ସଡ଼କ ଦୁର୍ଘଟଣାରେ ସାଇରସ୍ ମିସ୍ତ୍ରୀଙ୍କର ମୃତ୍ୟୁ; ଡେପୁଟି ସିଏମ୍ ଦେବେନ୍ଦ୍ର ଫଡନାଭିସ୍ ଦେଲେ ତଦନ୍ତ ନିର୍ଦ୍ଦେଶ

News 18 Odia Digital

ମୁମ୍ବାଇ: ମହାରାଷ୍ଟ୍ରର ଉପମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନାଭିସ୍ ସଡ଼କ ଦୁର୍ଘଟଣାରେ ଟାଟା ସନ୍ସର ପୂର୍ବତନ ଅଧ୍ୟକ୍ଷ ସାଇରସ୍ ମିସ୍ତ୍ରୀଙ୍କ ମୃତ୍ୟୁର ବିସ୍ତୃତ ତଦନ୍ତ କରିବାକୁ ରାଜ୍ୟ ପୋଲିସକୁ କହିଛନ୍ତି । ଫଡନାଭିସ୍ କହିଛନ୍ତି ଯେ ପାଲଘରରେ ଏକ ଦୁର୍ଭାଗ୍ୟଜନକ ସଡ଼କ ଦୁର୍ଘଟଣାରେ ମିସ୍ତ୍ରୀ (54)ଙ୍କ ମୃତ୍ୟୁ ଖବର ଶୁଣି ସେ ଅତ୍ୟନ୍ତ ଦୁଃଖିତ ।

ସୂଚନାଯୋଗ୍ୟ, ରବିବାର ଦିନ ମୁମ୍ବାଇ ନିକଟ ପାଲଘରଠାରେ ଏକ ସଡକ ଦୁର୍ଘଟଣାରେ ସାଇରସ୍ ମିସ୍ତ୍ରୀଙ୍କ ମୃତ୍ୟୁ ଘଟିଛି । ରାଜ୍ୟ ଗୃହ ମନ୍ତ୍ରଣାଳୟର ଦାୟିତ୍ୱ ତୁଲାଉଥିବା ଫଡନାଭିସ୍ ଟ୍ୱିଟ୍ କରି କହିଛନ୍ତି ଯେ ଡିଜିପିଙ୍କ ସହ କଥା ହୋଇ ତାଙ୍କୁ ବିସ୍ତୃତ ଅନୁସନ୍ଧାନ କରିବାକୁ ନିର୍ଦ୍ଦେଶ ଦେଇଛନ୍ତି । ତାଙ୍କ ପରିବାର, ବନ୍ଧୁ ଏବଂ ସହକର୍ମୀଙ୍କୁ ମୋର ଗଭୀର ସମବେଦନା ।

ଜଣେ ପୋଲିସ ଅଧିକାରୀ କହିଛନ୍ତି ଯେ ମିସ୍ତ୍ରୀଙ୍କ କାର ଏକ ଡିଭାଇଡର୍ ସହିତ ଧକ୍କା ହେବା ସମୟରେ ଏହି ଦୁର୍ଘଟଣା ଘଟିଛି । ସେତେବେଳେ ମିସ୍ତ୍ରୀ ମର୍ସିଡିଜ୍ କାରରେ ଅହମ୍ମଦାବାଦରୁ ମୁମ୍ବାଇ ଫେରୁଥିଲେ । ପାଲଘର ଜିଲ୍ଲା ଅଧୀକ୍ଷକ ବାଲାସାହେବ ପାଟିଲ କହିଛନ୍ତି ଯେ ଏହି ଘଟଣା ସୂର୍ଯ୍ୟ ନଦୀ ଉପରେ ଏକ ବ୍ରିଜ ଉପରେ ଘଟିଛି ।

ଏଥି ସହିତ ସାଇରସ୍ ମିସ୍ତ୍ରୀଙ୍କ କାର ଦୁର୍ଘଟଣା ସମ୍ପର୍କରେ ପୋଲିସ ସୂତ୍ରରୁ ସୂଚନା ମିଳିଛି । ସୂତ୍ରରୁ ପ୍ରକାଶ ଯେ ପ୍ରାରମ୍ଭିକ ଅନୁସନ୍ଧାନରୁ ଜଣାପଡିଛି, ଡ୍ରାଇଭର କାରରେ ନିଜର ନିୟନ୍ତ୍ରଣ ହରାଇଥିଲେ, ଯେଉଁଥିପାଇଁ ଏତେ ବଡ ଦୁର୍ଘଟଣା ଘଟିଥିଲା । ସୂତ୍ରରୁ ପ୍ରକାଶ ଯେ ସାଇରସ୍ ମିସ୍ତ୍ରୀଙ୍କ ମୃତଦେହ କାସାସ୍ଥିତ ଏକ ସରକାରୀ ଡାକ୍ତରଖାନାରେ ରହିଛି । ଏହି ମାମଲାରେ ଦୁର୍ଘଟଣାରେ ହୋଇଥିବା ମୃତ୍ୟୁ ଉପରେ ପୋଲିସ ଏକ ରିପୋର୍ଟ ପ୍ରସ୍ତୁତ କରୁଛି ।