ଗୌତମ ଗମ୍ଭୀର ଭବ୍ୟ ରାମ ମନ୍ଦିର ନିର୍ମାଣ ପାଇଁ ୧ କୋଟି ଟଙ୍କା ଦାନ କଲେ

News18 Odia Digital
ନୂଆ ଦିଲ୍ଲୀ: ଭାରତର ପୂର୍ବତନ ଓପନର୍ ତଥା ବିଜେପି ସାଂସଦ ଗୌତମ ଗମ୍ଭୀର (Gautam Gambhir) ଅଯୋଧ୍ୟାରେ ଭବ୍ୟ ରାମ ମନ୍ଦିର (Ram Mandir) ନିର୍ମାଣ ପାଇଁ ଏକ କୋଟି ଟଙ୍କା ଦାନ କରିଛନ୍ତି । କ୍ରିକେଟରରୁ ରାଜନେତା ହୋଇଥିବା ଗମ୍ଭୀର କହିଛନ୍ତି ଯେ ଏହି ଅର୍ଥ ସେ ଓ ତାଙ୍କ ପରିବାର ତରଫରୁ ଅଯୋଧ୍ୟାରେ ଏକ ଭବ୍ୟ ରାମ ମନ୍ଦିର ନିର୍ମାଣ ପାଇଁ ଦେଇଛନ୍ତି । ଯାହା ସମସ୍ତ ଭାରତୀୟଙ୍କ ସ୍ୱପ୍ନ ।

ପୂର୍ବ ଦିଲ୍ଲୀର ସାଂସଦ ଏକ ବିବୃତ୍ତିରେ କହିଛନ୍ତି ଯେ ଭବ୍ୟ ରାମ ମନ୍ଦିର ହେଉଛି ସମସ୍ତ ଭାରତୀୟଙ୍କ ସ୍ୱପ୍ନ । ଏଥିପାଇଁ ଏହି ଅର୍ଥ ମୋର ଓ ମୋ ପରିବାରର ଏକ ସ୍ୱଳ୍ପ ଅବଦାନ ଅଟେ। ”ଦଳର ନେତାମାନେ କହିଛନ୍ତି ଯେ ଦିଲ୍ଲୀ ବିଜେପି ସହରରେ ଦାନ ସଂଗ୍ରହ ପାଇଁ କୁପନ ଜାରି କରିଛି । ଯାହାର ମୂଲ୍ୟ ୧୦, ୧୦୦ ଓ ୧୦୦୦ ଟଙ୍କା ରହିଛି । ଦିଲ୍ଲୀ ବିଜେପି ସାଧାରଣ ସମ୍ପାଦକ ତଥା ଅଭିଯାନ ସଂଯୋଜକ କୁଲଜିତ ଚହଲ କହିଛନ୍ତି ଯେ ଏହା ଲୋକଙ୍କଠାରୁ ଦାନ ସଂଗ୍ରହରେ ବ୍ୟବହୃତ ହେବ ।

ଦୁଇଥର ବିଶ୍ୱକପ ଜିତିଥିବା ଦଳର ସାମିଲ ଥିଲେ ଗମ୍ଭୀର
ଦିଲ୍ଲୀର ପୂର୍ବତନ କ୍ରିକେଟର ଗୌତମ ଗମ୍ଭୀର ଦୁଇଥର ବିଶ୍ୱକପ ଜିତିଥିବା ଭାରତୀୟ ଦଳର ଅଂଶ ହୋଇଛନ୍ତି । ସେ ଟି -୨୦ ବିଶ୍ୱକପ ୨୦୦୭ର ଫାଇନାଲରେ ପାକିସ୍ତାନ ବିପକ୍ଷରେ ୭୫ ରନ୍ ସଂଗ୍ରହ କରିଥିଲେ । ଏଥି ସହିତ ଦିନିକିଆ ବିଶ୍ୱକପ ୨୦୧୧ ରେ ସେ ଶ୍ରୀଲଙ୍କା ବିପକ୍ଷ ଫାଇନାଲରେ ୯୭ ସ୍କୋର କରିଥିଲେ । ଭାରତ ପାଇଁ ସେ ୫୮ ଟି ଟେଷ୍ଟ, ୧୪୭ ଟି ODI ଓ ୩୭ ଟି -୨୦ ମ୍ୟାଚ ଖେଳିଛନ୍ତି । ଟେଷ୍ଟରେ ଗମ୍ଭୀର ୪୨ ହାରାହାରିରେ ୪୧୫୪ ରନ୍, ODI ରେ ୪୦ ହାରାହାରିରେ ୫୨୩୮ ରନ୍ ଓ ଟି-୨୦ ରେ ୯୩୨ ରନ୍ ସଂଗ୍ରହ କରିଛନ୍ତି । ସେ ଭାରତରୁ ତିନୋଟି ଫର୍ମାଟରୁ ସର୍ବମୋଟ ୨୦ ଶତକ ଓ 63 ଅର୍ଦ୍ଧ ଶତକ ହାସଲ କରିଛନ୍ତି ।

ଏହା ବ୍ୟତୀତ ଗମ୍ଭୀର ମଧ୍ୟ ଟି -୨୦ କ୍ରିକେଟରେ ଜଣେ ସଫଳ ବ୍ୟାଟ୍ସମ୍ୟାନ୍ ରହି ସାରିଛନ୍ତି । ସେ ପ୍ରାୟ ୨୫୧ଟି ଟି -୨୦ ମ୍ୟାଚରେ ୨୯ ଷ୍ଟ୍ରାଇକ ରେଟ୍ ସହ ୬୪୦୧ ରନ୍ ସଂଗ୍ରହ କରିଛନ୍ତି । ବାମହାତୀ ବ୍ୟାଟ୍ସମ୍ୟାନ୍ ଟି -୨୦ କ୍ରିକେଟ୍ ରେ ୫୩ ଟି ଅର୍ଦ୍ଧ ଶତକ ହାସଲ କରିଛନ୍ତି । ଗମ୍ଭୀର ତାଙ୍କ ଅଧିନାୟକତ୍ୱରେ କୋଲକାତା ନାଇଟ୍ ରାଇଡର୍ସ ଦୁଇଥର ଇଣ୍ଡିଆନ୍ ପ୍ରିମିୟର ଲିଗ୍ (ଆଇପିଏଲ୍) ଟାଇଟଲ୍ ହାସଲ କରିଛି ।