ଦୁର୍ନୀତିଖୋର ସରକାରୀ ଅଧିକାରୀଙ୍କ ଘରେ ଭିଜିଲାନ୍ସର ରେଡ଼; ରୋଜଗାରର ୫୦% ଅଧିକ କରିଛନ୍ତି ଆୟ

News18 Odia Digital

କଟକ: ଦୁର୍ନୀତିଖୋର ସରକାରୀ ଅଧିକାରୀଙ୍କ ଉପରେ ଭିଜିଲାନ୍ସର କାର୍ଯ୍ୟାନୁଷ୍ଠାନ ଜାରି ରହିଛି । ଏହି କ୍ରମରେ ଗୁରୁବାର ଦିନ ଭିଜିଲାନ୍ସ ଜାଲରେ ପଡ଼ିଥିଲେ ବାଲେଶ୍ବର ଜିଲ୍ଲା ସୋରରେ ଥିବା ଆର.ଡବ୍ଲ ଡିଭିଜନର ସହକାରୀ ଯନ୍ତ୍ରୀ ପ୍ରମୋଦ ବେହୁରିଆ । ରେଡ଼ ସମୟରେ ପ୍ରମୋଦ ଓ ତାଙ୍କ ପରିବାର ଲୋକଙ୍କ ନାଁରେ ଥିବା ଦୁଇ କୋଟି ୬୧ ଲକ୍ଷ ଟଙ୍କାର ସମ୍ପତ୍ତି ଠାବ କରିଛି ଭିଜିଲାନ୍ସ ।

ଏହା ସହିତ ପ୍ରମୋଦ ଓ ତାଙ୍କର ପରିବାର ଲୋକଙ୍କ ନାଁରେ ୧୬ଟି ବହୁ ମୂଲ୍ୟ ଜମି ମଧ୍ୟ ଠାବ କରିଛି ଭିଜିଲାନ୍ସ ବିଭାଗ । ସେହି ଜମି ମଧ୍ୟରୁ ତିନିଟି ଜମି ଭୁବନେଶ୍ବରରେ ଥିବା ବେଳେ ବାକି ୧୩ଟି ଭଦ୍ରକର ବିଭିନ୍ନ ଅଞ୍ଚଳରେ ରହିଛି । ଏହି ଜମି ଗୁଡ଼ିକର ସେଲ୍ ଡିଡକୁ ଯାଞ୍ଚ କରିବା ପରେ ଏଗୁଡ଼ିକୁ ଏକ କୋଟି ୪ ଲକ୍ଷ ଟଙ୍କାରେ କିଣାଯାଇଥିବା ଜଣା ପଡ଼ିଛି । କିନ୍ତୁ ଏହି ଜମିଗୁଡ଼ିକୁ ବହୁ ଟଙ୍କା ଦେଇ କିଣାଯାଇଛି କିନ୍ତୁ କାଗଜ ପତ୍ରରେ ଏହି  ଜମିଗୁଡ଼ିକର ମୂଲ୍ୟକୁ ବହୁତ କମ ଦର୍ଶାଇ କିଣାଯାଇଥିବା ଭିଜିଲାନ୍ସ ବିଭାଗ ସନ୍ଦେହ କରୁଛି । ଫଳ ସ୍ବରୂପ ଭିଜିଲାନ୍ସ ବିଭାଗର ବୈଷୟିକ ଟିମ୍ ଜମି କିଣା ସମୟରେ ଅଧିକ ଜାଞ୍ଚ ଆରମ୍ଭ କରିଛି ।



ସେପଟେ ଗତକାଲି ଭିଜିଲାନ୍ସ ଜାଲରେ ପଡ଼ିଥିବା କଟକ ଗଣ୍ଡରପୁରସ୍ଥିତ ଡ୍ରେନେଜ ଡିଭିଜନର ନିର୍ବାହୀ ଯନ୍ତ୍ରୀ ମନୋଜ ବେହେରାଙ୍କୁ ବିଭାଗ ଗୁରୁବାର ଦିନ ଗରିଫ କରି କୋର୍ଟ ଚାଲାଣ କରିଛି । ରେଡ ପରେ କରାଯାଇଥିବା ତଦନ୍ତରୁ ମନୋଜ ୪ କେଟି ୨୬ ଲକ୍ଷ ୪୫ ହଜାର ଟଙ୍କାର ଆୟବର୍ହିଭୁତ ସମ୍ପତି ଠୁଳ କରିଥିବା ନେଇ ପ୍ରମାଣ ପାଇବା ପରେ ତାଙ୍କ ବିରୋଧରେ ବିଭାଗ ଏହି କାର୍ଯ୍ୟାନୁଷ୍ଠାନ ଗ୍ରହଣ କରିଛି ।

ରେଡ ସମୟରେ ମନୋଜଙ୍କ ପାଖରୁ ନଗଦ ୬ ଲକ୍ଷ ୧୭  ହଜାର ଟଙ୍କା ଜବତ ହୋଇଥିଲା । ସେଥିମଧ୍ୟରୁ ଅଧାରୁ ଅଧିକ ଟଙ୍କାକୁ କଟକ ଓ ଭୁବନେଶ୍ବରର ଦୁଇଟି ବ୍ୟାଙ୍କରେ ଥିବା ମନୋଜଙ୍କ ନାଁରେ ଥିବା ଦୁଇଟି ଲକରରୁ ଜବତ ହୋଇଥିବା ବେଳେ ତାଙ୍କ ଘରେ ଥିବା ଫ୍ରିଜ୍ ଭିତରୁ ୭୫ ହଜାର ୫୦୦ ଟଙ୍କା ଜବତ କରିଥିଲା ଭିଜିଲାନ୍ସ । ଏହା ବ୍ୟତୀତ ତାଙ୍କ ପାଖରୁ ଦେଢ଼ କେଜି ଓଜନର ସୁନା ଅଳଙ୍କାର ମଧ୍ୟ ଜବତ କରିଛି ଭିଜିଲାନ୍ସ ।