"ରାଗ ସମ୍ଭାଳି ପାରିଲିନି ମାରିଦେଲି", ପ୍ରେମିକାକୁ ହତ୍ୟା କରିଥିବାର ମାନିଲା ପ୍ରେମିକ

ପ୍ରଥମେ ଯୁବତୀଙ୍କୁ ପ୍ରେମଜାଲରେ ଫସାଇ ବିବାହ କରିବା ପରେ ପ୍ରତାରଣା କରି ବିଭିନ୍ନ ସ୍ଥାନରେ ଧରି ବୁଲିବା ପରେ ହତ୍ୟା କରିଥିଲା ପ୍ରେମିକ । ଏଭଳି ଅଭାବନୀୟ ଘଟଣା ଘଟିଛି କେନ୍ଦୁଝର ଜିଲ୍ଲା ବାଂଶପାଳ ବ୍ଲକ ନୟାକୋଟ ଥାନା ଅଞ୍ଚଳରେ ।

ରାଗ ସମ୍ଭାଳି ନପାରି ପ୍ରେମିକାକୁ ହତ୍ୟା କଲା ଯୁବକ (ପ୍ରତୀକାତ୍ମକ ଛବି)

ରାଗ ସମ୍ଭାଳି ନପାରି ପ୍ରେମିକାକୁ ହତ୍ୟା କଲା ଯୁବକ (ପ୍ରତୀକାତ୍ମକ ଛବି)

  • Share this:
News18 Odia Digital

କେନ୍ଦୁଝର: ପ୍ରଥମେ ପ୍ରେମ ତାପରେ ପ୍ରତାରଣା ଆଉ ଶେଷରେ ହତ୍ୟା। ପ୍ରଥମେ ଯୁବତୀଙ୍କୁ ପ୍ରେମଜାଲରେ ଫସାଇ ବିବାହ କରିବା ପରେ ପ୍ରତାରଣା କରି ବିଭିନ୍ନ ସ୍ଥାନରେ ଧରି ବୁଲିବା ପରେ ହତ୍ୟା କରିଥିଲା ପ୍ରେମିକ । ନିଖୋଜ ହେବାର ଦୀର୍ଘ ୧ବର୍ଷ ପରେ ଟାଉନ ଥାନା ଜୁଡିଆ ଘାଟି ନିକଟ ପାହାଡ ଉପରୁ ମୃତ ଯୁବତୀଙ୍କର ହାଡ, ଚୁଡ଼ି ଆଦି ଠାବ କରିଛି ପୋଲିସ୍ । ଏଭଳି ଅଭାବନୀୟ ଘଟଣା ଘଟିଛି କେନ୍ଦୁଝର ଜିଲ୍ଲା ବାଂଶପାଳ ବ୍ଲକ ନୟାକୋଟ ଥାନା ଅଞ୍ଚଳରେ ।

ଉପର କାଦକଳା ଗାଁର ଚକ୍ରଧର ଘଣା, ନୟାକୋଟ ଗାଁର ନବାତ ଡାଙ୍ଗୁଆଙ୍କୁ ପ୍ରେମ ଜାଲରେ ଫସାଇଥିଲେ । ଉଭୟ ପୁଅ ଓ ଝିଅ ଭିନ୍ନ ଜାତି ହୋଇଥିବାରୁ ଚକ୍ରଧରଙ୍କ ଘରେ ବିବାହ କରିବାକୁ ରାଜି ହୋଇ ନଥିଲେ । ଏଥିପାଇଁ ଦୁହେଁ ଘର ଛାଡି ପଳାଇ ଥିଲେ । ପ୍ରଥମେ କଟକ, ପରେ ମୟୁରଭଞ୍ଜ ଜିଲ୍ଲା ଯଶିପୁର ଅଞ୍ଚଳରେ ରହିଥିଲେ ।  ନବାତଙ୍କ ପରିବାର ଲୋକେ ସେମାନଙ୍କ ସହ ସେତେବେଳେ ଯୋଗାଯୋଗରେ ଥିଲେ । ଚକ୍ରଧର ଓ ନବାତ କିଛି ଦିନ ନବାତଙ୍କ ବଡ ଭଉଣୀଙ୍କ ଘରେ ମଧ୍ୟ ରହିଥିଲେ ।

ଜୁଲାଇ ମାସରେ ଘଟଣା କିଛି ଅଲଗା ମୋଡ଼ ନେଇଥିଲା। ଜୁଲାଇ ମାସରେ ଚକ୍ରଧର ଅନ୍ୟଜଣେ ଯୁବତୀଙ୍କୁ ବିବାହ କରିବା ପରେ ନବାତଙ୍କ ପରିବାର ଲୋକଙ୍କ ମନରେ ସନ୍ଦେହ ଜାତ ହେଲା । ଝିଅ କେଉଁଠି ବୋଲି ପଚାରିବାରୁ ଚକ୍ରଧରଙ୍କଠାରୁ କୌଣସି ସନ୍ତୋଷଜନକ ଉତ୍ତର ମିଳି ନଥିଲା । ମନରେ ସନ୍ଦେହ ଜାତ ହେବାରୁ ଥାନାର ଦ୍ବାରସ୍ଥ ହୋଇଥିଲେ ନବାତଙ୍କ ପରିବାର । କିଛି ଦିନ ଧରି ଥାନାରେ ଚକ୍ରଧରଙ୍କୁ ପଚରା ଉଚୁରା କରିବା ପରେ ନବାତଙ୍କ ହାଡ, ଚୁଡ଼ି ଆଦି ଟାଉନ୍ ଥାନା ଜୁଡିଆ ଘାଟି ପାହାଡ ଉପରୁ ପୋଲିସ୍ ଉଦ୍ଧାର କରିବାରେ ସକ୍ଷମ ହୋଇଥିଲା । ନବାତଙ୍କ ସହ ଝଗଡା ହେବା ପରେ ଏଠାରେ ନବାତଙ୍କୁ ତଣ୍ଟିଚିପି ହତ୍ୟା କରିଥିବା ମାନିଛି ଅଭିଯୁକ୍ତ ଚକ୍ରଧର ।

