କୁଳପତିଙ୍କୁ ଇସ୍ତଫା ଦାବି କରିବାର ଅଧିକାର ରାଜ୍ୟପାଳଙ୍କର ନାହିଁ: କେରଳ CM

News18 Odia Digital

ସୋମବାର କେରଳର ମୁଖ୍ୟମନ୍ତ୍ରୀ ପିନାରାଇ ବିଜୟନ ରାଜ୍ୟପାଳ ଆରିଫ ମହମ୍ମଦ ଖାନଙ୍କୁ ନଅଟି ରାଜ୍ୟ ବିଶ୍ୱବିଦ୍ୟାଳୟର କୁଳପତିଙ୍କ ଇସ୍ତଫା ଦାବିରେ ନିନ୍ଦା କରିଛନ୍ତି। ବିଜୟନ କହିଛନ୍ତି ଯେ ରାଜ୍ୟପାଳଙ୍କର ଏପରି ଅଧିକାର ନାହିଁ। ସମ୍ବିଧାନ ଓ ଗଣତନ୍ତ୍ର ବିରୋଧରେ କାର୍ଯ୍ୟ କରୁଥିବା ସେ ଅଭିଯୋଗ କରିଛନ୍ତି।

ଆରିଫ ଖାନ ନଅ ବିଶ୍ୱବିଦ୍ୟାଳୟର କୁଳପତିଙ୍କ ଇସ୍ତଫା ଦାବି କରି ଏକ ରାଜନୈତିକ ଝଡ଼ ସୃଷ୍ଟି କରିବାର ଗୋଟିଏ ଦିନ ପରେ ବିଜୟନ ଏହା ଏକ ଅସାଧାରଣ ପଦକ୍ଷେପ ବୋଲି କହିଛନ୍ତି। ରାଜ୍ୟର ବିଶ୍ୱବିଦ୍ୟାଳୟଗୁଡ଼ିକୁ ଧ୍ୱଂସ କରିବା ଉଦ୍ଦେଶ୍ୟରେ ରାଜ୍ୟପାଳ କାର୍ଯ୍ୟ କରୁଛନ୍ତି ବୋଲି ମୁଖ୍ୟମନ୍ତ୍ରୀ ଅଭିଯୋଗ କରିଛନ୍ତି। ମୁଖ୍ୟମନ୍ତ୍ରୀ କହିଛନ୍ତି ଯେ ରାଜ୍ୟପାଳ ହିଁ ଏହି ନଅଟି ବିଶ୍ୱବିଦ୍ୟାଳୟରେ କୁଳପତିଙ୍କୁ ନିଯୁକ୍ତ କରିଥିଲେ ଓ ଯଦି ଏହି ନିଯୁକ୍ତି ବେଆଇନ, ତେବେ ପ୍ରଥମ ଦାୟିତ୍ୱ ନିଜେ ରାଜ୍ୟପାଳଙ୍କ ଇସ୍ତଫା ଦେବା ଉଚିତ।

କୁଳପତିଙ୍କ ଇସ୍ତଫା ଦାବି କରିବାକୁ କୁଳାଧିପତିଙ୍କ କୌଣସି ଅଧିକାର ନାହିଁ ବୋଲି ମୁଖ୍ୟମନ୍ତ୍ରୀ କହିଛନ୍ତି। ବିଶ୍ୱବିଦ୍ୟାଳୟ ଅନୁଦାନ ଆୟୋଗ (ୟୁଜିସି) ର ନିୟମକୁ ବିରୋଧ କରି ଏପିଜେ ଅବଦୁଲ କଲାମ ଟେକ୍ନୋଲୋଜି ୟୁନିଭରସିଟିର କୁଳପତିଙ୍କ ନିଯୁକ୍ତିକୁ ଖାରଜ କରିବା ପରେ ରାଜ୍ୟପାଳ ଖାନ ଏହି ନିର୍ଦ୍ଦେଶ ଦେଇଛନ୍ତି।