ଝରାଫୁଲ ମୃତ୍ୟୁ: ମିଳିଲା ଶବ ବୁହାହୋଇଥିବା ସ୍କୁଟି; ରାକେଶର ମିଛଧରା ପରୀକ୍ଷା ହୋଇପାରେ

News18 Odia Digital

ଭୁବନେଶ୍ୱର: ରମାଦେବୀ ମହିଳା ବିଶ୍ୱବିଦ୍ୟାଳୟର ବି.ଏ. ଛାତ୍ରୀ ଝରାଫୁଲ ନାୟକଙ୍କ ରହସ୍ୟମୟ ମୃତ୍ୟୁ ମାମଲାରେ ଏ ପର୍ଯ୍ୟନ୍ତ ଯାଜପୁର ପୋଲିସର ତଦନ୍ତ ନୈରାଶ୍ୟଜନକ ରହିଥିବା ବେଳେ ଗୁରୁବାର ଦିନ ସେମାନଙ୍କ ପ୍ରୟାସକୁ ପାଦେ ସଫଳତା ମିଳିଛି । ଝରାଫୁଲଙ୍କ ଶବକୁ ଭୁବନେଶ୍ୱରରୁ ଯାଜପୁର କୁଆଖିଆ ନେବାରେ ବ୍ୟବହୃତ ହୋଇଥିବା ନାଲି ରଙ୍ଗର ସ୍କୁଟି ଉଦ୍ଧାର ହୋଇଛି ।

ସେହି ସ୍କୁଟିଟିକୁ ଭୁବନେଶ୍ବରର ସୁନ୍ଦରପଦାରୁ ଜବତ କରିଛି ଯାଜପୁର ପୋଲିସ (Jharaphula death) । ଜାନୁଆରୀ ୨୬ ଓ ୨୭ ତାରିଖରେ ଝରାଫୁଲଙ୍କୁ ନେବା ଆଣିବାର ଅନେକ ଦୃଶ୍ୟ CCTV କ୍ୟାମେରାରେ କଏଦ ହୋଇଥିଲା ଓ ପୋଲିସର ହସ୍ତଗତ ହୋଇଥିଲା । ସବୁଥିରେ ଦିଶୁଥିଲା ଏହି ନାଲି ରଙ୍ଗର ହୀରୋ ଡେଷ୍ଟିନି ସ୍କୁଟି (ରେଜିଷ୍ଟ୍ରେଶନ୍‌ ନମ୍ବର୍‌ OD 02B P7885) । ଏଥିରେ ଝରାଫୁଲଙ୍କ ଶବକୁ ଜାନୁଆରୀ ୨୭ ତାରିଖ ସକାଳେ ଯାଜପୁର କୁଆଖିଆ ନେଇ ସେଠାରେ ଏକ ରାସ୍ତା କଡ଼ରେ ଫିଙ୍ଗିଥିଲେ ତାଙ୍କ ପୁରୁଷ ବନ୍ଧୁ ରାକେଶ ସ୍ୱାଇଁ ଓ ତାଙ୍କର ଜଣେ ସହଯୋଗୀ ।

ଏହା ବି ପଢ଼ନ୍ତୁ ଓ ଦେଖନ୍ତୁ VIDEO | ଭୋକିଲା ବାଘ ପର୍ଯ୍ୟଟକମାନଙ୍କ କାର୍‌କୁ ପଛରୁ ଟାଣିଲା; ଲୋକେ ଭୟରେ ଥରିଲେ; ଦେଖନ୍ତୁ VIDEO

ବୁଧବାର ବିଳମ୍ବିତ ରାତିରେ ଅପରାଧରେ ବ୍ୟବହୃତ ଏହି ସ୍କୁଟିକୁ ଜବତ କରିଥିଲା ପୋଲିସ । ଏଥି ସହିତ ରାକେଶର ଜଣେ ଭାଇ ଓ ଅନ୍ୟ ଜଣେ ସମ୍ପର୍କୀୟ ଭାଇକୁ କୁଆଖିଆ ଥାନାରେ ପଚରାଉଚରା ଜାରି ରଖିଛି ପୋଲିସ । ହେଲେ ଏ ପର୍ଯ୍ୟନ୍ତ ରାକେଶର ସେହି ଫେରାର୍‌ ଥିବା ସହଯୋଗୀ ଯୁବକର ପତ୍ତା ନ ମିଳିବା ପୋଲିସର ତଦନ୍ତରେ ନିଷ୍ଠା ଉପରେ ପ୍ରଶ୍ନ ଚିହ୍ନ ଠିଆ କରାଇଛି ।



