ଆଦିବାସୀବହୁଳ ଏକ ଗାଁ ଯେଉଁଠି ମଦ୍ୟପାନ ସମ୍ପୂର୍ଣ୍ଣଭାବେ ନିଷିଦ୍ଧ; ପିଇଲେ ଜୋରିମାନା ୫ ହଜାର ଟଙ୍କା

ରାୟଗଡ଼ା: ଇଏ ଏମିତି ଗାଁ ଯେଉଁଠି ଜଣେ ବି ଲୋକ ମଦ ପିଅନ୍ତି ନାହିଁ । ବିଶ୍ୱାସ ନ ହେଲେ ବି ସତ । ଏମିତି ଅଭିନବ ସଂସ୍କାର ପାଇଁ ରାୟଗଡ଼ା ଜିଲ୍ଲାର ବାଇସିଂ ପଞ୍ଚାୟତର ଜୁରୁଡି ଗାଁ ଏବେ ଚର୍ଚ୍ଚାରେ ।

ଆଦିବାସୀବହୁଳ ଏହି ଗାଁରେ ମଦ୍ୟପାନ ସମ୍ପୂର୍ଣ୍ଣଭାବେ ନିଷିଦ୍ଧ । ମହିଳାମାନେ ଏ ଅଭିଜାନରେ ନେଇଛନ୍ତି ଗୁରୁତ୍ବପୂର୍ଣ୍ଣ ଭୂମିକା । ସର୍ବସମ୍ମତ୍ତି କ୍ରମେ ନିଷ୍ପତ୍ତି ହୋଇଛି ଯେ କେହି ଗ୍ରାମବାସୀ ମଦ ପିଉଥିବାର ଖବର ମିଳିଲେ ତାକୁ ୫ ହଜାର ଟଙ୍କା ଜୋରିମାନା ଦେବାକୁ ହେବ।

କିଛି ମାସ ପୂର୍ବରୁ ଦିନରେ ଗାଁର ଅଧିକାଂଶ ପୁରୁଷଲୋକ ମଦ ପିଇ ଘର ଭିତରେ ନହେଲେ ବାରଣ୍ଡାରେ ଗଡ଼ୁଥିବାର ଦେଖିବାକୁ ମିଳୁଥିଲା । ହେଲେ ଏବେ ଦିନ ଦିପହରେ ଗାଁ ପୁରୁଷଶୂନ୍ୟ ଲାଗୁଛି। ସମସ୍ତେ କ୍ଷେତରେ ବା ଗାଁ ପାଖ ବଜାରରେ କାମରେ ଲାଗିପଡିଛନ୍ତି । ପୁରୁଷମାନେ ଆଉ ମଦ ନିଶାରେ ଘରେ ପଡ଼ି ରହୁନାହାନ୍ତି । ଏବେ ଆଉ ଗାଁରେ ଅଶାନ୍ତକର ପରିବେଶ ବି ନାହିଁ ।

ରାୟଗଡ଼ା ଜିଲ୍ଲା ସଦର ମହକୁମା ଠାରୁ ୭ କିଲୋମିଟର ଦୂରରେ ଅବସ୍ଥିତ ବାଇସିଂ ପଞ୍ଚାୟତର ଜୁରୁଡ଼ି ଗାଁ । ଗାଁରେ ୪୫ଟି ଘର ଓ ସେଥିରେ ରହନ୍ତି ୪୫ଟି ପରିବାର । ଆଗରୁ ପୁରୁଷମାନେ ମଦ୍ୟପାନ କରି ଦୈନିକ ହିଂସାତ୍ମକ ଘଟଣା ଘଟାଉଥିଲେ । ସ୍ତ୍ରୀଲୋକମାନଙ୍କୁ ପିଟାମରା ବି କରୁଥିଲେ ।



ମାତ୍ର ଗାଁର ମହିଳାମାନେ ଏକାଠି ହୋଇ ଏସବୁକୁ ବିରୋଧ କରିବା ଆରମ୍ଭ କଲେ । ସେମାନେ ଗାଁର ସବୁ ପୁରୁଷଲୋକଙ୍କୁ ରୋକଟୋକ୍‌ କହିଦେଲେ ଯେ ମଦ ପିଇ ପଇସା ଉଡ଼େଇବା ଓ ନିଜକୁ ଅକାମୀ କରି ରଖିବା ଆଉ ବରଦାସ୍ତ କରାଯିବ ନାହିଁ ।

ମହିଳାମାନେ ନିଷ୍ପତ୍ତି ନେଲେ ଯେ କେହି ଯଦି ମଦ ପିଉଛି ବୋଲି ଜଣା ପଡ଼଼େ ତାହେଲେ ତା’ ଠାରୁ ୫ ହଜାର ଟଙ୍କା ଜୋରିମାନା ଆଦାୟ କରାଯିବ । ପ୍ରଥମେ ପ୍ରଥମେ ଜୋରିମାନାକୁ ଭୟ କରି ପୁରୁଷଲୋକେ ମଦ ପିଇବା କମ୍‌ କରିଦେଲେ । ଏବେ ସମ୍ପୂର୍ଣ୍ଣ ବନ୍ଦ କରି ଦେଇଛନ୍ତି ।

‘‘ମଦ ବନ୍ଦ୍‌ ହେବା ଦିନରୁ ଗାଁକୁ ଶାନ୍ତିଶୃଙ୍ଖଳା ଫେରି ଆସିଛି । ପୁରୁଷଲୋକମାନେ କର୍ମଠ ହୋଇ ଉଠିଛନ୍ତି । ସେମାନେ ସାମୁହିକ ନିୟମ ମାନି ମଦ ପିଇବା ବନ୍ଦ୍‌ କରି ଦେଇଥିବାରୁ ଆମେ ସେମାନଙ୍କୁ ଧନ୍ୟବାଦ ଦେଉଛୁ,’’ କହିଛନ୍ତି ଗାଁର ଜଣେ ମହିଳା ହେନ୍ତା ତାଡ଼ିଙ୍ଗି ।

ବାହାଘର ଓ ଯାନିଯାତ୍ରାରେ ଆଦିବାସୀମାନେ ସାଧାରଣତଃ ପ୍ରଚୁ଼ର ପରିମାଣରେ ମଦ ବ୍ୟବହାର କରନ୍ତି । ଏପରିକି ବନ୍ଧୁ ପରିଜନଙ୍କ ଘରକୁ ଗଲେ ମଦକୁ ଉପହାର ସ୍ବରୂପ ନିଆଯାଏ । କିନ୍ତୁ ଆଦିବାସୀବହୁଳ ଜୁରୁଡ଼ି ଗାଁରେ ମଦ୍ୟପାନ ବନ୍ଦ ହେବା ଏକ ସ୍ବାଗତ ଯୋଗ୍ୟ ପଦକ୍ଷେପ ବୋଲି ବୁଦ୍ଧିଜୀବୀମାନେ କହିଛନ୍ତି।

ରାୟଗଡ଼ାର ଅବକାରୀ ଅଧିକ୍ଷକ ଦଣ୍ଡପାଣି ବେହେରା ଜୁରୁଡ଼ି ଗ୍ରାମବାସୀଙ୍କୁ ଧନ୍ୟବାଦ ଜଣାଇ କହିଛନ୍ତି ଯେ ଏହାର ପ୍ରଭାବ ଆଖପାଖ ଗାଁରେ ପଡ଼ିବ।