ଆଫତାବକୁ ଖଣ୍ଡାରେ ଆକ୍ରମଣ ଉଦ୍ୟମ, ଆକ୍ରମଣକାରୀ କହିଲେ- ଶ୍ରଦ୍ଧାକୁ ୩୫ ଖଣ୍ଡ କରିବା ବାଲାକୁ ୭୦ ଖଣ୍ଡ କରିବୁ

News 18 Odia Digital

Shraddha Murder: ଦିଲ୍ଲୀର କିଛି ଲୋକ ଶ୍ରଦ୍ଧା ୱାଲକର ହତ୍ୟାକାଣ୍ଡର ଅଭିଯୁକ୍ତ ଆଫତାବକୁ ଖଣ୍ଡା ଦ୍ୱାରା ଆକ୍ରମଣ କରିବାକୁ ଚେଷ୍ଟା କରିଛନ୍ତି । ଆଫତାବକୁ ଦିଲ୍ଲୀ ପୋଲିସ ଭ୍ୟାନରେ ରୋହିଣୀ ସ୍ଥିତ FSL କାର୍ଯ୍ୟାଳୟ ପର୍ଯ୍ୟନ୍ତ ଅଣାଯାଇଥିଲା । କିନ୍ତୁ ଭ୍ୟାନ୍ ସେଠାରେ ପହଞ୍ଚିବା ମାତ୍ରେ କିଛି ଲୋକ ଭ୍ୟାନ୍ ଏବଂ ପୋଲିସ୍ ଟିମ୍ ଉପରେ ଆକ୍ରମଣ କରିଥିଲେ । ସେମାନଙ୍କୁ ହିନ୍ଦୁ ସେନାର କର୍ମୀ କୁହାଯାଉଛି । ତେବେ ହିନ୍ଦୁ ସେନା ଏହାକୁ ଅସ୍ୱୀକାର କରିଛନ୍ତି ।

ଏହି ଲୋକମାନେ ପ୍ରଥମେ ଖଣ୍ଡା ଧରି ପୋଲିସ ସାମ୍ନାକୁ ଆସିଥିଲେ, ଯେତେବେଳେ ପୋଲିସ ଏହି ଲୋକଙ୍କୁ ଅଟକାଇବାକୁ ଚେଷ୍ଟା କରିଥିଲା, ସେମାନେ ମଧ୍ୟ ସେମାନଙ୍କ ଉପରେ ଆକ୍ରମଣ କରିଥିଲେ । ଏହା ପରେ ପୋଲିସ ଟିକିଏ ପଛକୁ ଫେରିବା ମାତ୍ରେ ସେମାନେ ଆଫତାବ ଥିବା ଭ୍ୟାନର କବାଟ ଖୋଲିଥିଲେ । ସନ୍ଧ୍ୟା ପ୍ରାୟ ୬.୪୫ ସମୟରେ ଏହି ଆକ୍ରମଣ ହୋଇଥିଲା । ଆକ୍ରମଣକାରୀମାନେ କହିଛନ୍ତି ଯେ ଆଜିର ସମୟରେ ଆମ ଭଉଣୀ ଏବଂ ଝିଅ ସୁରକ୍ଷିତ ନୁହଁନ୍ତି । ଏପରି ସ୍ଥିତିରେ, ଆମ ଭଉଣୀକୁ ୩୫ ଖଣ୍ଡ କରିଥିବା ବ୍ୟକ୍ତିକୁ ଆମେ ହାଣି ୭୦ ଖଣ୍ଡ କରିବୁ ।

ପୋଲିସ ଦୁଇ ଆକ୍ରମଣକାରୀଙ୍କୁ ଅଟକ ରଖିଛି । ପୋଲିସ୍ ଭ୍ୟାନ୍ ସେଠାରେ ପହଞ୍ଚିବା ମାତ୍ରେ ଆକ୍ରମଣକାରୀମାନେ ସେମାନଙ୍କ କାରକୁ ପୋଲିସ୍ ଭ୍ୟାନ୍ ଆଗରେ ରଖି ଭ୍ୟାନକୁ ଘେରି ରହିଥିଲେ । କିନ୍ତୁ ଡ୍ରାଇଭର ସେମାନଙ୍କଠାରୁ ଭ୍ୟାନକୁ ଖସାଇ ନେଇଯିବା ପୂର୍ବରୁ ଟ୍ରାଫିକରେ ଅଟକି ଯାଇଥିଲେ । ସେତେବେଳେ ଏହି ଆକ୍ରମଣକାରୀମାନେ ସେଠାରେ ପହଞ୍ଚି ଭ୍ୟାନ୍ ଚାରିପାଖରେ ଖଣ୍ଡା ଦେଖାଇବାକୁ ଲାଗିଲେ । ଆକ୍ରମଣକାରୀମାନେ ଖଣ୍ଡା ଦ୍ୱାରା ଭ୍ୟାନର କବାଟ ଖୋଲିଥିଲେ, କିନ୍ତୁ ସେଠାରେ ଥିବା ସୁରକ୍ଷା କର୍ମୀମାନେ ବନ୍ଧୁକ ଦେଖାଇବାରୁ ସେମାନେ ପଛକୁ ଫେରିଥିଲେ ।

ଆକ୍ରମଣକାରୀମାନେ ସେଠାରେ ଏକ କାରରେ ଖଣ୍ଡା, ହାତୁଡ଼ି ଏବଂ ସମସ୍ତ ଅସ୍ତ୍ରଶସ୍ତ୍ରରେ ପହଞ୍ଚିଥିଲେ । ଯେତେବେଳେ ଆଫତାବ ପୋଲିସର ହେପାଜତରେ ଥିଲା, ତାକୁ ଗୋପନୀୟ ଭାବେ କୋର୍ଟକୁ ଅଣାଯାଇଥିଲା, ଏବେ ତାକୁ ନ୍ୟାୟିକ ହେପାଜତକୁ ପଠାଯାଇଛି ଓ ଜେଲରେ ରଖାଯାଇଛି । ଏହି କାରଣରୁ, ବାହାର ଲୋକଙ୍କୁ ସେ ଏଠାରେ ପହଞ୍ଚୁଥିବା ଖବର ମିଲିଯାଇଥିଲା ।