ବିଂଝାରପୁର ଖରସ୍ରୋତା ମହାକାଳଗଣ୍ଡରେ ବୁଡ଼ିଗଲେ ଯୁବକ ; ଉଦ୍ଧାର ପାଇଁ ନଦୀରେ ପଇଁତରା ମାରୁଛି ଦମକଳ

News 18 Odia Digital

ଯାଜପୁର: ବିଂଝାରପୁର ବ୍ଲକ ବାଙ୍କିପାଳ ଗ୍ରାମ ନିକଟ ଖରସ୍ରୋତା ନଦୀର ମହାକାଳ ଗଣ୍ଡରେ ଜଣେ ଯୁବକ ଭାସିଯାଇଛନ୍ତି । ଗାଧୋଇବାକୁ ଯାଇ ଯୁବକ ଜଣଙ୍କ ବୁଡ଼ିଯାଇଥିବା ଖବର ମିଳିଛି । ଯୁବକ ଜଣଙ୍କ ସ୍ଥାନିୟ ସୟଦପୁର ଅଞ୍ଚଳର ବାପି ଦାସ (୨୪) ବୋଲି ଜଣାପଡ଼ିଛି । ଯୁବକ ଜଣକ ନଦୀରେ ବୁଡ଼ିଯିବାର ଖବର ପାଇ ସୟଦପୁର ସ୍ଥିତ ଦମକଳ କେଦ୍ରର କର୍ମଚାରୀ ଘଟଣାସ୍ଥଳରେ ପହଞ୍ଚି ଖୋଜାଖୋଜି ଆରମ୍ଭ କରିଥିଲେ ମଧ୍ୟ ଏ ପର୍ଯ୍ୟନ୍ତ କୌଣସି ପତ୍ତା ମିଳିନାହିଁ ।



ଆଜି ମଧ୍ୟାହ୍ନରେ ବାପି ନିଜର କିଛି ବନ୍ଧୁଙ୍କ ସହ ନଦୀକୁ ଗାଧୋଇବାକୁ ଯାଇଥିବା ସମୟରେ ସ୍ରୋତ ମଧ୍ୟକୁ ଗୋଡ଼ ଖସିଯାଇଥିଲା । ଫଳରେ ତାଙ୍କୁ ଉଦ୍ଧାର କରିବା ସମ୍ଭବ ହୋଇପାରିନଥିଲା । କ୍ଷଣକରେ ସ୍ଥାନିୟ ଅଞ୍ଚଳରେ ଖବର ପହଞ୍ଚିବା ପରେ ଘଟଣାସ୍ଥଳରେ ଶହ ଶହ ଲୋକ ରୁଣ୍ଡ ହୋଇଛନ୍ତି । ବାପିଙ୍କୁ ଉଦ୍ଧାର କରିବା ପାଇଁ ଦମକଳ କର୍ମଚାରୀଙ୍କୁ ମଧ୍ୟ ସ୍ଥାନିୟବାସୀ ସହଯୋଗ କରୁଛନ୍ତି ।​ ଘଟଣା ପ୍ରଚାର ହେବାପରେ ସ୍ଥାନିୟ ଅଞ୍ଚଳରେ ଆଲୋଡ଼ନ ଖେଳିଯାଇଛି ।