SSR ମୃତ୍ୟୁ: ମୁମ୍ବାଇ ପୋଲିସର ଅବହେଳାରୁ ଦିଶାଙ୍କ ମୃତ୍ୟୁ ସହ ଜଡ଼ିତ ଫାଇଲ୍ ଡିଲିଟ୍ ହୋଇଛି

News18 Odia Digital

ମୁମ୍ବାଇ: ସୁଶାନ୍ତ ସିଂ ରାଜପୁତଙ୍କ ଆତ୍ମହତ୍ୟା (Sushant Singh Rajput suicide) ମାମଲାରେ ମୁମ୍ବାଇ ପୋଲିସର (Mumbai Police) ଏକ ବଡ଼ ଅବହେଳା ସାମ୍ନାକୁ ଆସିଛି । ଖବର ଅନୁସାରେ ମୁମ୍ବାଇ ପୋଲିସ ଅଜାଣତରେ ସୁଶାନ୍ତଙ୍କ ମୃତ୍ୟୁର ମାତ୍ର ପାଞ୍ଚ ଦିନ ତଳେ ହୋଇଥିବା ତାଙ୍କ ପୂର୍ବ ମ୍ୟାନେଜର୍‌ ଦିଶା ସାଲିଆନଙ୍କ (Disha Salian) ସନ୍ଦେହଜନକ ମୃତ୍ୟୁ ସହ ଜଡ଼ିତ ଫୋଲ୍ଡରକୁ କମ୍ପ୍ୟୁଟରରୁ ଡିଲିଟ୍‌ କରିଦିଆଯାଇଛି ।

ଏପରିକି ମୁମ୍ବାଇ ପୋଲିସ୍‌ ସୁଶାନ୍ତଙ୍କ ମୃତ୍ୟୁର ତଦନ୍ତ କରିବାକୁ ମୁମ୍ବାଇ ପହଞ୍ଚିଥିବା ବିହାର ପୋଲିସ (Bihar Police) ଟିମକୁ ଦିଶାଙ୍କ କମ୍ପ୍ୟୁଟର / ଲାପଟପ୍ ଦେଉ ନ ଥିବା ଅଭିଯୋଗ ହୋଇଛି । ବିହାର ପୋଲିସ କହିଛି ଯେ ଯଦି ସେମାନଙ୍କୁ ଦିଶାଙ୍କ ଲାପଟପ୍ ଦିଆଯାଏ, ତେବେ ସେମାନେ ପୁଣି ସେହି ଫୋଲ୍ଡରଟିକୁ ଖୋଜି ପାଇପାରିବେ । ବିହାର ପୋଲିସ ସହିତ ଏହି ମାମଲାରେ ମୁମ୍ବାଇ ପୋଲିସ ପକ୍ଷରୁ ଯେଉଁ ପ୍ରକାରର ବିବୃତ୍ତି ରଖାଯାଇଛି ତାହା ଏବେ ମୁମ୍ବାଇ ପୋଲିସର କାର୍ଯ୍ୟକାରିତାକୁ ସନ୍ଦେହ ଘେରରେ ଆଣି ଠିଆକରିଛି ।

୨୮-ବର୍ଷୀୟା ସେଲିବ୍ରିଟି ମ୍ୟାନେଜର୍‌ ଦିଶା ମୁମ୍ବାଇର ମାଲାଡର ଜନକଲ୍ୟାଣ ନଗର ଅଞ୍ଚଳରେ ଥିବା ଏକ ବହୁତଳ କୋଠାର ୧୨ତମ ତମ ମହଲାରୁ ତଳକୁ ଖସିପଡିଥିଲେ । ‘ମୁମ୍ବାଇ ମିରର’ରେ ପ୍ରକାଶିତ ଖବର ଅନୁସାରେ ଦାଦରରେ ନିଜ ମାଆବାପାଙ୍କ ସହ ରହୁଥିବା ଦିଶା କେତେକ ସାଙ୍ଗଙ୍କ ସହ ମାଲାଡ଼ ଆସିଥିଲେ ।



