ଭାରତ ସରକାର WhatsApp କୁ କଡ଼ା ଶବ୍ଦରେ ଚିଠି ଲେଖିଲେ; କହିଲେ: ନୂଆ ପ୍ରାଇଭେସି ପଲିସିକୁ ପ୍ରତ୍ୟାହାର କର

News18 Odia Digital
ନୂଆ ଦିଲ୍ଲୀ: ଭାରତ ସରକାର ହ୍ବାଟସଆପ୍ (WhatsApp) ଦ୍ୱାରା କରାଯାଇଥିବା ପ୍ରାଇଭେସି ପଲିସିରେ ପରିବର୍ତ୍ତନ ଗୁଡିକ ଶୀଘ୍ର ପ୍ରତ୍ୟାହାର କରିବାକୁ କହିଛି । କାରଣ କୌଣସି ଏକତରଫା ପରିବର୍ତ୍ତନ ଠିକ୍ ନୁହେଁ ଓ ଗ୍ରହଣୀୟ ନୁହେଁ । ଇଲେକ୍ଟ୍ରୋନିକ୍ସ ଓ ସୂଚନା ପ୍ରଯୁକ୍ତିବିଦ୍ୟା ମନ୍ତ୍ରଣାଳୟ ହ୍ବାଟସଆପର ସିଇଓ ୱିଲ୍ କ୍ୟାଥର୍ଟଙ୍କୁ ଏକ କଡ଼ା ଶବ୍ଦରେ ଚିଠି ଲେଖି କହିଛି ଯେ ଭାରତରେ ବିଶ୍ୱର ସର୍ବ ବୃହତ ହ୍ବାଟସଆପ୍ ଉପଭୋକ୍ତା ଅଛି ଓ ଏହାର ସେବା ପାଇଁ ସର୍ବ ବୃହତ ବଜାର । ହ୍ବାଟସଆପ୍ ସେବା ତଥା ଗୋପନୀୟତା ପଲିସିରେ ପ୍ରସ୍ତାବିତ ପରିବର୍ତ୍ତନ ଭାରତୀୟ ନାଗରିକଙ୍କ ପସନ୍ଦ ଓ ଓସ୍ୱାଧୀନତାକୁ ନେଇ ଗୁରୁତର ଚିନ୍ତା ବଢ଼ାଇଛି ବୋଲି ଚିଠିରେ ଦର୍ଶାଯାଇଛି।

ମନ୍ତ୍ରଣାଳୟ ହ୍ବାଟସଆପକୁ ପ୍ରସ୍ତାବିତ ପରିବର୍ତ୍ତନଗୁଡିକ ପ୍ରତ୍ୟାହାର କରିବାକୁ ଓ ସୂଚନା ଗୋପନୀୟତା, ଚୟନର ସ୍ୱାଧୀନତା ଓ ଡାଟା ସୁରକ୍ଷା ଉପରେ ଏହାର ପୁନର୍ବିଚାର କରିବାକୁ କହିଛି । ଭାରତୀୟମାନଙ୍କୁ ସଠିକ୍ ସମ୍ମାନ ଦିଆଯିବା ଉଚିତ ଓ ହ୍ବାଟସଆପ୍ ସେବା, ଗୋପନୀୟତା ସର୍ତ୍ତାବଳୀରେ ଯେକୌଣସି ଏକପାଖିଆ ପରିବର୍ତ୍ତନ ଯଥାର୍ଥ କିମ୍ବା ଗ୍ରହଣୀୟ ନୁହେଁ ବୋଲି ଚିଠିରେ ଦର୍ଶାଯାଇଛି ।

ହ୍ବାଟସଆପ୍ ନିଜର ସ୍ପଷ୍ଟୀକରଣ ରଖିଛି
ହ୍ବାଟସଆପ୍କୁ ନିଜର ଗୋପନୀୟତା ପଲିସିରେ ପରିବର୍ତ୍ତନକୁ ନେଇ ଅନେକ ସମାଲୋଚନାର ସାମ୍ନା କରିବାକୁ ପଡୁଛି । ନୂଆ ପଲିସି ଗ୍ରହଣ କରିବାକୁ ହ୍ବାଟସଆପ୍ ଉପଭୋକ୍ତାମାନଙ୍କୁ 8 ଫେବୃଆରୀ ପର୍ଯ୍ୟନ୍ତ ସମୟ ଦେଇଥିଲା । ଯଦିଓ ଲୋକଙ୍କ ପ୍ରତିକ୍ରିୟାକୁ ଦୃଷ୍ଟିରେ ରଖି କମ୍ପାନୀ ଏହାକୁ ସ୍ଥଗିତ ରଖିଛି । କିଛି ଉପଭୋକ୍ତା ଏହି ଅପଡେଟରେ ଅସନ୍ତୁଷ୍ଟ ଓ ଅନ୍ୟ ପ୍ଲାଟଫର୍ମ ଯେପରିକି ଟେଲିଗ୍ରାମ (telegram) ଓ ସିଗ୍ନାଲ (Signal) ଆଡକୁ ସ୍ଥାନାନ୍ତର ହେଉଛନ୍ତି । ଲୋକଙ୍କ ନକାରାତ୍ମକ କମେଣ୍ଟକୁ ଦୃଷ୍ଟିରେ ରଖି ହ୍ବାଟସଆପ୍ ନିରନ୍ତର ସଫାଈ ଦେଉଛି ।

ପ୍ରଥମେ ହ୍ବାଟସଆପ୍ ଏକ ବ୍ଲଗ୍ ପ୍ରକାଶ କରିଛି, ଟ୍ୱିଟ୍ କରିଛି ଓ ଗତ ସପ୍ତାହରେ ଏହା ପ୍ରଥମ ଥର ପାଇଁ ଷ୍ଟାଟସ ମାଧ୍ୟମରେ ନିଜର ସ୍ପଷ୍ଟିକରଣ କରିଛି । କଲିଂ, ବ୍ୟକ୍ତିଗତ ବାର୍ତ୍ତା, ଲୋକେସନ ଓ ଯୋଗାଯୋଗ ଭଳି ଜିନିଷ ଉପରେ ହ୍ବାଟସଆପ୍ ସ୍ପଷ୍ଟୀକରଣ ଦେଇଛି । ହ୍ବାଟସଆପ୍ କହିଛି ଯେ ସେମାନେ ବ୍ୟବହାରକାରୀଙ୍କ ଗୋପନୀୟତା ପ୍ରତି ପ୍ରତିବଦ୍ଧ । ଏହା ମଧ୍ୟ କହିଛି ଯେ ଏହା ସେ ଲୋକଙ୍କ ବ୍ୟକ୍ତିଗତ ଚାଟର ରେକର୍ଡ ରଖେ ନାହିଁ । ସେ ଉପଭୋକ୍ତାଙ୍କ ଭଏସ ଶୁଣେ ନାହିଁ । କାରଣ ସେଗୁଡ଼ିକ ଏଣ୍ଡ-ଟୁ-ଏଣ୍ଡକୁ ଏନକ୍ରିପ୍ଟ କରାଯାଇଥାଏ ।