ଯାଜପୁର ପୋଲିସ ସୂତ୍ରରୁ ପ୍ରାପ୍ତ ସୂଚନା ଅନୁସାରେ ଏ ପର୍ଯ୍ୟନ୍ତ ମୁଖ୍ୟ ଅଭିଯୁକ୍ତ ରାକେଶ ସ୍ୱାଇଁଙ୍କ କଥାକୁ କାଟିବା ପାଇଁ ତଦନ୍ତକାରୀ ପୋଲିସ୍‌ ଟିମ୍‌ ପାଖରେ କୌଣସି ପ୍ରମାଣ ବା ବଳିଷ୍ଠ ଯୁକ୍ତି ନାହିଁ । ପୋଲିସ ସହ ପଚରା ଉଚରାରେ ରାକେଶ କହିଛି ଯେ ଝରାଫୁଲଙ୍କ ଦେହ ଭଲ ନ ଥିଲା ଓ ତାଙ୍କ ପେଟ ଖରାପ ଥିବାରୁ ବାନ୍ତି ହେଉଥିଲା । ସେ ଓ ଝରାଫୁଲ ଜାନୁଆରୀ ୨୬ ତାରିଖ ରାତିରେ ଧର୍ମବିହାରରେ ଥିବା ଏକ ଗେଷ୍ଟ ହାଉସର ଏକ କୋଠରୀରେ ସାଙ୍ଗରେ ରାତ୍ରିଯାପନ କରିବା ବେଳେ କେତେବେଳଏ ରାତିରେ ଝରାଫୁଲଙ୍କ ମୃତ୍ୟୁ ହୋଇଯାଇଥିଲା ।

ଏହା ବି ପଢ଼ନ୍ତୁ ଓ ଦେଖନ୍ତୁ VIDEO | ସୋସିଆଲ୍ ମିଡ଼ିଆର ବନ୍ଧୁ ଯୁବତୀଙ୍କୁ ତାଙ୍କ କୁନି ଝିଅ ସାମନାରେ ହତ୍ୟା କଲା; ସାମନାକୁ ଆସିଲା CCTV VIDEO

ଝରାଫୁଲଙ୍କ ମୃତ୍ୟୁ କେମିତି ହେଲା ତାହା ରାକେଶ ଜାଣି ନ ଥିବା ପୋଲିସକୁ କହିଛି । ତେଣୁ ଏ ପର୍ଯ୍ୟନ୍ତ ଝରାଫୁଲକୁ ସେ ବା ଅନ୍ୟ କେହି ହତ୍ୟା କରିଥିବାର କୌଣସି ପ୍ରମାଣ ପୋଲିସ ପାଖରେ ନାହିଁ ବୋଲି କହିଛନ୍ତି ତଦନ୍ତକାରୀ ଦଳର ଜଣେ ଅଧିକାରୀ । ହେଲେ ଝରାଫୁଲଙ୍କ ପୋଷ୍ଟ ମର୍ଟମ୍‌ ରିପୋର୍ଟ ଓ ତାଙ୍କ ଭିସେରା ପରୀକ୍ଷାରୁ ଗୁରୁତ୍ୱପୂର୍ଣ୍ଣ ତଥ୍ୟ ମିଳିବା ଆଶା କରାଯାଉଥିବା ବେଳେ ରାକେଶ ସ୍ୱାଇଁଙ୍କ ଲାଇ-ଡିଟେକ୍ସନ୍‌ ଟେଷ୍ଟ୍‌ (ମିଛ ଧରା ପରୀକ୍ଷା) ଉପରେ ପୋଲିସର ତଦନ୍ତ ବହୁ ମାତ୍ରାରେ ନିର୍ଭର କରୁଛି ।



ଏହା ବି ପଢ଼ନ୍ତୁ ଓ ଦେଖନ୍ତୁ ଫଟୋ | ପାଦରେ କଳା ସୂତା ପିନ୍ଧୁଛନ୍ତି କି? ନିଜ ଅଜାଣତରେ ନିଜ ପାଇଁ ବିପଦ ଡାକି ଆଣୁନାହାନ୍ତି ତ?

‘‘ଖୁବ୍‌ ଶୀଘ୍ର ରାକେଶର ଲାଇ-ଡିଟେକ୍ସନ୍‌ ଟେଷ୍ଟ୍‌ କରାଯିବ । ସେ ଯାହା ଯାହା କହୁଛି ସେଥିରେ କେତେକ କଥା ମେଳଖାଉ ନାହିଁ । ତଦନ୍ତ ଆଗେଇ ଚାଲିଛି । ଜଲଦି ଝରାଫୁଲଙ୍କ ମୃତ୍ୟୁର ପ୍ରକୃତ କାରଣ ସାମନାକୁ ଆସିବ,’’ କହିଛନ୍ତି ଜଣେ ପୋଲିସ ଅଧିକାରୀ ।



ଏହି ବହୁଚର୍ଚ୍ଚିତ ରହସ୍ୟମୟ ମୃତ୍ୟୁ ଘଟଣାର ମୁଖ୍ୟ ଅଭିଯୁକ୍ତ ରାକେଶ ସ୍ୱାଇଁର ରିମାଣ୍ଡର ଶେଷ ଦିନ ଥିଲା ଗୁରୁବାର । କୁଆଖିଆ ଥାନାରେ ଅଧିକ ସୂଚନା ପାଇଁ ତା’ ସହ ପଚରାଉଚରା ଜାରି ରଖିଥିଲା ପୋଲିସ, ହେଲେ କୌଣସି ନୂଆ ତଥ୍ୟ ବା ନୂଆ ଦିଗ ସାମନାକୁ ଆସି ନ ଥିଲା ।