'ଭାରତ ଯୋଡ଼ ଯାତ୍ରା'ରେ ସାମିଲ ହେଲେ ସୋନିଆ ଗାନ୍ଧି; କର୍ଣ୍ଣାଟକ ସିଏମ୍ କହିଲେ- 'ପ୍ରଭାବ ପଡ଼ିବନି'

News 18 Odia Digital

ବାଙ୍ଗାଲୋର : ଅନ୍ତରୀଣ ଅଧ୍ୟକ୍ଷ ସୋନିଆ ଗାନ୍ଧି ମଧ୍ୟ କଂଗ୍ରେସର 'ଭାରତ ଯୋଡ ଯାତ୍ରା'ରେ ସାମିଲ ହୋଇଛନ୍ତି । ସେପ୍ଟେମ୍ବର ୭ରେ କନ୍ୟା କୁମାରୀଠାରୁ ଆରମ୍ଭ ହୋଇଥିବା ଏହି ଯାତ୍ରା ବର୍ତ୍ତମାନ କର୍ଣ୍ଣାଟକ ଦେଇ ଯାଉଛି । ରାଜ୍ୟ ମୁଖ୍ୟମନ୍ତ୍ରୀ ବାସଭରାଜ ବମ୍ମାଇ ଗୁରୁବାର କହିଛନ୍ତି ସୋନିଆ ଗାନ୍ଧିଙ୍କ ଯୋଗଦାନର କୌଣସି ପ୍ରଭାବ ପଡ଼ିବ ନାହିଁ । କଂଗ୍ରେସର ଏହି ଗସ୍ତ ଜବାବରେ ଶାସକ ଭାରତୀୟ ଜନତା ପାର୍ଟି ନିଜ ନେତାଙ୍କ ରାଲି ଓ ରାଜ୍ୟବ୍ୟାପୀ ଭ୍ରମଣ ଯୋଜନା କରୁଛି ବୋଲି ବମ୍ମାଇ ଦାବି କରିଛନ୍ତି । ସେମାନଙ୍କର ଯୋଜନା ବହୁ ପୂର୍ବରୁ କରାଯାଇଥିଲା ବୋଲି ମୁଖ୍ୟମନ୍ତ୍ରୀ କହିଛନ୍ତି।

ଯାତ୍ରାରେ ସୋନିଆ, ପ୍ରିୟଙ୍କା ଗାନ୍ଧି ଭଦ୍ରା ଓ ରାହୁଲ ଗାନ୍ଧିଙ୍କ ସମ୍ପୃକ୍ତି ହେତୁ ଏହାର ପ୍ରଭାବ ଉପରେ ଏକ ପ୍ରଶ୍ନର ଉତ୍ତରରେ ବମ୍ମାଇ କହିଛନ୍ତି ଯେ ସବୁ ଦଳର ନେତାମାନେ ନିଜ ଦଳ ପାଇଁ କାମ କରିବା ସ୍ୱାଭାବିକ । ସୋନିଆ ଗାନ୍ଧି ଅଧା କିଲୋମିଟର ପଦଯାତ୍ରା କରିଥିଲେ ଓ ଏହା ପରେ ସେ ଚାଲିଗଲେ । ଆମର ଏହା ସହିତ କୌଣସି ସମ୍ପର୍କ ନାହିଁ ଏବଂ ଏହା ଗୁରୁତ୍ୱପୂର୍ଣ୍ଣ ନୁହେଁ । କଂଗ୍ରେସ ଗସ୍ତର ଜବାବରେ ବିଜେପି ନେତାଙ୍କ ରାଲିର ଯୋଜନା ତଥା ରାଜ୍ୟବ୍ୟାପୀ ଯାତ୍ରା ସମ୍ପର୍କରେ ଏକ ପ୍ରଶ୍ନର ଉତ୍ତରରେ ସେ କହିଛନ୍ତି ଯେ ଏଗୁଡିକ ବହୁ ପୂର୍ବରୁ ଯୋଜନା କରାଯାଇଛି।

ବମ୍ମାଇ କହିଛନ୍ତି ଯେ ମୁଁ ପୂର୍ବରୁ କହିଥିଲି ୬ ଟି ରାଲି ହେବ ଓ ଏହା ତା'ରି ଏକ ଅଂଶ । ଆମେ ଏହା ପୂର୍ବରୁ ଯୋଜନା କରିସାରିଥିଲୁ, କିନ୍ତୁ ବିଧାନସଭା ଅଧିବେଶନ ହେତୁ ଦଶହରା ପରେ ଏହାକୁ ଆୟୋଜନ କରିବାକୁ ନିଷ୍ପତ୍ତି ନେଇଥିଲୁ । ମୁଖ୍ୟମନ୍ତ୍ରୀ କେବଳ ଏତିକି କହିଥିଲେ, ମୁଁ ଯିବା ପୂର୍ବରୁ ଆପଣଙ୍କୁ ସୂଚନା ଦେଇଦେବି ।