‘‘ଚେୟାର୍ କାହାରି ବାପର ନୁହେଁ’’: ଲାଲୁଙ୍କ ବଡ଼ ପୁଅ ତେଜ୍ ନିଜ ଦଳର ରାଜ୍ୟ ମୁଖ୍ୟଙ୍କୁ ହିଟଲର୍ ବୋଲି କହିଲେ

News18 Odia Digital

ପଟନା (ବିହାର): ବିହାରର ଜଣାଶୁଣା ନେତା ଲାଲହୁ ପ୍ରସାଦ ଯାଦବଙ୍କ (Lalu Prasad Yadav) ବଡ଼ ପୁଅ ତେଜ ପ୍ରତାପ ଯାଦବ (Tej Pratap Yadav) ନିଜ ବ୍ୟକ୍ତିଗତ ଜୀବନ ଓ ରାଜନୈତିକ ବିବୃତିକୁ ନେଇ ଲଗାତର ବିବାଦରେ ରହିଆସିଛନ୍ତି । ପୂର୍ବେ ବିହାରରେ ପ୍ରାୟ ଦୁଇ ବର୍ଷ ମନ୍ତ୍ରୀ ଥିବା ତେଜ ପ୍ରତାପ ଯାଦବ ଏବେ ନିଜ ଦଳ ରାଷ୍ଟ୍ରୀୟ ଜନତା ଦଳକୁ (Rashtriya Janata Dal, RJD) ପୁଣି ବିବାଦ ମଧ୍ୟକୁ ଟାଣିଆଣିଛନ୍ତି ।

ଆର୍‌.ଜେ.ଡି.ର ଛାତ୍ର ଶାଖାର ଏକ କାର୍ଯ୍ୟକ୍ରମର ପୋଷ୍ଟରରେ ତେଜ ପ୍ରତାପ ଯାଦବଙ୍କୁ ପ୍ରାଧାନ୍ୟ ଦିଆଯାଇଥିଲା । ସେଥିରେ ଓ ତାଙ୍କ ସାନ ଭାଇ ତଥା ବର୍ତ୍ତମାନ ବିହାରରେ ବିରୋଧୀ ଦଳର ନେତା ଥିବା ତେଜସ୍ୱୀ ଯାଦବଙ୍କ (Tejaswi Yadav) ଫଟୋ ପାଇଁ ସ୍ଥାନ ବି ମିଳି ନଥିଲା । ଏହାକୁ ନେଇ ରବିବାର ଦିନ ବିବାଦ ଲାଗି ରହିଥିଲା । କିନ୍ତୁ ସନ୍ଧ୍ୟା ହେବା ବେଳକୁ ସେହି କାର୍ଯ୍ୟକ୍ରମରେ ତେଜ ପ୍ରତାପ ଏକ ବିବାଦୀୟ ବିବୃତ୍ତି ଦେଇ ଏକ ନୂଆ ଅଡ଼ୁଆ ସୃଷ୍ଟି କରିଥିଲେ ।

ଏହା ବି ପଢ଼ନ୍ତୁ | ସମ୍ବଲପୁରରେ ଚା’ ଦୋକାନରେ ଝଗଡ଼ାରୁ ନକଲି ନୋଟ୍‌ ରାକେଟର ପର୍ଦ୍ଦାଫାଶ ହେଲା; ₹୧୩.୮୫ ଲକ୍ଷ ଜବତ

ଛାତ୍ର ଆର୍‌.ଜେ.ଡି.ର କାର୍ଯ୍ୟକ୍ରମକୁ ସମ୍ବୋଧିତ କରି ତେଜ ପ୍ରତାପ ପୁଣି ଥରେ ଦଳର ରାଜ୍ୟ ସଭାପତି ତଥା ଲାଲୁ ପ୍ରସାଦ ଯାଦବଙ୍କ ପୁରୁଣା ସହଯୋଗୀ ଜଗଦାନନ୍ଦ ସିଂଙ୍କ ବିରୋଧରେ ମନ ଖୋଲି କ୍ରୋଧ ପ୍ରକାଶ କରିଥିଲେ । ​​ସେ ତାଙ୍କୁ ମଞ୍ଚରୁ ନିଜ ଭାଷଣରେ ହିଟଲର୍‌ ବୋଲି କହିଥିଲେ ।



