ଦୌଡ଼ ରାଣୀ ଦୂତୀ ଚାନ୍ଦଙ୍କୁ ସୋସିଆଲ ମିଡ଼ିଆରେ କଟୁ କଥା କହିଲେ ବଡ଼ ଭଉଣୀ ସରସ୍ୱତୀ

News18 Odia Digital

ଭୁବନେଶ୍ୱର: ଦୂତୀ ଚାନ୍ଦ ନିଜର ଖେଳ ଜୀବନ ହେଉ କିମ୍ବା ବ୍ୟକ୍ତିଗତ ସମ୍ପର୍କକୁ ନେଇ ସବୁବେଳେ ଚର୍ଚ୍ଚାରେ ରୁହନ୍ତି। ବିଶେଷ କରି ପରିବାର ସହ ତାଙ୍କ ସମ୍ପର୍କକୁ ନେଇ ଅନେକ ବିବାଦ ମଧ୍ୟ ଦେଖାଦେଇଛି। ନିକଟରେ ଆଉ ଏକ ବଡ଼ ଖବର ସାମ୍ନାକୁ ଆସିଛି। ଦୂତୀଙ୍କ ବଡ଼ ଭଉଣୀ ସରସ୍ୱତୀ ଚାନ୍ଦ ସୋସିଆଲ ମିଡ଼ିଆରେ ଦୂତୀଙ୍କୁ ନେଇ ଅନେକ କଟୁ କଥା କହିଛନ୍ତି। ନିଜର ଆଦର୍ଶ କହୁଥିବା ଅଚ୍ଯୁତ ସାମନ୍ତଙ୍କୁ ଦୂତୀ ବାପା ବୋଲି ସମ୍ବୋଧନ କରିଥିବାରୁ ତାଙ୍କ କଥାକୁ କଟାକ୍ଷ କରିଛନ୍ତି ବଡ଼ ଭଉଣୀ ସରସ୍ୱତୀ।

ସୋସିଆଲ ମିଡ଼ିଆରେ ଫଟୋ ଛାଡି ସରସ୍ୱତୀ ଚାନ୍ଦ ପ୍ରଶ୍ନ କରିଛନ୍ତି, “ଯଦି ଅଚୁତ୍ୟ ସାମନ୍ତ ଦୂତୀର ବାପା ତେବେ ଦୂତୀକୁ ବଡ଼ କରିଥିବା ଏଇ ମଳି ମୁଣ୍ଡିଆ ଲୋକଟା କିଏ? ନିଜେ ଦୁଇବେଳା ଭଲରେ ପେଟକୁ ଦାନା ନ ଖାଇ ଦୂତୀକୁ ମଣିଷ କରିଥିଲା, ସେ କିଏ? ତା ହେଲେ ଦୂତୀ ଚାନ୍ଦର ମା'ର ସ୍ୱାମୀ ମାନେ ଦୂତୀର ବାପା କିଏ ଜମି ଦଲାଲ ଅଚୁତ୍ୟ ନା ଅପାଠୁଆ, ମମୁଣ୍ଡିଆ, ଚକ୍ରଧର? ତେଲମରାର ଗୋଟେ ସୀମା ଥାଏ। ତା ହେଲେ ଦୂତୀ ଚାନ୍ଦ.... ଆଉ ଅଚ୍ୟୁତ କଣ..?”



ମଙ୍ଗଳବାର ଦୂତୀ ଚାନ୍ଦ ଅସୀଚାଳିକା ଭବାନୀ ଦେବୀ ଓ ଅଚ୍ୟୁତ ସାମନ୍ତଙ୍କ ସହ ରାତ୍ରୀ ଭୋଜନରେ ଯୋଗ ଦେଇଥିଲେ। ସେହି ସମୟର ଫଟୋ ସେ ସୋସିଆଲ ମିଡ଼ିଆରେ ଅପଲୋଡ଼ କରି ଭାବିନା ଦେବୀ ଓ କିସ ଓ କିଟର ପ୍ରତିଷ୍ଠାତା ସାଂସଦ (କନ୍ଧମାଳ) ମୋ ବାପା ଅଚ୍ୟୁତ ସାମନ୍ତ ବୋଲି କ୍ୟାପସନରେ ଉଲ୍ଲେଖ କରିଥିଲେ। ତାପରେ ଭଉଣୀ ସରସ୍ୱତୀ ଚାନ୍ଦଙ୍କ ଏପରି ପ୍ରତିକ୍ରିୟା ସାମ୍ନାକୁ ଆସିଛି।