ଆସ୍ଥା ଭୋଟ ଜିତିଲେ ହେମନ୍ତ ସୋରେନ; ସପକ୍ଷରେ ମିଳିଲା ୪୮ଟି ଭୋଟ

News 18 Odia Digital

ଝାଡଖଣ୍ଡ : ଆଜି ହେମନ୍ତ ସୋରେନଙ୍କ ସରକାର ଆସ୍ଥା ଭୋଟ ଜିତିଛନ୍ତି । ୮୧ ସଦସ୍ୟ ବିଶିଷ୍ଟ ଝାଡଖଣ୍ଡ ବିଧାନସଭାରେ ହେମନ୍ତ ସୋରେନଙ୍କ ସପକ୍ଷରେ ୪୮ ଟି ଭୋଟ ମିଳିଛି । ଏହି ସମୟରେ ବିଜେପି ବିଧାୟକମାନେ ବିଧାନସଭାରେ ଗୃହ ତ୍ୟାଗ କରିଥିଲେ ।

ଗତ କିଛି ଦିନ ଧରି ଝାଡ଼ଖଣ୍ଡରେ ରାଜନୈତିକ ଡ୍ରାମା ଲାଗିରହିଥିଲା । ଯାହାଫଳରେ ଝାଡ଼ଖଣ୍ଡରେ ଆରମ୍ଭ ହୋଇଥିଲା ରିସୋର୍ଟ ପଲିଟିକ୍ସ । ବିଜେପିର ଘୋଡା ବେପାର ଆଶଙ୍କା କରି ବିଧାୟକମାନଙ୍କୁ ରାୟପୁରରେ ରଖାଯାଇଥିଲା । ସୋମବାର ଦିନ ବିଧାନସଭାରେ ସ୍ୱତନ୍ତ୍ର ଅଧିବେଶନ ଡକାଯାଇଥିଲା । ବିଧାନସଭାରେ ଆସ୍ଥା ଭୋଟ ପାଇଁ ପ୍ରସ୍ତାବ ପାରିତ ହୋଇଥିଲା । ଏହା ପରେ ଆସ୍ଥା ଭୋଟ ପାଇଁ ଆୟୋଜନ ହୋଇଥିଲା । ହେମନ୍ତ ସୋରେନଙ୍କ ସପକ୍ଷରେ ୪୮ ଟି ଭୋଟ ମିଳିଥିବା ବେଳେ ଗୋଟିଏ ବି ଭୋଟ ବିରୋଧୀ ଦଳକୁ ଯାଇନାହିଁ । ଏହା ପରେ ଗୃହକୁ ମୁଲତବୀ ଘୋଷଣା କରିଥିଲେ ବାଚସ୍ପତି ।

ଆସ୍ଥା ଭୋଟ ପରେ ମୁଖ୍ୟମନ୍ତ୍ରୀ ସୋରେନ କହିଛନ୍ତି ଯେ ବିରୋଧୀ ଗଣତନ୍ତ୍ରକୁ ଧ୍ୱଂସ କରିବାକୁ ଚେଷ୍ଟା କରୁଛନ୍ତି । ବିଧାୟକ କିଣିବା ନେଇ ବିଜେପି ଯୋଜନା କରୁଥିଲା । ଆଜି ଆମେ ଗୃହରେ ଆମର ଶକ୍ତି ପ୍ରଦର୍ଶନ କରିଛୁ ।