ଭାରତୀୟ କ୍ରିକେଟ ଟିମର ହେଡ୍ କୋଚ ସାଜିବେ ପୂର୍ବତନ ଖେଳାଳି ରାହୁଲ ଦ୍ରାବିଡ

News18 Odia Digital

ନୂଆ ଦିଲ୍ଲୀ: ଭାରତୀୟ କ୍ରିକେଟ୍ ଦଳ ନୂଆ ହେଡ୍ କୋଚ ବିଷୟରେ ବଡ଼ ଖବର ସାମ୍ନାକୁ ଆସୁଛି। କୋଚ ହେବାକୁ ରାହୁଲ ଦ୍ରାବିଡ ତାଙ୍କ ସମ୍ମତି ଦେଇଛନ୍ତି। ଦ୍ରାବିଡଙ୍କ ଚୁକ୍ତି ପ୍ରଥମେ ୨୦୨୧ ପର୍ଯ୍ୟନ୍ତ ହେବ। ରିପୋର୍ଟ ଅନୁଯାୟୀ, ଦ୍ରାବିଡ ଟିମ୍ ଇଣ୍ଡିଆର କୋଚ୍ ହେବାକୁ ରାଜି ହୋଇଛନ୍ତି।

ଆଇପିଏଲ୍ ୨୦୨୧ର ଫାଇନାଲ୍ ପାଇଁ ଦୁବାଇରେ ପହଞ୍ଚିଥିବା ବିସିସିଆଇ ସଭାପତି ସୌରଭ ଗାଙ୍ଗୁଲି ଓ ସଚିବ ଜୟ ଶାହ, ଦ୍ରାବିଡଙ୍କୁ ଭେଟିଥିଲେ। ଉଭୟ ଦ୍ରାବିଡଙ୍କୁ ଭାରତୀୟ ଦଳର ମୁଖ୍ୟ ପ୍ରଶିକ୍ଷକ ହେବାକୁ ଅନୁରୋଧ କରିଥିଲେ ଓ ସେ ଏଥିରେ ରାଜି ମଧ୍ୟ ହୋଇଛନ୍ତି।

ଟାଇମ୍ସ ଅଫ୍ ଇଣ୍ଡିଆର ରିପୋର୍ଟ ଅନୁଯାୟୀ, ଟି-୨୦ ବିଶ୍ୱକପ୍ ପରେ ଦ୍ରାବିଡ ଟିମ ଇଣ୍ଡିଆରେ ମୁଖ୍ୟ ପ୍ରଶିକ୍ଷକ ଭାବରେ ଯୋଗ ଦେବେ। ତାହା ହେଉଛି, ମୁଖ୍ୟ ପ୍ରଶିକ୍ଷକ ଭାବରେ ଦ୍ରାବିଡଙ୍କ ପ୍ରଥମ ମିଶନ ନ୍ୟୁଜିଲ୍ୟାଣ୍ଡ ବିପକ୍ଷ ଘରୋଇ ODI ସିରିଜ୍ ହେବ ।

ଆଇପିଏଲ୍ ଫାଇନାଲ ପରେ ବିସିସିଆଇର ଜଣେ ବରିଷ୍ଠ ଅଧିକାରୀ ଏହି ଖବରକାଗଜକୁ କହିଛନ୍ତି ଯେ ସେ ଭାରତୀୟ କ୍ରିକେଟ୍ ଦଳର ନୂଆ କୋଚ୍ ହେବେ ବୋଲି ଦ୍ରାବିଡ ରାଜି ହୋଇଛନ୍ତି। ସେ ଖୁବ୍ ଶୀଘ୍ର ଜାତୀୟ କ୍ରିକେଟ୍ ଏକାଡେମୀର ନିର୍ଦ୍ଦେଶକ ପଦରୁ ଇସ୍ତଫା ଦେବେ। ତେବେ ବିସିସିଆଇରୁ ଏ ପର୍ଯ୍ୟନ୍ତ ଏହାକୁ ନେଇ ସରକାରୀ ବିବୃତ୍ତି ଆସିନାହିଁ।

ଦ୍ରାବିଡଙ୍କୁ ମୁଖ୍ୟ ପ୍ରଶିକ୍ଷକ କରିବା ବ୍ୟତୀତ ତାଙ୍କ ବିଶ୍ୱସ୍ତ ପାରସ ମାହାମ୍ବ୍ରେଙ୍କୁ ଟିମ୍ ଇଣ୍ଡିଆର ବୋଲିଂ କୋଚ୍ କରାଯାଇଛି। ଏହା ବ୍ୟତୀତ ବିକ୍ରମ ରଠୋର ଦଳର ବ୍ୟାଟିଂ କୋଚ୍ ରହିଥିବାବେଳେ ଫିଲ୍ଡିଂ କୋଚ୍ ଆର. ଶ୍ରୀଧରଙ୍କ ବଦଳି ସମ୍ପର୍କରେ ଏ ପର୍ଯ୍ୟନ୍ତ କୌଣସି ନାମ ସ୍ଥିର କରାଯାଇ ନାହିଁ।

ଦ୍ରାବିଡଙ୍କୁ ବାର୍ଷିକ ୧୦ କୋଟି ଟଙ୍କା ଦରମା ମିଳିବ

ଖବର ଅନୁଯାୟୀ ଦ୍ରାବିଡଙ୍କୁ ଦୁଇ ବର୍ଷିଆ ଚୁକ୍ତିନାମା ଦିଆଯାଇଛି। ଅର୍ଥାତ୍ ଏହି ଚୁକ୍ତି ୨୦୨୩ ବିଶ୍ୱକପ୍ ବର୍ଷ ପର୍ଯ୍ୟନ୍ତ ଚାଲିବ । ତାଙ୍କୁ ବେତନ ହିସାବରେ ୧୦ କୋଟି ଟଙ୍କା ମିଳିବ । ଗତ ମାସରେ ସେ ଏନସିଏ ମୁଖ୍ୟ ଭାବରେ ପୁନଃ ନିଯୁକ୍ତ ହୋଇଥିଲେ। କିନ୍ତୁ ଭାରତୀୟ କ୍ରିକେଟ୍ ଆଗକୁ ନେବା ପାଇଁ ବିସିସିଆଇର ଜଣେ ଶକ୍ତିଶାଳୀ ପ୍ରାର୍ଥୀ ଆବଶ୍ୟକ ଥିଲା। ଗାଙ୍ଗୁଲି ଓ ଜୟ ଶାହଙ୍କ ଦୃଷ୍ଟିରେ ଦ୍ରାବିଡ଼ଙ୍କ ଅପେକ୍ଷା ଏହି କାର୍ଯ୍ୟକୁ କେହି ଭଲ କରିପାରି ନଥିଲେ। ସେଥିପାଇଁ ତାଙ୍କୁ ଏହି ଭୂମିକା ପାଇଁ ମନୋନୀତ କରାଯାଇଥିଲା । ସେ ନ୍ୟୁଜିଲ୍ୟାଣ୍ଡ ସିରିଜରୁ ଏହି ଦାୟିତ୍ବ ଗ୍ରହଣ କରିବେ।