବନ୍ୟାରେ ଫସିଯାଇଥିଲେ ।

ଜଣେ ପୋଲିସ ଅଧିକାରୀ ପିଟିଆଇକୁ କହିଛନ୍ତି, 'ଏକ ବିବାହ ଉତ୍ସବରେ ଯୋଗଦେବା ପାଇଁ ୧୦ ଜଣିଆ ଦଳ ଏହି ଅଞ୍ଚଳରେ ପହଞ୍ଚିଥିଲେ । ସେ ବ୍ରିମୁର ଜଙ୍ଗଲ ଅଞ୍ଚଳ ପରିଦର୍ଶନ କରିବାକୁ ଚେଷ୍ଟା କରିଥିଲେ, କିନ୍ତୁ ଏହା ସାଧାରଣ ଲୋକଙ୍କ ପାଇଁ ବନ୍ଦ କରା ଯାଇଥିଲା । ତେଣୁ ସେମାନେ ଜଳପ୍ରପାତ ଦେଖିବାକୁ ଯାଇଥିଲେ। ଜଳପ୍ରପାତରେ ଜଳ ପ୍ରବାହ ତୀବ୍ର ହେଉଥିବା କାରଣରୁ ସେମାନେ ଭାସିଗଲେ ।

ଗୋଷ୍ଠୀର ଆଠ ଜଣ ଲୋକ ସାହାରା ପାଇଁ ଏକ ପଥର ଧରିଥିବା ବେଳେ ଅନ୍ୟ ଦୁଇ ଜଣ ଭାସି ଯାଇଥିବା ଅଧିକାରୀ କହିଛନ୍ତି । ଅଚାନକ ବନ୍ୟାରେ ଭାସି ଯାଇଥିବା ଅନ୍ୟ ଜଣେ ବ୍ୟକ୍ତିଙ୍କୁ ସ୍ଥାନୀୟ ଲୋକ ଉଦ୍ଧାର କରିଥିଲେ ।

ସେପଟେ, ତିରୁବନନ୍ତପୁରମ୍, କୋଲାମ, ପଠାନମିତ୍ର ଏବଂ ଇଡୁକି ଜିଲ୍ଲା ପାଇଁ ଭାରତ ପାଣିପାଗ ବିଭାଗ (ଆଇଏମଡି) ରେଡ ଆଲର୍ଟ ଜାରି କରିଥିବାବେଳେ ଆଲାପୁଜା, କୋଟାୟାମ ଏବଂ ଏର୍ନାକୁଲମ ଜିଲ୍ଲାକୁ ମଙ୍ଗଳବାର ପାଇଁ ଅରେଞ୍ଜ ଆଲର୍ଟ ଜାରି କରାଯାଇଛି । ପାଣିପାଗ ବିଭାଗର ଵୈଜ୍ଞାନିକମାନେ ୭ ସେପ୍ଟେମ୍ବରରେ ପ୍ରବଳ ବର୍ଷା ହେବାକୁ ଥିବା ସ୍ଥାନ ଗୁଡିକରେ, ଯଥା ଏରନାକୁଲମ୍, ଇଡୁକି, ଥ୍ରିସୁର, ପାଲକ୍କଡ, ମାଲାପୁରାମ, କୋଜିକୋଡେ, ୱାୟନାଡ ଏବଂ କନ୍ନୁର ପାଇଁ ୟେଲୋ ଆଲର୍ଟ ଜାରି କରିଛନ୍ତି ।