ଜଗଦାନନ୍ଦ ସିଂଙ୍କ ବିରୋଧରେ ତେଜ ପ୍ରତାପ କ୍ରୋଧ ପ୍ରକାଶ କରି କହିଥିଲେ ଯେ ତାଙ୍କ କାର୍ଯ୍ୟକାଳରେ ଆର୍‌.ଜେ.ଡି. ଦଳର କାର୍ଯ୍ୟାଳୟର ମୁଖ୍ୟ ଫାଟକ ରାଜ୍ୟ ସଭାପତିଙ୍କ ଇଚ୍ଛାରେ ଖୋଲୁଥିଲା ଓ ବନ୍ଦ ହେଉଥିଲା । ଜଗଦାନନ୍ଦ ସିଂଙ୍କ ବିରୁଦ୍ଧରେ କହି ତେଜ ପ୍ରତାପ ସେଇଠି ଅଟକିଯାଇ ନ ଥିଲେ । ସେ ଚେତାବନୀ ଦେଇ କହିଥିଲେ, ‘‘ଚେୟାର୍‌ କାହାରି ବାପର ନୁହେଁ ।’’

ଏହା ବି ପଢ଼ନ୍ତୁ ଓ ଦେଖନ୍ତୁ ଫଟୋ | ଏକା ସାଙ୍ଗରେ ୪ଟି ଛୁଆ ଜନ୍ମ ଦେଲେ ମହିଳା; କଟକ SCB ହସପିଟାଲର ଚିକିତ୍ସା ଇତିହାସରେ ପ୍ରଥମ

“ଜଗଦାନନ୍ଦ ସିଂ ସବୁଆଡ଼େ ଯାଇ ହିଟଲରଙ୍କ ପରି କଥା କୁହନ୍ତି । ମୁଁ ଯେତେବେଳେ ପାର୍ଟି ଅଫିସକୁ ଆସୁଥିଲି, ସେତେବେଳେର ସ୍ଥିତି ଓ ବର୍ତ୍ତମାନର ସ୍ଥିତି ମଧ୍ୟରେ ଭୂମି ଓ ଆକାଶ ମଧ୍ୟରେ ପାର୍ଥକ୍ୟ ଦିଶୁଛି । ଯେତେବେଳେ ମୋ’ ବାପା ଏଇଠି ଥିଲେ ପାର୍ଟିର ଅଫିସର ଗେଟ୍ ସବୁବେଳେ ଖୋଲା ରହୁଥିଲା । କିନ୍ତୁ ତାଙ୍କ ଯିବା ପରେ ଅନେକ ଲୋକ ମନମୁଖୀ କାର୍ଯ୍ୟ ଆରମ୍ଭ କରିଥିଲେ । ଚେୟାର କାହାରି ବାପର ନୁହେଁ,’’ କହିଥିଲେ ତେଜ ପ୍ରତାପ ଯାଦବ ।



ଏହି ଘଟଣା ପୂର୍ବରୁ ବି ତେଜ ପ୍ରତାପ ଯାଦବ ଅନେକ ଥର ଜଗଦାନନ୍ଦ ସିଂଙ୍କ ବିରୁଦ୍ଧରେ ମୁହଁ ଖୋଲିଛନ୍ତି ଓ ତାଙ୍କ କାର୍ଯ୍ୟ ଶୈଳୀ ଉପରେ ପ୍ରଶ୍ନ ଉଠାଇଛନ୍ତି । ସମୟ ସମୟରେ ଖବର ବି ଆସିଛି ଯେ ତେଜ ପ୍ରତାପଙ୍କ ଏମିତି କାର୍ଯ୍ୟ ଯୋଗୁଁ ଜଗଦାନନ୍ଦ ସିଂ ରାଜ୍ୟ ସଭାପତି ପଦରୁ ଇସ୍ତଫା ଦେଇଛନ୍ତି, କିନ୍ତୁ ଦଳର ମୁଖ୍ୟ ଲାଲୁ ପ୍ରସାଦ ତାଙ୍କୁ ମନାଇବା ପରେ ସେ ସେହି ପଦରେ ରହିଛନ୍ତି ।

ଏହା ବି ପଢ଼ନ୍ତୁ | ସୌମ୍ୟଙ୍କ ମୃତ୍ୟୁ ରହସ୍ୟ କ’ଣ ପାରଳା ରାଜମହଲର ୫ଟି ‘ଆତ୍ମହତ୍ୟା’ ପରି ଅସମାହିତ ରହିଯିବ?

