J&Kରେ ମାତ୍ର ୩ ଘଣ୍ଟା ମଧ୍ୟରେ ଜଣେ ପୋଲିସ କର୍ମୀ ଓ ଶ୍ରମିକଙ୍କୁ ହତ୍ୟା କଲେ ଆତଙ୍କବାଦୀ

News18 Odia Digital

ଶ୍ରୀନଗର: ଜାମ୍ମୁ କାଶ୍ମୀରରେ ଶୁକ୍ରବାର ଦିନ ବିହାରର ଜଣେ ପୋଲିସ କର୍ମଚାରୀ ଓ ଜଣେ ଶ୍ରମିକ ଆତଙ୍କବାଦୀଙ୍କ ଗୁଳିର ଶିକାର ହୋଇଥିଲେ। ଉଭୟ ପୃଥକ ଘଟଣା ଦକ୍ଷିଣ କାଶ୍ମୀରର କୁଲଗାମରେ ଘଟିଥିଲା । ଗୋଟିଏ ଦିନରେ ଏହି ଦୁଇଟି ହତ୍ୟା ପରେ ରାଜନୀତି ଏହାର ସମାଲୋଚନା କରାଯାଇଛି । ଜାତୀୟ ସମ୍ମିଳନୀ ଉପାଧ୍ୟକ୍ଷ ଓମର ଅବଦୁଲ୍ଲା ଏକ ଟ୍ବିଟ ମାଧ୍ୟମରେ ଏହି ଘଟଣାକୁ ନିନ୍ଦା କରିଛନ୍ତି । ପୋଲିସ ଉକ୍ତ ଅଞ୍ଚଳରେ ସର୍ଚ୍ଚ ଅପରେସନ ଜାରି ରଖିଛି ।

ଆତଙ୍କବାଦୀମାନେ ଜିଲ୍ଲାର ୱାନପୋହ ଗ୍ରାମରେ କନଷ୍ଟେବଳ ବଣ୍ଟୁ ଶର୍ମାଙ୍କୁ ଗୁଳି କରି ହତ୍ୟା କରିଥିଲେ। ସନ୍ଧ୍ୟା ପ୍ରାୟ ଛଅଟା ସମୟରେ ଏହି ଘଟଣା ଘଟିଥିଲା । ପୋଲିସ କହିଛି ଯେ ଶର୍ମା ଆହତ ଅବସ୍ଥାରେ ଡାକ୍ତରଖାନାରେ ଭର୍ତ୍ତି ହୋଇଥିଲେ, ଯେଉଁଠାରେ ତାଙ୍କ ମୃତ୍ୟୁ ଘଟିଥିଲା ।

ଗଣମାଧ୍ୟମ ରିପୋର୍ଟ ଅନୁଯାୟୀ, ଏହା ପରେ ରାତି ଆଠଟାରେ ଆତଙ୍କବାଦୀମାନେ ନେହାମା ଅଞ୍ଚଳରେ ଶ୍ରମିକ ଶଙ୍କର କୁମାର ଚୌଧୁରୀଙ୍କୁ ହତ୍ୟା କରିଥିଲେ। ଚୌଧୁରୀ ବିହାରର କାଟିହର ଜିଲ୍ଲାର ପ୍ରୀତ ବିହାର ଗାଁର ବାସିନ୍ଦା ଥିଲେ ।

ଗଣମାଧ୍ୟମ ରିପୋର୍ଟ ଅନୁଯାୟୀ, ୱାନପୋହ ଅଞ୍ଚଳର ଶେମଫୋର୍ଡ ସ୍କୁଲ ନିକଟରେ ଶର୍ମାଙ୍କୁ ଆକ୍ରମଣ କରାଯାଇଥିଲା । ଘଟଣା ସମୟରେ ସେ ଡ୍ୟୁଟିରେ ନଥିଲେ। ଉଭୟ ଆକ୍ରମଣରେ ଅଲଗା ମାମଲା ରୁଜୁ ହୋଇଛି ଓ ହତ୍ୟାକାରୀଙ୍କୁ ଖୋଜା ଚାଲିଛି ବୋଲି ପୋଲିସ ସୂଚନା ଦେଇଛି ।

ଆତଙ୍କବାଦୀ ସଙ୍ଗଠନର ବରିଷ୍ଠ କମାଣ୍ଡରଙ୍କ ମୃତ୍ୟୁ ତଥା ବିଚ୍ଛିନ୍ନତାବାଦୀ ନେତା ଏସ୍.ଏସ୍ ଗିଲାନୀଙ୍କ ମୃତ୍ୟୁ ପରେ ମଧ୍ୟ ପାକିସ୍ତାନରେ ଆତଙ୍କବାଦୀ ଓ ସେମାନଙ୍କ ନିୟନ୍ତ୍ରକମାନେ ଶାନ୍ତିପୂର୍ଣ୍ଣ ପରିବେଶ ଉପରେ ରାଗିଛନ୍ତି ବୋଲି କାଶ୍ମୀର ଜୋନ୍ ପୋଲିସ ଏକ ଟ୍ବିଟ ମାଧ୍ୟମରେ କହିଛି ।

ନିକଟରେ ଆତଙ୍କବାଦୀମାନେ ଶ୍ରୀନଗରରେ ୨୫ ବର୍ଷୀୟ ସବ୍-ଇନ୍ସପେକ୍ଟର ଅର୍ଶଦ ଅହମ୍ମଦ ମୀରଙ୍କୁ ହତ୍ୟା କରିଥିଲେ। ଗଣମାଧ୍ୟମରେ ପ୍ରକାଶିତ ରିପୋର୍ଟ ଅନୁଯାୟୀ, ସେପ୍ଟେମ୍ବରର ୧୨ରେ ସିସିଟିଭି ଫୁଟେଜରେ ଆକ୍ରମଣକାରୀମାନେ ଅତି ନିକଟରୁ ଦୁଇଥର ପୋଲିସ ଅଧିକାରୀଙ୍କ ଉପରକୁ ଗୁଳି ଚଳାଇଥିବାର ଦେଖାଯାଇଛି। ଏହି ଘଟଣା ଖାନ୍ୟା ଅଞ୍ଚଳର ବଜାରରେ ଘଟିଥିଲା ।

କନଷ୍ଟେବଳ ଶର୍ମାଙ୍କ ହତ୍ୟା ଉପରେ ଅବଦୁଲ୍ଲା ଟ୍ବିଟ କରି କହିଛନ୍ତି, ‘‘ମୁଁ ଦକ୍ଷିଣ କାଶ୍ମୀରର କୁଲଗାମରେ ହୋଇଥିବା ଆତଙ୍କବାଦୀ ଆକ୍ରମଣକୁ ସମ୍ପୂର୍ଣ୍ଣ ଭାବେ ନିନ୍ଦା କରୁଛି। ଆଜି ସନ୍ଧ୍ୟାରେ ଡ୍ୟୁଟି ଲାଇନରେ ମୃତ୍ୟୁ ବରଣ କରିଥିବା ରେଳ ସୁରକ୍ଷା ବଳର କନଷ୍ଟେବଳ ବଣ୍ଟୁ ଶର୍ମାଙ୍କ ପରିବାର ଓ ସହକର୍ମୀଙ୍କୁ ମୋର ସମବେଦନା । ତାଙ୍କର ଆତ୍ମାକୁ ଭଗବାନ ଶାନ୍ତି ଦିଅନ୍ତୁ ।