ବିବାଦରେ ଧର୍ମଗୁରୁ; ନାବାଳିକକୁ ଜିଭ ଦେଖାଇ ଚୁମ୍ବନ ମାଗିଲେ ଦଲାଇଲାମା!

News18 Odia Digital

Dalai Lama objectionable video: ଦଲାଇଲାମାଙ୍କର ଏକ ନୂଆ ଭିଡିଓ  ଆସିବା ପରେ ଉତ୍ତେଜନା ଆରମ୍ଭ ହୋଇଛି, ଯେଉଁଥିରେ ସେ ଜଣେ ଛୋଟ ପିଲାକୁ ଓଠରେ ଚୁମ୍ବନ ଦେଉଥିବାର ନଜର ଆସିଛନ୍ତି। କେବଳ ସେତିକି ନୁହେଁ, ଭିଡ଼ିଓରେ ସେ ତାଙ୍କୁ ଜିଭ ଦେଖାଇ ଚୁମ୍ବନ ଦେବାକୁ କହୁଛନ୍ତି। ସୋସିଆଲ ମିଡିଆରେ ଭାଇରାଲ ହୋଇଥିବା ଭିଡିଓ ସାମ୍ନାକୁ ଆସିବା ପରେ ଦଲାଇଲାମାଙ୍କୁ ନେଇ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି।

ଜୁଷ୍ଟ ବ୍ରୁର୍କସ ନାମକ ଜଣେ ବ୍ୟକ୍ତି ଟ୍ୱିଟରରେ ଟ୍ୱିଟ କରିବା ପରେ ବିବାଦ ବଢ଼ିଛି। ଜଣେ ଧର୍ମଗୁରୁ ଏଭଳି କାହିଁକି କଲେ ବୋଲି ସେ ପ୍ରଶ୍ନ କରିଛନ୍ତି।ସେ ଜଣେ ଭାରତୀୟ ନାବାଳକକୁ ଚୁମ୍ବନ ଦେଉଛନ୍ତି ଓ ତାଙ୍କ ଜିଭକୁ ଛୁଇଁବାକୁ ଚେଷ୍ଟା କରୁଛନ୍ତି। ଅନ୍ୟ ଜଣେ ଟ୍ୱିଟର ବ୍ୟବହାରକାରୀ ଦୀପିକା ପୁଷ୍କର ନାଥ ଲେଖିଛନ୍ତି, ଦଲାଇଲାମାଙ୍କ ଏଭଳି ଅଶ୍ଳୀଳ ଆଚରଣକୁ କେହି ନ୍ୟାୟ ଦେବା ଉଚିତ୍ ନୁହେଁ।

ପୂର୍ବରୁ ବିବାଦରେ ଆସିଥିଲେ ଦଲାଇଲାମା

ଏହାପୂର୍ବରୁ ୨୦୧୯ ରେ, ଦଲାଇଲାମା କହିଥିଲେ ଯେ ଯଦି ତାଙ୍କର ଉତ୍ତରାଧିକାରୀ ଜଣେ ମହିଳା ହେବାକୁ ଚାହାଁନ୍ତି, ତେବେ ସେ ଆକର୍ଷଣୀୟ ହେବା ଉଚିତ୍।  ୨୦୧୯ ରେ ଏକ ସାକ୍ଷାତକାରରେ ତାଙ୍କୁ ଏହି ମନ୍ତବ୍ୟ ପାଇଁ ସାରା ବିଶ୍ୱରେ ସମାଲୋଚନା କରାଯାଇଥିଲା।  ପରେ ତାଙ୍କର ବିବାଦୀୟ ମନ୍ତବ୍ୟ ପାଇଁ ସେ କ୍ଷମା ମାଗିଥିଲେ। ଏ ଖବର ଲେଖାଯିବା ପର୍ଯ୍ୟନ୍ତ ଦଲାଇଲାମାଙ୍କ ସଙ୍ଗଠନ ପକ୍ଷରୁ ଏ ନେଇ କୌଣସି ପ୍ରତିକ୍ରିୟା ଆସିନାହିଁ ।