ଲାଲ କିଲ୍ଲାରେ ହୋଇଥିବା ହିଂସାର ଆଉ ଏକ ଆରୋପି ଇକବାଲ ସିଂ ଗିରଫ ହେଲା

News18 Odia Digital
ନୂଆ ଦିଲ୍ଲୀ: କେନ୍ଦ୍ର ଦ୍ୱାରା ପାରିତ ହୋଇଥିବା ତିନିଟି କୃଷି ଆଇନ (Farm Laws) ବିରୁଦ୍ଧରେ ୨୬ ଜାନୁଆରୀରେ (Republic Day Violence) ଟ୍ରାକ୍ଟର ରାଲିରେ ହୋଇଥିବା ହିଂସା ଓ ଲାଲ କିଲ୍ଲାରେ ଧାର୍ମିକ ପତାକା ଉତ୍ତୋଳନ କରାଯିବାର ମୁଖ୍ୟ ଅଭିଯୁକ୍ତ ଦୀପ ସିଦ୍ଧୁଙ୍କୁ (Deep Sidhu) ଗିରଫ କରାଯିବା ପରେ ଆଉ ଏକ ଗିରଫଦାରୀ ଘଟିଛି । ଦିଲ୍ଲୀ ପୋଲିସ ଏହା ସୂଚନା ଦେଇଛି ଯେ ଇକବାଲ ସିଂଙ୍କୁ ସ୍ପେଶାଲ ସେଲ ମଙ୍ଗଳବାର ରାତିରେ ପଞ୍ଜାବର ହୋଶିଆରପୁରରୁ ଗିରଫ କରିଛି । ତାଙ୍କ ଗିରଫଦାରୀ ପାଇଁ ୫୦,୦୦୦ ଟଙ୍କା ପୁରସ୍କାର ରାଶି ରଖାଯାଇଥିଲା ।

ଚଳିତ ବର୍ଷ ଗଣତନ୍ତ୍ର ଦିବସ ଅବସରରେ କୃଷକମାନେ ଏକ ଟ୍ରାକ୍ଟର ରାଲି କରିଥିଲେ । ସେଥିମଧ୍ୟରୁ କିଛି କୃଷକ ଭୁଲ ମାର୍ଗରେ ଯାଇଥିଲା ଓ ପରେ ଲାଲ କିଲ୍ଲାରେ ଏକତ୍ରିତ ହୋଇ ଧାର୍ମିକ ପତାକା ଉତ୍ତୋଳନ କରିଥିଲେ । ଏହାପୂର୍ବରୁ ଗଣତନ୍ତ୍ର ଦିବସରେ ହିଂସା ଘଟଣାରେ ଦିଲ୍ଲୀ ପୋଲିସ ବୁରାରୀରେ ଆଉ ପାଞ୍ଚ ଜଣଙ୍କୁ ଗିରଫ କରିଥିଲା । ଏହି ଘଟଣାରେ ପୂର୍ବରୁ ମୁଖ୍ୟ ଅଭିଯୁକ୍ତଙ୍କ ବ୍ୟତୀତ ସୁରଜିତ ଛଦ୍ମନାମ ଡିପୁ (୨୬), ସତଭୀର ସିଂ ଛଦ୍ମନାମ ସଚିନ (୩୨), ସନ୍ଦୀପ ସିଂ (୩୦), ଦେବେନ୍ଦ୍ର ସିଂ (୩୫) ଓ ରବି କୁମାରଙ୍କୁ (୨୪) ଗିରଫ କରାଯାଇଛି ବୋଲି ଅଧିକାରୀମାନେ କହିଛନ୍ତି ।

ପୋଲିସର ସୂଚନାନୁସାରେ ସେମାନଙ୍କ ମଧ୍ୟରୁ ତିନିଜଣ ନେହେରୁ ବିହାର ଓ ଦୁଇଜଣ ରୋହିଣୀର ଗିରଫ କରାଯାଇଛି । ଲାଲ କିଲ୍ଲାରେ ହୋଇଥିବା ହିଂସା ଘଟଣାରେ ସୋମବାର ରାତିରେ ଅଭିନେତା-କାର୍ଯ୍ୟକର୍ତ୍ତା ଦୀପ ସିଦ୍ଧୁଙ୍କୁ ପୋଲିସ ଗିରଫ କରିଛି । ଉଲ୍ଲେଖନୀୟ ଯେ ୨୬ ଜାନୁଆରୀରେ ITO ରେ ପହଞ୍ଚିଥିବା ହଜାର ହଜାର ଆନ୍ଦୋଳନକାରୀଙ୍କ ସହିତ ପୋଲିସ ସହିତ ସଂଘର୍ଷ ହୋଇଥିଲା ।