ଆଜି ଘୋଷଣା ହେବ ଗୁଜୁରାଟ ବିଧାନସଭା ନିର୍ବାଚନ ପାଇଁ ତାରିଖ

News18 Odia Digital

ଗୁଜୁରାଟ: ଆଜି ଗୁଜୁରାଟରେ ବିଧାନସଭା ନିର୍ବାଚନ ପାଇଁ ତାରିଖ ଘୋଷଣା କରିବେ ନିର୍ବାଚନ ଆୟୋଗ (ଇସି)। ବୁଧବାର ସକାଳୁ ଅନୁମାନ କରାଯାଉଥିଲା ଯେ ନିର୍ବାଚନ କମିଶନ ନିର୍ବାଚନ ତାରିଖ ଘୋଷଣା କରିପାରନ୍ତି, କିନ୍ତୁ ବୁଧବାର ସନ୍ଧ୍ୟା ପର୍ଯ୍ୟନ୍ତ ଆୟୋଗ କିଛି ଘୋଷଣା କରିନଥିଲେ।

ଏଭଳି ପରିସ୍ଥିତିରେ ଆଜି ମଧ୍ୟାହ୍ନ ୧୨ଟାରେ ନିର୍ବାଚନ ଆୟୋଗ (ଇସି) ଏକ ସାମ୍ବାଦିକ ସମ୍ମିଳନୀ କରିଛନ୍ତି ଓ ଏହି ସମୟ ମଧ୍ୟରେ ଗୁଜୁରାଟ ନିର୍ବାଚନର ତାରିଖ ଘୋଷଣା କରାଯିବ ବୋଲି ସୂଚନା ମିଳିଛି।

ସରକାର ଗଠନ ପାଇଁ ୯୨ଟି ଆସନ ଆବଶ୍ୟକ

ଗୁଜୁରାଟ ସରକାରଙ୍କ କାର୍ଯ୍ୟକାଳ ୨୦୨୩ ଫେବୃଆରୀ ୧୮ରେ ଶେଷ ହେଉଛି। ୨୦୧୭ରେ ଗୁଜୁରାଟରେ ଶେଷ ବିଧାନସଭା ନିର୍ବାଚନ ଅନୁଷ୍ଠିତ ହୋଇଥିଲା। ଗୁଜୁରାଟ ବିଧାନସଭାରେ ମୋଟ ୧୮୨ଟି ଆସନ ଅଛି ଓ ସଂଖ୍ୟାଗରିଷ୍ଠତା ପାଇଁ ୯୨ଟି ସିଟ୍ ଆବଶ୍ୟକ। ୨୦୧୭ ଡିସେମ୍ବର ୯ ଏବଂ ଡିସେମ୍ବର ୧୪ରେ ଦୁଇଟି ପର୍ଯ୍ୟାୟରେ ମତଦାନ ଶେଷ ହୋଇଥିଲା। ଏଥିରେ ବିଜେପି ମୋଟ ୯୯ଟି ସିଟ୍ ହାସଲ କରିଥିବାବେଳେ କଂଗ୍ରେସ ୭୭ଟି ସିଟ୍ ଏବଂ ଅନ୍ୟ ଦଳ ୬ଟି ସିଟ୍ ଜିତିଥିଲା।

ମୋରବି ବ୍ରିଜ୍ ଦୁର୍ଘଟଣା ସବୁଠୁ ବଡ଼ ପ୍ରସଙ୍ଗ

ରାଜ୍ୟରେ ନିର୍ବାଚନ ପାଇଁ ରାଜନୈତିକ ମଞ୍ଚ ସଜାଯାଇଛି। ସମସ୍ତ ଦଳ ଏଠାକାର ଲୋକଙ୍କୁ ବୁଝାଇବାକୁ ଚେଷ୍ଟା କରୁଛନ୍ତି। ପରସ୍ପର ବିରୁଦ୍ଧରେ ଅଭିଯୋଗ ଏବଂ କାଉଣ୍ଟର ଅଭିଯୋଗ ଜାରି ରହିଛି। ଆମ୍ ଆଦମୀ ପାର୍ଟି (AAP) ମଧ୍ୟ ଜୋରଦାର ପ୍ରଚାର କରୁଛି। ତେବେ ପ୍ରଧାନମନ୍ତ୍ରୀ ମୋଦିଙ୍କ ଗୁଜୁରାଟ ହେଉଛି ବିଜେପିର ସବୁଠାରୁ ଶକ୍ତିଶାଳୀ ଗଡ଼। ବର୍ତ୍ତମାନ, ମୋରବି ବ୍ରିଜ ଦୁର୍ଘଟଣା ରାଜ୍ୟର ସବୁଠୁ ବଡ଼ ପ୍ରସଙ୍ଗ ହୋଇ ରହିଛି, ଯାହାକୁ ବିରୋଧୀମାନେ ଲଗାତାର ଟାର୍ଗେଟ କରୁଛନ୍ତି।