ହୋମ୍ » ଓଡ଼ିଶା ନ୍ୟୁଜ୍ » ଓଡ଼ିଶା»ପୁରୀରେ ଅବସରପ୍ରାପ୍ତ ଯବାନଙ୍କ ୧୫ ବର୍ଷରେ ତିଆରି ଜଙ୍ଗଲ ପାଲଟିଛି ବେଳାଭୂମିର ରକ୍ଷା କବଚ

ପୁରୀରେ ଅବସରପ୍ରାପ୍ତ ଯବାନଙ୍କ ୧୫ ବର୍ଷରେ ତିଆରି ଜଙ୍ଗଲ ପାଲଟିଛି ବେଳାଭୂମିର ରକ୍ଷା କବଚ

ଯୁବାବସ୍ଥାରେ ଭାରତୀୟ ସେନାରେ ରହି ଦେଶ ସେବାରେ ଜୀବନକୁ ବାଜି ଲଗାଇଥିବା କୃଷ୍ଣ ରଞ୍ଜନ ବିଶ୍ୱାଳ ଅବସର ପରେ ୫୦,୦୦୦ ଗଛ ଲଗେଇ ବେଳାଭୂମି ଓ ଉପକୁଳ ଗ୍ରାମର ସୁରକ୍ଷା ସୁନିଶ୍ଚିତ କରିଛନ୍ତି । ସମସ୍ତଙ୍କ ପାଇଁ ସେ ପ୍ରେରଣାର ଉତ୍ସ ପାଲଟିଛନ୍ତି ।

ପୁରୀରେ ଅବସରପ୍ରାପ୍ତ ଯବାନଙ୍କ ୧୫ ବର୍ଷରେ ତିଆରି ଜଙ୍ଗଲ ପାଲଟିଛି ବେଳାଭୂମିର ରକ୍ଷା କବଚ
୧୫ ବର୍ଷର ଶ୍ରମ ଦ୍ୱାରା ନିଜ ହାତରେ ଗଢ଼ିଥିବା ଜଙ୍ଗଲରେ କୃଷ୍ଣ ରଞ୍ଜନ ବିଶ୍ୱାଳ
  • News18 Odia
  • Last Updated: August 7, 2020, 11:57 PM IST
  • Share this:
  • Byline Facebook
  • Byline Twitter
  • Byline Linkedin
News18 Odia Digital

ପୁରୀ: ଗତ ବର୍ଷ ମେ ୩ ତାରିଖରେ ଆସିଥିବା ଫନୀ ବାତ୍ୟା ଓଡ଼ିଶାର ଉପକୂଳବର୍ତ୍ତୀ ଜିଲ୍ଲାମାନଙ୍କରେ ବହୁତ କ୍ଷୟକ୍ଷତି କରିଥିଲା । ହେଲେ ପୁରୀ ଜିଲ୍ଲା ଅସ୍ତରଙ୍ଗର ଗୁଣ୍ଡଳବା ଗାଁ ଠାରୁ ଆରମ୍ଭ କରି ଡାଳୁଆକାଣୀ ପର୍ଯ୍ୟନ୍ତ ପ୍ରାୟ ପାଞ୍ଚ କିଲୋମିଟର ପରିମିତ ବେଳାଭୂମିରେ ବୃକ୍ଷଲତା ଲଗାଯାଇଥିବାରୁ ଗାଁଗୁଡ଼ିକ ସୁରକ୍ଷିତ ରହିବା ସହ ବାଲିବନ୍ତ ବି କ୍ଷୟ ହୋଇ ନ ଥିଲା । ଏହି ବୃକ୍ଷଲତା ଜଣେ ଅବସରପ୍ରାପ୍ତ ଯବାନଙ୍କ ୧୫ ବର୍ଷର ଯତ୍ନ ଓ ପରିଶ୍ରମର ଫଳ ।

ଗୁଣ୍ଡଳବା ଗ୍ରାମର ୫୦-ବର୍ଷୀୟ କୃଷ୍ଣ ରଞ୍ଜନ ବିଶ୍ୱାଳ ଭାରତୀୟ ସେନାରୁ ଅବସର ନେବା ପରେ ଗାଁକୁ ଫେରିଆସିଥିଲେ । ଗାଁଟି ସମୁଦ୍ର କୂଳରେ ଥିବାରୁ କେତେବେଳେ ସମୁଦ୍ରର ଉଚ୍ଚ ଲହଡି ଗାଁକୁ ପଶିଯାଉଥିଲା ତ କେତେବେଳେ ଗାଁକୁ ରକ୍ଷା ପାଇଁ ଥିବା ବାଲିବନ୍ତ ମଧ୍ୟ କ୍ଷୟ ହେଇଯାଉଥିଲା  । କିଭଳି ଗାଁର ସୁରକ୍ଷା ସହ ବାଲିବନ୍ତର ରକ୍ଷା ହେବ ସେ ନେଇ ଚିନ୍ତା କରି ସେ ଆରମ୍ଭ କରିଥିଲେ ବୃକ୍ଷରୋପଣ । ତାଙ୍କର ଏହି ବୃକ୍ଷରୋପଣ ଫନି ବାତ୍ୟାରେ ଗାଁକୁ ରକ୍ଷାକରିଥିଲା ଓ ବାଲୁକା କ୍ଷୟକୁ ବି ରୋକିଥିଲା ।