‘‘୨୦୧୯ ମହିହା ଅଗଷ୍ଟ ମାସରୁ ଆମ ଭଉଣୀକୁ ପ୍ରେମଜାଲରେ ଫସାଇ ଚକ୍ରଧର ନେଇ ଯାଇଥିଲା । ଏହାପରେ ବର୍ଷେ ହେବ ସେମାନେ ସ୍ବାମୀ-ସ୍ତ୍ରୀ ଭାବେ ଏଠି ୨ ମାସ, ସେଠି ୨ ମାସ କଟାଇଲେ । ପ୍ରଥମେ ସେ ଆମ ଭଉଣୀକୁ ନେଇ କଟକରେ ରହିଲା । ସେଠାରେ ମାସେ ରହିବା ପରେ ମୟୁରଭଞ୍ଜ ଜିଲ୍ଲା ଯଶୀପୁରରେ ୮ ମାସ କଟାଇଲେ । ସେଠାରୁ ଆସି କେନ୍ଦୁଝର ନନ୍ଦପୁରଠାରେ ରହିଲେ । ତାପରେ ବର୍ଷେ ହେବ ଆମ ଝିଅ ନିଖୋଜ ହୋଇଗଲା । ଏହାପରେ ପିଲା ଆଉ ଜଣକୁ ବାହା ହେବା ପରେ ଆମ ଝିଅ କାହିଁ ବୋଲି ଆମେ ଖୋଳତାଡ ଆରମ୍ଭ କଲୁ । ତାପରେ ଆମେ ନୟାକୋଟ ଥାନାର ଦ୍ବାରସ୍ଥ ହେଲୁ । ଏବେ ଜୁଡିଆ ଘାଟିର ପାହାଡ ଉପରୁ ଆମ ଭଉଣୀର କିଛି ଅସ୍ତି ଓ ଚୁଡି ମିଳିଛି । ଏଭଳି ଜଘନ୍ୟ ଅପରାଧ ଘଟାଇଥିବା ଦୋଷୀକୁ ଫାସୀ ଦଣ୍ଡ ଦିଆଯାଉ," କହିଛନ୍ତି ନବାତ ଡାଙ୍ଗୁଆଙ୍କ ବଡଭାଇ ବସନ୍ତ କୁମାର ଡାଙ୍ଗୁଆ ।

‘‘ସେ ପିଲା ଆଉ ଗୋଟେ ଝିଅ ଦେଖିବା ପରେ ବାହା ହେଲା ଓ ମୋ ଭଉଣୀକୁ ମାରି ପୋତିଦେଲା । ୨ ବର୍ଷ ପୂର୍ବରୁ ମୋ ଭଉଣୀକୁ ନେଇ ଯାଇଥିଲା । ମୋ ଘରେ ସେମାନେ ଦେଢ ମାସ ରହିଲେ । ରଜ ପରେ ପରେ ସେ ଅନ୍ୟ ଜଣେ ଝିଅକୁ ବାହା ହେଲା । ସେ ବାହା ହେବା ପରେ ଆମ ଭଉଣୀ କାହିଁ ବୋଲି ତାକୁ ପଚାରିଲୁ । ସେ ଆମ ଭଉଣୀକୁ ଦେଖିନାହିଁ କି ସେସମ୍ପର୍କରେ କିଛି ଜାଣିନାହିଁ ବୋଲି କହିବା ପରେ ଆମେ ଥାନାରେ ଅଭିଯୋଗ କଲୁ । ଏହାପରେ ସେ ଭଉଣୀର ହାଡ ବାହାର କରିବ ବୋଲି କହିଲା । ଆମେ ଚାହୁଁ, ଆମ ଭଉଣୀକୁ ଯିଏ ମାରିଛି, ତାକୁ ଫାଶୀ ଦଣ୍ଡ ହେଉ,’’ କହିଛନ୍ତି ମୃତ ନବାତ ଡାଙ୍ଗୁଆଙ୍କ ଭଉଣୀ ବାସନ୍ତୀ ପ୍ରଧାନ।

"ଭଲ ପାଇଥିଲୁ । ଆମର ଝଗଡା ହେଇଥିଲା । ମୁଁ ରାଗ ସମ୍ଭାଳି ନପାରି ତାର ତଣ୍ଟି ଚିପି ମାରିଦେଲି," କହିଛି ଅଭିଯୁକ୍ତ ଚକ୍ରଧର ଘଣା ।
Published by:Soumya Das
First published: