ହସ୍ପିଟାଲରେ ହେଉଥିଲା ମାଲିକର ଚିକିତ୍ସା; ୬ ଦିନ ପର୍ଯ୍ୟନ୍ତ ବାହାରେ ଅପେକ୍ଷା କଲା କୁକୁର

News18 Odia Digital
ଇସ୍ତାନବୁଲ: କୁକୁରମାନଙ୍କୁ (Dogs) ସର୍ବଦା ମଣିଷର ନିକଟତମ ଓ ବିଶ୍ୱସ୍ତ ପ୍ରାଣୀ ଭାବରେ ବିବେଚନା କରାଯାଏ । ଦୁଃଖଠାରୁ ଆରମ୍ଭ କରି ଖୁସି ପର୍ଯ୍ୟନ୍ତ ସେ ପ୍ରତ୍ୟେକ ମୁହୂର୍ତ୍ତରେ ମଣିଷ ସହିତ ଛିଡ଼ା ହୁଅନ୍ତି । ଏହିପରି ଏକ କୁକୁରର କାହାଣୀ ତୁର୍କୀରୁ (Turkey) ଉଭା ହୋଇଛି । ଏହା ଏପରି ଏକ କାହାଣୀ ଯାହା ଶୁଣିବା ପରେ ଆପଣଙ୍କ ଆଖିରେ ମଧ୍ୟ ଲୁହ ଆସିଯିବ । କୁକୁରର ମାଲିକ ଜଣକ ହସ୍ପିଟାଲରେ ଚିକିତ୍ସିତ ହେଉଥିଲେ । ଏଭଳି ପରିସ୍ଥିତିରେ ସେ ନିଜ ମାଲିକ ସୁସ୍ଥ ହେବା ପାଇଁ ଡାକ୍ତରଖାନା ବାହାରେ ୬ ଦିନ ପର୍ଯ୍ୟନ୍ତ ଅପେକ୍ଷା କରି ରହିଥିଲା । ଏହି କୁକୁରର ଭିଡିଓ ବର୍ତ୍ତମାନ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି ।

ଗଣମାଧ୍ୟମ ରିପୋର୍ଟ ଅନୁଯାୟୀ ତୁର୍କୀର ଉତ୍ତର-ପୂର୍ବ ସହର ଟ୍ରାବଜନ୍ ସହରର ଜଣେ ୬୮ ବର୍ଷ ବୟସ୍କ ବ୍ୟକ୍ତିଙ୍କ ମସ୍ତିଷ୍କରେ କିଛି ଅସୁବିଧା ହୋଇଥିଲା । ଯେଉଁ କାରଣରୁ ତାଙ୍କୁ ୧୪ ଜାନୁଆରୀରେ ହସ୍ପିଟାଲରେ ଭର୍ତ୍ତି କରାଯାଇଥିଲା । ବୋନେକ ନାମକ ଏହି କୁକୁରଟି ଯେତେବେଳେ ଜାଣିଲା ଯେ ତା'ର ମାଲିକ ଅସୁସ୍ଥ ଅଛି ଓ ତାଙ୍କୁ ଡାକ୍ତରଙ୍କ ନିକଟକୁ ନିଆଯାଉଛି । ଏହା ଜାଣି ସେ ଆମ୍ବୁଲାନ୍ସ ପଛରେ ଦୌଡି ହସ୍ପିଟାଲରେ ପହଞ୍ଚି ଯାଇଥିଲା । ହସ୍ପିଟାଲ କର୍ମଚାରୀମାନେ ଏହା ଦେଖି ଆଶ୍ଚର୍ଯ୍ୟ ହୋଇଯାଇଥିଲେ । ଏହା ପରେ ହସ୍ପିଟାଲ କର୍ମଚାରୀମାନେ ତାଙ୍କୁ ପ୍ରତିଦିନ ଖାଇବାକୁ ଦେବା ଆରମ୍ଭ କରିଥିଲେ ।

only in turkiye 🥺🐶🥺

a man was hospitalized in trabzon province of turkiye. and his dog waited his owner in front of the hospital for five days. some staff of the hospital took care of him while he was waiting. pic.twitter.com/tzk8a1bQa2

— the istanbulist (@istanbulism) January 19, 2021

ହସ୍ପିଟାଲରେ ଭର୍ତ୍ତି ହୋଇଥିବା ବ୍ୟକ୍ତିଙ୍କ ବଡ ଝିଅ ଏହି କୁକୁରକୁ ଅନେକ ଥର ଘରକୁ ନେବାକୁ ଚେଷ୍ଟା କରିଥିଲେ ମଧ୍ୟ ସେ ରାଜି ହୋଇନଥିଲା । ଶେଷରେ ଯେତେବେଳେ ମାଲିକର ଏକ ସପ୍ତାହ ପରେ ହସ୍ପିଟାଲରୁ ଡିସଚାର୍ଜ ହେଲେ ସେତବେଳେ କୁକୁର ଘରକୁ ଯିବାକୁ ରାଜି ହୋଇଥିଲା । ଏହା ପରେ ସେ ଖୁସିରେ ଏକ ହ୍ୱିଲ୍ ଚେୟାର ସହିତ ଦୌଡ଼ିଥିଲା । ପରେ କୁକୁରର ମାଲିକ କହିଥିଲେ ଯେ ସେ ତାଙ୍କର ଅତି ନିକଟତର ।