‘‘୧୯୯୯ ମହାବାତ୍ୟା ପରେ ମୁଁ ଛୁଟିରେ ଗାଁକୁ ଆସିଥିଲି । ମହାବାତ୍ୟାର ତାଣ୍ଡବରେ କ୍ଷୟକ୍ଷତି ଦେଖି ମୋ’ ଆଖିରେ ଲୁହ ଆସିଯାଇଥିଲା । ପୁରୀ ଜିଲ୍ଲାର ଉପକୁଳ ଅଞ୍ଚଳରେ ବ୍ୟାପକ ଧନଜୀବନ, ସମ୍ପତି, ପଶୁପକ୍ଷୀ ଓ ପରିବେଶ ନଷ୍ଟ ହୋଇଯାଇଥିଲା । ଅସ୍ତରଙ୍ଗ ବେଳାଭୂମିରୁ ଟନ ଟନ ବାଲି ଉଡ଼ିଆସି ଆମ ଗାଁକୁ ଚରିଯାଇଥିଲା । ତାହା ଦେଖି ମୁଁ ନିଷ୍ପତ୍ତି ନେଇଥିଲି କେଉଁ ଗଛ ଲଗାଇଲେ ଆମ ଗାଁ ସୁରକ୍ଷିତ ରହିବା ସହ ବାଲିବନ୍ତ କ୍ଷୟକୁ ବି ରୋକାଯାଇପାରିବ । ବନ ବିଭାଗର ଜଣେ ବିଶେଷଜ୍ଞଙ୍କ ପରାମର୍ଶ ନେଇ ବୃକ୍ଷରୋପଣ କରିବା ଆରମ୍ଭ କରିଥିଲି,’’ କହିଛନ୍ତି ବିଶ୍ୱାଳ ।

୧୯୯୯ ମହାବାତ୍ୟାରେ ହୋଇଥିବା ଭୟଙ୍କର କ୍ଷୟକ୍ଷତି ଦେଖିବା ପରେ କୃଷ୍ଣ ରଞ୍ଜନ ଜଙ୍ଗଲ ତିଆରିକରିବାକୁ ମନ କରିଥିଲେ ।


ନିଜ ପେନସନ ଟଙ୍କାରେ ସେ କିଣିଥିଲେ ୫୦,୦୦୦ ଚାରା । ସେଥିରେ  ତାଳ, ଜାମୁକୋଳି, ଆମ୍ବ ଓ ବିଭିନ୍ନ କୋଳି ଓ ଫଳ ଚାରା ସହ ଝାଉଁ ଗଛର ଚାରା ଥିଲା । ଅସ୍ତରଙ୍ଗର ଗୁଣ୍ଡଳବା ଗାଁ ଠାରୁ ଆରମ୍ଭ କରି ଡାଳୁଆକାଣୀର ଗୁମୁତି କେଶବ ମନ୍ଦିର ପର୍ଯ୍ୟନ୍ତ ପ୍ରାୟ ପାଞ୍ଚ କିଲୋମିଟର ଲମ୍ବା ବେଳାଭୂମିରେ ଚାରା ରୋପଣ କରିଥିଲେ । ନିଜେ ଗାତଖୋଳି ଚାରା ପୋତିବା ସହ ଗାଁମାନଙ୍କରୁ ଆଣିଥିବା ତାଳ ମଞ୍ଜିକୁ ମଧ୍ୟ ଗାତ ଖୋଳି ପୋତିଥିଲେ । ଦୁଇଟି ଟିଣକୁ ବାହାଙ୍ଗା କରି ସେଥିରେ ପାଣି ନେଇ ଗଛମୁଳରେ ଦେଉଥିଥିଲେ । କିଛି ଦିନ ପରେ ଗାଁର ଛୋଟ ପିଲାମାନେ ତାଙ୍କୁ ସହଯୋଗ କରିବା ଆରମ୍ଭ କରିଥିଲେ । ମୌସୁମୀ ବର୍ଷା ସମୟର ତିନି ମାସରେ ସେହି ୫୦,୦୦୦ ଚାରା ରୋପଣ କରିଥିଲେ ସେ ।

