ବିଜୁଙ୍କ ସାହସିକତା ଉପରେ ବହିର ଉନ୍ମୋଚ଼ନ ସମାରୋହରେ ଏକାଠି ହେଲେ ତିନି ଦଳର ନେତା

ପ୍ରବାଦ ପୁରୁଷ ବିଜୁ ପଟ୍ଟନାୟକଙ୍କ ସାହସକିତାର କାହାଣୀ ବଖାଣୁଛି ଚ଼ିତ୍ରାଙ୍କନ ମାଧ୍ୟମରେ ସୁନ୍ଦର ଭାବେ ସଙ୍କଳିତ ବହି ‘ଦ ଆଡଭେଞ୍ଚର୍ସ ଅଫ ଦ ଡେୟାର ଡେଭିଲ୍ ଡେମୋକ୍ରାଟ’ । ଆଧୁନିକ ଓଡ଼ିଶାର ଗଠନରେ ବିଜୁ ବାବୁଙ୍କ ଅତୁଳନୀୟ ଭୂମିକା ଓ ତାଙ୍କ ଘଟଣାବହୁଳ ଜୀବନ ବିଷୟରେ ଏଥିରେ ରହିଛି ଅନେକ ତଥ୍ୟ ।

ବିଜୁଙ୍କ ସାହସିକତା ଉପରେ ବହିର ଉନ୍ମୋଚ଼ନ ସମାରୋହରେ ଏକାଠି ହେଲେ ତିନି ଦଳର ନେତା
ବିଜୁବାବୁଙ୍କ ଉପରେ ପ୍ରକାଶିତ ଚ଼ିତ୍ର ବହିର ଏକ ପୃଷ୍ଠା ଓ (ଡାହାଣ) ବହିଟିକୁ ପଢ଼ୁଛନ୍ତି ନବୀନ ପଟ୍ଟନାୟକ
  • Share this:
  • Byline Facebook
  • Byline Twitter
  • Byline Linkedin
News18 Odia Digital

ଭୁବନେଶ୍ବର: ପ୍ରବାଦ ପୁରୁଷ ତଥା ଓଡ଼ିଶାର ପୂର୍ବତନ ମୁଖ୍ୟ ମନ୍ତ୍ରୀ ବିଜୁ ପଟ୍ଟନାୟକଙ୍କ ପାଇଁ ଦଳଗତ ନିର୍ବିଶେଷରେ ଗୋଟିଏ ସ୍ଥାନରେ ଏକାଠି ହୋଇଥିଲେ ରାଜ୍ୟର ରାଜନେତାମାନେ । କେବଳ ବିଜୁଙ୍କ ଅନୁଗତ ନୁହେଁ, ବିଜୁଙ୍କ ତତ୍କାଳୀନ ବିରୋଧୀ ବି ଆଜି ଭୂରି ଭୂରି ପ୍ରଂଶସା କରିଥିଲେ ତାଙ୍କୁ । ଅବସର ଥିଲା ବିଜୁ ବାବୁଙ୍କ ଉପରେ ଆଧାରିତ ପୁସ୍ତକ ‘ଆଡଭେଞ୍ଚର୍ସ ଅଫ୍ ଦ ଡେୟାର ଡେଭିଲ୍ ଡେମୋକ୍ରାଟ୍’ର ଲୋକାର୍ପଣ ଉତ୍ସବ ।

କଳିଙ୍ଗ ଫାଉଣ୍ଡେସନ୍ ପକ୍ଷରୁ ଆୟୋଜିତ ପୁସ୍ତକ ଉନ୍ମୋଚ଼ନ ସମାରୋହରେ ସମସ୍ତେ ବିଜୁବାବୁଙ୍କ ଘଟଣାବହୁଳ ମହାନ ଜୀବନରୁ ତାଙ୍କର ସାହସ ଓ ସ୍ନେହର ପରିଚ଼ାୟକ ଅନେକ ଦୃଷ୍ଟାନ୍ତ ବଖାଣିଥିଲେ । ‘ଦ ଆଡଭେଞ୍ଚର୍ସ ଅଫ୍ ଦ ଡେୟାର ଡେଭିଲ୍ ଡେମୋକ୍ରାଟ୍’ ବହିଟିକୁ ପ୍ରକାଶ କରିଛି କଳିଙ୍ଗ ଫାଉଣ୍ଡେସନ୍ ଟ୍ରଷ୍ଟ  । ‘ଝଡର ଇଗଲ୍’ ଉପନାମରେ ପ୍ରସିଦ୍ଧ ବିଜୁ ବାବୁଙ୍କ ପାଇଁ ବହିର ଏ ଟାଇଟଲ୍ ସମସ୍ତଙ୍କୁ ଉପଯୁକ୍ତ ଲାଗିଥିଲା ।

