କଶ୍ମୀର: କାରଗିଲକୁ ଫେରିଲା ଇଣ୍ଟରନେଟ୍ ସୁବିଧା; ସ୍ୱାବାଭିକ ଅବସ୍ଥାକୁ ଫେରୁଛି ଲଦାଖ

ନୂଆ ଦିଲ୍ଲୀ: ଜାମୁ ଏବଂ କାଶ୍ମୀରରୁ ଅନୁଚ୍ଛେଦ ୩୭୦ ଉଚ୍ଛେଦ ହେବା ପରେ ଏବଂ ଲଦାଖ କେନ୍ଦ୍ରଶାସିତ ଅଞ୍ଚଳ ଘୋଷିତ ହେବାର ୧୪୫ ଦିନ ପରେ କାରଗିଲରେ ଇଣ୍ଟରନେଟ ବ୍ୟବସ୍ଥା ପୂର୍ବ ପରି ଚାଲୁ ହୋଇଯାଇଛି ।

ଏ ସମ୍ପର୍କରେ ସେଠାକର ଜଣେ ଅଧିକାରୀ କହିଛନ୍ତି ଯେ କାରଗିଲରେ ଇଣ୍ଟରନେଟ ଚାଲୁ ହେବା ଏବଂ ବିଗତ ଚ଼ାରି ମାସ ମଧ୍ୟରେ କୌଣସି ହିଂସା ନ ଘଟିବା ସେଠାରେ ପରିସ୍ଥିତି ସାମାନ୍ୟ ହୋଇଥିବା ଦର୍ଶାଉଛି । ସେଠାକାର ଧାର୍ମିକ ନେତାମାନେ ମଧ୍ୟ ଲୋକମାନଙ୍କୁ ବ୍ୟବସ୍ଥାର ଦୁରୁପୋଯୋଗ ନ କରିବାକୁ ଅନୁରୋଧ କରିଛନ୍ତି ବୋଲି ଅଧିକାରୀ ଜଣଙ୍କ କହିଛନ୍ତି ।

ଚାଲୁ ହୋଇଛି ଲ୍ୟାଣ୍ଡଲାଇନ ସେବା

ସମ୍ବିଧାନର ୩୭୦ ଧାରାକୁ ଉଚ୍ଛେଦ କରି ଜାମୁ ଓ କାଶ୍ମୀରକୁ ଦୁଇଟି କେନ୍ଦ୍ରଶାସିତ ପ୍ରଦେଶରେ ଭାଗ କରିବା ଦିନ ସେଠାକାର କର୍ତ୍ତୃପକ୍ଷ ଲ୍ୟାଣ୍ଡ ଲାଇନ ଟେଲିଫୋନ୍‌ ଓ ମୋବାଇଲ୍ ଫୋନ୍‌ ସେବାକୁ ବନ୍ଦ କରିଦେଇଥିଲେ । ଏହା ସହ ଅଧିକାଂଶ ବିଶିଷ୍ଟ ରାଜନେତା, ବିଚ୍ଛିନ୍ନତାବାଦୀ ତଥା ଦୁଇଜଣ ପୂର୍ବତନ ମୁଖ୍ୟମନ୍ତ୍ରୀ ଓମାର ଅବଦୁଲ୍ଲା ଏବଂ ମେହେବୁବା ମୁଫ୍‌ତିଙ୍କୁ ଗୃହବନ୍ଦୀ କରାଯାଇଥିଲା । ଏହାପରେ ସ୍ଥିତି ସ୍ବାବାଭିକ ହେବା ପରେ ପ୍ରଥମେ ଲ୍ୟାଣ୍ଡଲାଇନ ଟେଲିଫୋନ ଚାଲୁ କରାଯାଇଥିଲା ଏବଂ ପରେ ପୋଷ୍ଟପେଡ୍‌ ମୋବାଇଲ ଚାଲୁ କରାଯାଇଥିଲା ।

ମାତ୍ର ବର୍ତ୍ତମାନ ପର୍ଯ୍ୟନ୍ତ କାଶ୍ମୀର ଉପତ୍ୟକାରେ ପ୍ରିପେଡ ମୋବାଇଲ ଏବଂ ଇଣ୍ଟରନେଟ ବ୍ୟବସ୍ଥାକୁ ଚାଲୁ କରାଯାଇନାହିଁ । ସେମାନଙ୍କ କାର୍ଯ୍ୟରେ ବାଧା ଉପୁଜୁଥିବାରୁ ମିଡିଆା ପ୍ରଫେସନାଲ ମାନେ ବାରମ୍ବାର ବିଏସ୍ଏନ୍ଏଲ୍ ବ୍ରଡବ୍ୟାଣ୍ଡ ସେବାକୁ ଚାଲୁ କରିବା ପାଇଁ ଅନୁରୋଧ କରୁଛନ୍ତି ।