ବିରୋଧୀଙ୍କ ମୁହଁ ହୋଇପାରେ ତଳକୁ; ରାଷ୍ଟ୍ରପତି ପାର୍ଥିନୀ ଦ୍ରୌପଦୀ ମୁର୍ମୁଙ୍କୁ ସମର୍ଥନ ଦେଲେ ଓମ ପ୍ରକାଶ ରାଜଭର

News 18 Odia Digital

ନୂଆଦିଲ୍ଲୀ: ଏନଡିଏ ରାଷ୍ଟ୍ରପତି ପାର୍ଥିନୀ ଦ୍ରୌପଦୀ ମୁର୍ମୁଙ୍କୁ ସମର୍ଥନ କରିବେ ସମାଜବାଦୀ ପାର୍ଟିର ନେତା ଓମ୍ ପ୍ରକାଶ ରାଜଭର । ଆସନ୍ତା ୧୮ ତାରିଖରେ ହେବାକୁ ଥିବା ରାଷ୍ଟ୍ରପତି ନିର୍ବାଚନ ଆଗରୁ ଓମ ପ୍ରକାଶ ସମର୍ଥନ କରିବା କଥା ପ୍ରକାଶ କରିଛନ୍ତି । ପୂର୍ବରୁ ବିରୋଧୀ ଦଳ ପ୍ରାର୍ଥୀ ଯଶବନ୍ତ ସିହ୍ନାଙ୍କ ସହ ଅଖିଲେଶ ଏକ ଭୋଜି କରିଥିଲେ । ଅନେକ ନେତାଙ୍କୁ ଭୋଜିରେ ନିମନ୍ତ୍ରଣ କରାଯାଇଥିଲା । କିନ୍ତୁ ଓମ ପ୍ରକାଶ ସେଥିରୁ ବାଦ ପଡ଼ିଥିଲେ । ଏପରି ଏକ ଅପମାନ କାରଣରୁ ଓମ ପ୍ରକାଶ ଏନଡିଏକୁ ସମର୍ଥନ କରିବା କଥା ଚର୍ଚ୍ଚା ହେଉଛି ।

ଏସପିଙ୍କ ସହିତ ମେଣ୍ଟ ନଭାଙ୍ଗି ରାଷ୍ଟ୍ରପତି ନିର୍ବାଚନରେ ଓମ ପ୍ରକାଶ ଦ୍ରୌପଦୀ ମୁର୍ମୁଙ୍କୁ ସମର୍ଥନ କରିବେ । ପୂର୍ବରୁ ଦ୍ରୌପଦୀ ମୁର୍ମୁଙ୍କୁ ସମର୍ଥନ ଦେବା ପାଇଁ ବିଏସପି ମୁଖ୍ୟ ମାୟାବତୀ ମଧ୍ୟ ଘୋଷଣା କରିସାରିଛନ୍ତି । ଆଦିବାସୀ ସମ୍ପ୍ରଦାୟରୁ ଆସିଥିବାରୁ ମାୟାବତୀ ଦ୍ରୌପଦୀଙ୍କୁ ସମର୍ଥନ କରିବା କଥା କହିଥିଲେ । କେବଳ ସେତିକି ନୁହେଁ ବିରୋଧୀ ଦଳଙ୍କ ଉପରେ ଖୁବ ବର୍ଷିଥିଲେ ମାୟାବତୀ । ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ଓ ପୂର୍ବତନ କେନ୍ଦ୍ରମନ୍ତ୍ରୀ ଶରଦ ପାୱାର ରାଷ୍ଟ୍ରପତି ନିର୍ବାଚନ ପାଇଁ ହେଉଥିବା ବୈଠକରେ ବିଏସପିକୁ ଡକାଯାଇନଥିଲା । ଏଥିସହ ବିଏସପିକୁ ପ୍ରଶଂସା କରି ମାୟାବତୀ କହିଛନ୍ତି ବିଏସପି କାହାକୁ ଅନୁସରଣ କରେନାହିଁ ।