ବିଜୁ ପଚ୍ଚନାୟକଙ୍କ ନାଆଁ ସହିତ ‘ବୀର ପୁରୁଷ’, ‘ଟଲ୍ ମ୍ୟାନ୍’, ‘ଇଣ୍ଡୋନେସିଆର ବରପୁତ୍ର’ ଓ ଓଡ଼ିଶାର ପୂର୍ବତନ ମୁଖ୍ୟ ମନ୍ତ୍ରୀ ଆଦି ପୂର୍ବରୁ ଯୋଡ଼ି ରହିଛି । ଏବେ ଇଲଷ୍ଟ୍ରେସନ୍ (ଚ଼ିତ୍ରାଙ୍କନ) ମାଧ୍ୟମରେ ସୁନ୍ଦର ଭାବେ ସଙ୍କଳନ କରାଯାଇଥିବା ଏହି ପୁସ୍ତକ ଜରିଆରେ ଲୋକେ ଜାଣିବେ ତାଙ୍କ ସାହସିକତା ବିଷୟରେ ଆଉ କିଛି କଥା । ପୁସ୍ତକ ଉନ୍ମୋଚ଼ନ ଅବସରରେ ବିଜୁ ଅନୁଗତ ଓ ତତ୍କାଳୀନ ବିଜୁ ବିରୋଧୀ ସାମିଲ୍ ହୋଇ ବିଜୁ ବାବୁଙ୍କ ସ୍ମୃତି ଚ଼ାରଣ କରିବା ସହ ତାଙ୍କ ସାହସିକତାକୁ ପ୍ରଶଂସା କରିଥିଲେ । ବହିଟିକୁ ଉନ୍ମୋଚନ କରି ବିଜୁଙ୍କ ପୁତ୍ର ତଥା ବର୍ତ୍ତମାନର ମୁଖ୍ୟ ମନ୍ତ୍ରୀ ନବୀନ ପଟ୍ଟନାୟକ ସେହି ସାହାସୀ, ଯୋଦ୍ଧା ଓ ବିରଳ ବ୍ୟକ୍ତିତ୍ବଙ୍କ ସମ୍ପର୍କରେ ମଧ୍ୟ କହିଥିଲେ ।

ବହିଟିର ଉନ୍ମୋଚ଼ନ ସମାରୋହରେ ବିରୋଧୀ ଦଳ ନେତାମାନଙ୍କ ସହ ନବୀନ ପଟ୍ଟନାୟକ


ଏକଦା ବିଜୁ ବାବୁଙ୍କ ସାଙ୍ଗରେ ଥିବା ନରସିଂହ ମିଶ୍ର, ଯିଏ ଏବେ କଂଗ୍ରେସ ବିଧାୟକ ଦଳ ନେତା ଓ ନବୀନଙ୍କ ବିରୋଧୀ, କହିଥିଲେ ଯେ ବିଜୁ ବାବୁ ଥିଲେ ତାଙ୍କ ‘‘କ୍ୟାରିୟରର ଟର୍ଣ୍ଣିଂ ପଏଣ୍ଟ’’ । ବିଜେପି ନେତା କନକ ବର୍ଦ୍ଧନ ସିଂହଦେଓ କହିଥିଲେ ବିଜୁବାବୁ କେମିତି ଥରେ ତାଙ୍କୁ ‘‘ଜେଲରେ ପୂରାଇ ଅଚ଼ିହ୍ନା କନକକୁ ରାତାରାତି ପରିଚିତ କରାଇଥିଲେ ସାରା ଓଡ଼ିଶାରେ’’ ।

ଦ କ୍ରିଏଟିଭ୍ ୱାର୍କସପ୍ ପକ୍ଷରୁ କଳିଙ୍ଗ ଫାଉଣ୍ଡେସନ୍ ସହାୟତାରେ ଏହି କମିକ୍ ବହିଟି ଉନ୍ମୋଚ଼ିତ ହୋଇଥିଲା । ଚ଼ିତ୍ରାଙ୍କନ ମାଧ୍ୟମରେ ବିଜୁ ବାବୁଙ୍କ ସାହସିକତାର କାହାଣୀ ବଖାଣୁଥିବା ବହିଟି ହୋଇଛି ଆଧୁନିକ ଓଡ଼ିଶାର ଗଠନରେ ବିଜୁ ବାବୁଙ୍କ ଭୂମିକାକୁ ନେଇ ରେଭେନ୍ସା କଲେଜର ଯୁବକମାନଙ୍କ କଥୋପକଥନରୁ । ଦ୍ବିତୀୟ ଅଧ୍ୟାୟରେ ମହାତ୍ମା ଗାନ୍ଧିଙ୍କ ପ୍ରଥମ ଓଡ଼ିଶା ଗସ୍ତ ସମୟରେ ତାଙ୍କ ଦ୍ବାରା ଅନୁପ୍ରାଣିତ ବିଜୁଙ୍କ ସ୍ବାଧୀନତା ସଂଗ୍ରାମର କାହାଣୀ ଦର୍ଶାଯାଇଛି ।

ଆକାଶରେ ଉଡ଼ିବାକୁ ଭଲ ପାଉଥିବା ବିଜୁଙ୍କ ସର୍ଜିକାଲ ଷ୍ଟ୍ରାଇକ୍ ର କାହାଣୀ ତୃତୀୟ ଅଧ୍ୟାୟରେ ଓ ପରିଶେଷରେ ସୁପରହିରୋ ସାଜି ଇଣ୍ଡୋନେସିଆର ପ୍ରଧାନ ମନ୍ତ୍ରୀଙ୍କୁ ବଞ୍ଚାଇବାର କାହାଣୀ ରହିଛି । ଆଜିର ଯୁବ ପିଢ଼ି ବହିଟିକୁ ନେଇ ବେଶ୍ ଉତ୍ସାହ ପ୍ରକାଶ କରିଛନ୍ତି । ମାର୍ଚ୍ଚ ୫ରେ ବିଜୁ ବାବୁଙ୍କ ୧୦୪ତମ ଜୟନ୍ତୀ ପାଳନ ହୋଇଥିଲା ।
First published: March 6, 2020, 7:54 PM IST