ଦଳର କେତେକ ନେତାଙ୍କ କହିବା ଅନୁସାରେ ଜଗଦାନନ୍ଦ ସିଂ ତେଜସ୍ୱୀ ଯାଦବଙ୍କ ନିକଟତର ବୋଲି ବିବେଚନା କରାଯାଉଥିବାରୁ ତେଜ ପ୍ରତାପ ଯାଦବଙ୍କ କୋପ ଦୃଷ୍ଟିରେ ସେ ରହିଆସିଛନ୍ତି । ତେଜ ପ୍ରତାପ ଯେମିତି କ୍ରୋଧ ଦେଖାଇଛନ୍ତି ତେଜସ୍ୱୀ କେବେ ସେମିତି କିଛି କହିନାହାନ୍ତି । ଏମିତି ଘଟଣାଗୁଡ଼ିକ ଯୋଗୁଁ ବିହାର ରାଜନୀତିରେ ତେଜସ୍ୱୀ ବନାମ ତେଜ ପ୍ରତାପ ଆଭ୍ୟନ୍ତରୀଣ ଯୁଦ୍ଧ ଚର୍ଚ୍ଚାର ବିଷୟ ହୋଇଛି ।

ଏହା ବି ପଢ଼ନ୍ତୁ | ଓଡ଼ିଶାରେ PMAY ଯୋଜନା: ‘ଯାହା ଘରେ କାନ୍ଥ ନାହିଁ ତାକୁ ଘର ମିଳିନି, ୨ ତାଲା ଘର ଥିବା ଲୋକଙ୍କୁ ମିଳୁଛି’

ତେଜ ପ୍ରତାପଙ୍କ ଏହି ବିବୃତ୍ତି ପୁଣି ଥରେ ଆର୍‌.ଜେ.ଡି. ଭିତରେ ଏକ ନୂଆ ଝଡ଼ ସୃଷ୍ଟି କରିଛି । ଏହାର ରାଜନୈତିକ ପ୍ରଭାବ ଜଲଦି ଦେଖାଯାଇପାରେ ବୋଲି କୁହାଯାଉଛି । ଦଳର କେତେକ ନେତା କହିଛନ୍ତି ଯେ ତେଜ ପ୍ରତାପ ଯାଦବ ନିଜ ପିତା ତଥା ଦଳର ମୁଖ୍ୟ ଲାଲୁ ପ୍ରସାଦ ଯାଦବଙ୍କ କଥା ମାନିବାକୁ ନାରାଜ । ସର୍ବଦା ବିବାଦରେ ରହୁଥିବା ତେଜ ପ୍ରତାପଙ୍କ ଯୋଗୁଁ ଦଳକୁ ଖୁବ୍‌ ବଦନାମ୍‌ ହେବାକୁ ପଡୁଛି ।



ତେଜ ପ୍ରତାପ ଯାଦବ କେତେବେଳେ ଭଗବାନ ଶିବଙ୍କ ରୂପ ଧରି ଫଟୋ ଉଠାନ୍ତି ତ କେତେବେଳେ ଶ୍ରୀକୃଷ୍ଣଙ୍କ ରୂପରେ ନିଜକୁ ସଜ୍ଜିତ କରି ବଂଶୀ ବଜାଉଥିବା ଭଙ୍ଗୀରେ ନିଜ ଫଟୋ ଉଠାନ୍ତି । ବିବାହର ମାତ୍ର କିଛି ମାସ ପରେ ତାଙ୍କ ସ୍ତ୍ରୀ ତାଙ୍କୁ ଛାଡ଼ି ଚାଲିଯାଇଥିଲେ ।