ସୂଚନା ଅନୁଯାୟୀ ବିହାର ପୋଲିସର ଟିମ୍ ଶନିବାର ସନ୍ଧ୍ୟାରେ ଦିଶା ସଲାୟାନଙ୍କ ଆତ୍ମହତ୍ୟା (Disha Salian sudden death or suicide) ମାମଲା ବିଷୟରେ କିଛି ଗୁରୁତ୍ୱପୂର୍ଣ୍ଣ ସୂଚନା ପାଇବା ପାଇଁ ମାଲଭାନୀ ପୋଲିସ ଷ୍ଟେସନରେ ପହଞ୍ଚିଥିଲା । ସୂଚନା ଅନୁସାରେ ଏହି ମାମଲାରେ ମୁମ୍ବାଇ ପୋଲିସର ଅନୁସନ୍ଧାନକାରୀ ଅଧିକାରୀ ମଧ୍ୟ ସମସ୍ତ ତଥ୍ୟ ମୌଖିକ ଭାବେ ବିହାର ପୋଲିସ୍‌ ଟିମକୁ ଦେଉଥିଲେ । ହେଲେ ଏତିକି ବେଳେ ମୁମ୍ବାଇ ପୋଲିସର ସେହି ଅଧିକାରୀଙ୍କୁ କୌଣସି ସ୍ଥାନରୁ ଏକ ଫୋନ୍‌ କଲ୍‌ ଆସିଲା, ଆଉ ତା’ ପରେ ସବୁ କିଛି ବଦଳିଗଲା ।

ଏହା ବି ପଢ଼ନ୍ତୁ: ନିଜ ପ୍ରେମକୁ ଲୁଚାଇବାକୁ ହତ୍ୟାକାରୀ ହେଲା ଭଉଣୀ, ପ୍ରେମିକ ସହ ମିଶି ସାନ ଭାଇକୁ ମାରିଦେଲା

ଏହା ବି ପଢ଼ନ୍ତୁ: ଭୁବନେଶ୍ୱରରେ ଛାତ୍ରୀର ମୃତ୍ୟୁ: ଝୁଲନ୍ତା ଶବର ହାତ-ଗୋଡ଼ ବନ୍ଧା ହୋଇଥିଲା; ତେଣୁ ଆତ୍ମହତ୍ୟା କେମିତି?

ପୋଲିସର ସୂତ୍ରଙ୍କ ଅନୁସାରେ ସେହି ଘଟଣା ପରେ ପରେ ମୁମ୍ବାଇ ପୋଲିସ ପକ୍ଷରୁ କୁହାଯାଇଥିଲା ଯେ ଅଜାଣତରେ ଦିଶା ସାଲିୟାନଙ୍କ କଥିତ ଆତ୍ମହତ୍ୟା (Disha Salian suicide) ସହ ଜଡ଼ିତ ଫାଇଲର ଫୋଲ୍ଡରଟି ଡିଲିଟ୍‌ ହୋଇଯାଇଛି । ଏହା ପରେ ବିହାର ପୋଲିସକୁ ଦିଶାଙ୍କ କମ୍ପ୍ୟୁଟର / ଲାପଟପ୍ ମଧ୍ୟ ଦିଆଯାଇ ନ ଥିଲା।



ଏହା ପୂର୍ବରୁ NEWS18 ପାଖରେ ସୁଶାନ୍ତ ସିଂ ରାଜପୁତଙ୍କ ପୋଷ୍ଟମର୍ଟମ ରିପୋର୍ଟ ସହ ଜଡ଼ିତ ଯାହା ସୂଚନା ଅଛି ତା’ ଅନୁସାରେ ଏହି ଘଟଣାରେ ତଦନ୍ତ ଅଧିକାରୀଙ୍କ ଦ୍ୱାରା ମିଳିଥିବା ପ୍ରାରମ୍ଭିକ ପ୍ରମାଣ ସେହି ରିପୋର୍ଟରେ ଉଲ୍ଲେଖ କରାଯାଇ ନାହିଁ । ତା’ ଛଡ଼ା ସେଦିନ ସୁଶାନ୍ତଙ୍କ ଘରୁ ଭିଡିଓଗ୍ରାଫର ରେକର୍ଡ କରିଥିବା ଭିଡିଓର ବର୍ଣ୍ଣନା ବି ଏହି ରିପୋର୍ଟରେ ଦିଆଯାଇ ନାହିଁ ।

ଏପରିକି ସୁଶାନ୍ତଙ୍କ ମୃତ ଶରୀରର ଉଚ୍ଚତା କିମ୍ବା କୌଣସି ପରିଚୟ ଚିହ୍ନ ବି ରିପୋର୍ଟରେ ଉଲ୍ଲେଖ କରାଯାଇ ନାହିଁ ବୋଲି ସୂଚନା ମିଳିଛି । ଏ ସବୁ ତଥ୍ୟ ଅନୁସାରେ ଏବେ ସନ୍ଦେହ କରାଯାଉଛି ଯେ ମୁମ୍ବାଇ ପୋଲିସ୍‌ ଦ୍ୱାରା ସୁଶାନ୍ତଙ୍କ ମୃତ୍ୟୁ ମାମଲାର ତଦନ୍ତ ବହୁତ ଖାମଖିଆଲି ଢଙ୍ଗରେ କରାଯାଉଥିଲା ।