ନେପାଳ ବିମାନ ଦୁର୍ଘଟଣା; ମୃତ୍ୟୁବରଣ କଲେ ଲୋକଙ୍କ ପ୍ରିୟ ଗାୟିକା ନୀରା ଛନତ୍ୟାଲ

News 18 Odia Digital

ନୂଆଦିଲ୍ଲୀ; ନେପାଳ ବିମାନ ଦୁର୍ଘଟଣାର ଖବର ଆଜି ସାରା ବିଶ୍ୱକୁ ଥରାଇଦେଇଛି । ଦୁର୍ଘଟଣାରେ ସମସ୍ତ ଯାତ୍ରୀଙ୍କର ମୃତ୍ୟୁ ଘଟିଛି । ସେମଧ୍ୟରେ ଥିଲେ ନେପାଳର ଲୋକପ୍ରିୟ କଣ୍ଠଶିଳ୍ପୀ ( Famous singer ) ନୀରା ଛନତ୍ୟାଲ ( Nira chhantyal )। ଏକ ସଂଗୀତ କାର୍ଯ୍ୟକ୍ରମରେ ଯୋଗ ଦେବାକୁ ଯାଉଥିଲେ ନୀରା ।

ନୀରା ଅନେକ ନେପାଳୀ ସିନେମା ଏବଂ ଆଲବମରେ କଣ୍ଠଦାନ କରିଥିଲେ । ନେପାଳର ସଂଗୀତ ଜଗତ ପାଇଁ ଏହା ଏକ ବଡ଼ କ୍ଷତି ବୋଲି ସହକଳାକାର ଓ ନୀରାଙ୍କ ଫ୍ୟାନମାନେ କହିଛନ୍ତି ।

ସୂଚନାଯୋଗ୍ୟ, ଆଜି ଥିଲା ଏକ ବଡ଼ ଦୁର୍ଘଟଣାର ଦିନ । ଯାତ୍ରୀବାହୀ ବିମାନ ( Flight ) ଏଟିଆର ୭୨ ମାତ୍ର ୧୦ ସେକେଣ୍ଡରେ ଅବତରଣ କରିଥାନ୍ତା । ଯାତ୍ରୀମାନେ ବିମାନରୁ ଓହ୍ଲାଇ ନିଜ ଗନ୍ତବ୍ୟ ସ୍ଥଳକୁ ବାହାରିଥାନ୍ତେ । କିନ୍ତୁ କିଛି ସମୟ ମଧ୍ୟରେ ସବୁକିଛି ଛାରଖାର ହୋଇଗଲା । ଉକ୍ତ ବିମାନର ସମସ୍ତ ଯାତ୍ରୀଙ୍କର ଦେହାନ୍ତ ହୋଇଛି । କାଠମାଣ୍ଡରୁ ( Kathamandu ) ଉଡାଣ ଭରି ପୋଖରାରେ ପହଞ୍ଚୁଥିଲା ବିମାନ କିନ୍ତୁ ନିମିଷକ ମଧ୍ୟରେ ବିମାନଟି ଏକ ନଦୀକୂଳ ନିକଟରେ ପଡିଯାଇଥିଲା ।

ଦୁର୍ଘଟଣା ଘଟିବା ପରେ ବିମାନଟି ହୁତୁହୁତୁ ହୋଇ ଜଳିବାକୁ ଆରମ୍ଭ କରିଥିଲା । ସ୍ଥାନୀୟ ଅଗ୍ନୀଶମ ବିଭାଗ ଏବଂ ରେସ୍କ୍ୟୁ ଟିମ ଘଟଣାସ୍ଥଳରେ ପହଞ୍ଚି ଉଦ୍ଧାର କାର୍ଯ୍ୟ ଆରମ୍ଭ କରିଥିଲେ ମଧ୍ୟ କେହି ବଞ୍ଚିନଥିଲେ । ବିମାନରେ ଦେଶ ବିଦେଶର ବିଭିନ୍ନ ପ୍ରାନ୍ତରୁ ଅନେକ ଯାତ୍ରୀ ଥିଲେ । ବିମାନ ଦୁର୍ଘଟଣା ଖବର ପ୍ରଚାରିତ ହେବାପରେ ସମସ୍ତଙ୍କ ପରିବାରରେ ଶୋକ ଖେଳିଯାଇଛି । ତେବେ ବିମାନରେ କିଛି ତୃଟି ରହିଥିବା ଏୟାରଲାଇନର ଅଧିକାରୀ କହିଥିବାବେଳେ ଏନେଇ ଅଧିକ ତଦନ୍ତ ଚଳାଇଛନ୍ତି କର୍ତ୍ତୃପକ୍ଷ ।

ଖବର ଅନୁଯାୟୀ, ଦୁର୍ଘଟଣା ପରେ ପ୍ରତ୍ୟକ୍ଷଦର୍ଶୀମାନେ ଧୂଆଁ ବାହାରୁଥିବାର ଦେଖିଲେ। ଆଉ ଏକ ଗୁରୁତ୍ୱପୂର୍ଣ୍ଣ କଥା ସାମ୍ନାକୁ ଆସିଛି। କାଠମାଣ୍ଡୁରେ ପାଗ ଖରାପ ଥିଲା ଏବଂ ୟେଟି ଏୟାରଲାଇନ୍ସର ATR-72 ବିମାନ ଠିକ୍ ସମୟରେ ଉଡାଣ ଭରିଥିଲା। କ୍ୟାପଟେନ କମଲ କେସି ଏହି ବିମାନ ଚଳାଉଥିଲେ। ୟେଟି ଏୟାରଲାଇନ୍ସର ମୁଖପାତ୍ର ସୁଦର୍ଶନ ବାର୍ଟାଲା କହିଛନ୍ତି ଯେ ନିଆଁ ଲିଭାଇବା ପାଇଁ ଉଦ୍ୟମ କରାଯାଉଛି। ଏହା ସହିତ ଉଦ୍ଧାର କାର୍ଯ୍ୟ ମଧ୍ୟ ଜାରୀ ରହିଛି।