‘‘୧୯୯୯ ମହାବାତ୍ୟାର ଭୟଙ୍କର ଦୃଶ୍ୟ ଓ କ୍ଷୟକ୍ଷତି ଦେଖିଥିବା ଆମ ଆଖପାଖର ଗ୍ରାମବାସୀଙ୍କ ପାଇଁ ୨୦୧୯ ମେ’ରେ ଆସିଥିବା ବାତ୍ୟା ଫନି ଥିଲା ନିଆରା ଦୃଶ୍ୟ । ପ୍ରକୃତିର ତାଣ୍ଡବ ଲୀଳାକୁ ଏଠାରେ ସୃଷ୍ଟି ହୋଇଥିବା ଜଙ୍ଗଲ ବେଳାଭୂମିରେ ଓ ଗାଁଗୁଡ଼ିକରେ କ୍ଷୟକ୍ଷତି କରିବାକୁ ଦେଇ ନ ଥିଲା । ପବନରେ ସମୁଦ୍ରରୁ ଗାଁ ଆଡ଼କୁ ଉଡ଼ିଆସୁଥିବା ବାଲିକୁ ରୋକିଥିଲା ଏହି ନବନିର୍ମିତ ଜଙ୍ଗଲ,’’ ଖୁସିରେ କହିଛନ୍ତି ବିଶ୍ୱାଳ ।

ତେବେ ସବୁ ଠୁ ଦୁଃଖର କଥା ଯେ ବନ ବିଭାଗ ତାଙ୍କର ପଦକ୍ଷେପକୁ ନ ବୁଝିପାରି ଏଭଳି ବେଳାଭୂମିରେ ଗଛ ଲଗାଇବା ଦ୍ୱାରା କାଳେ ସେ ସରକାରୀ ଜମିକୁ ମାଡ଼ି ବସିବେ ବୋଲି ସନ୍ଦେହ କରିଥିଲା । ସେ ନେଇ କିଛି ଗଛ ମଧ୍ୟ କାଟିଦେଇଥିଲେ ବନ ବିଭାଗର କର୍ମଚାରୀମାନେ । ‘‘ତାହା ମୋତେ ଖୁବ୍‌ ଦୁଃଖ ଦେଇଥିଲା । ମୁଁ ଜଣେ ସଚେତନ ନାଗରିକ ଭାବେ ବୃକ୍ଷରୋପଣ ମୋ’ର କାର୍ଯ୍ୟ ବୋଲି କହିଥିଲି । ମୋର କୌଣସି ଅଧିକାର ସାବ୍ୟସ୍ତ କରିବା ଉଦ୍ଦେଶ୍ୟ ନ ଥିଲା । ମୁଁ ଲଗାଇଥିବା ଚାରା କେବଳ ମୋ’ର ନୁହେଁ । ପ୍ରକୃତିର ସୁରକ୍ଷା ହେଉଛି ଆଉ ଜାମୁ, ନିମ ଓ ଦେବଦାରୁ ଗଛର ଫଳ ଖାଇ ପକ୍ଷୀମାନେ ବି ଆନନ୍ଦିତ ହେଉଛନ୍ତି । ବନ ବିଭାଗ ଏକ ଭୁଲ ବୁଝାମଣାରୁ ଏଭଳି କରୁଥିବାରୁ ମୁଁ ତାଙ୍କୁ ବୁଝାଇବା ପରେ ସେମାନେ ବୁଝିଥିଲେ ଓ ଖୁସି ହୋଇଥିଲେ । ବଞ୍ଚିଯାଇଥିଲା ଆମର ଜଙ୍ଗଲ,’’ କହିଛନ୍ତି ବିଶ୍ୱାଳ ।

୨୦୦୫ ମସିହାରେ ନିଜ ପେନସନ ଟଙ୍କାରେ କୃଷ୍ଣ ରଞ୍ଜନ ବିଶ୍ୱାଳ କିଣିଥିଲେ ୫୦,୦୦୦ ଚାରା ।


ଅସ୍ତରଙ୍ଗ ଅଂଚଳର ଜଣେ ସ୍ଥାନୀୟ ପରିବେଶବିତ୍ ୬୦-ବର୍ଷୀୟ ସୌମ୍ୟରଞ୍ଜନ ବିଶ୍ୱାଳଙ୍କ କହିବା ଅନୁସାରେ ବିଶ୍ୱାଳ ନିଜ ରାଟାୟରମେଣ୍ଟ ପରେ ୨୦୦୫ରେ ପରିବେଶ ସୁରକ୍ଷା ଉପରେ କାର୍ଯ୍ୟ ଆରମ୍ଭ କଲେ । ‘‘ଆଜିକୁ ୧୫ ବର୍ଷ ତଳେ କୃଷ୍ଣ ଭାଇ ଗାଁରୁ ଗାଁ ବୁଲି ତାଳ ଚାରା ଓ ଅନ୍ୟ ଚାରା ସଂଗ୍ରହ କରିଥିଲେ । ସେ ଲୋକଙ୍କୁ ଟଙ୍କା ଦେଇ ମଞ୍ଜି ବି କିଣିଥିଲେ । ନିଜର ପେନସନ ଟଙ୍କାକୁ ବ୍ୟୟ କରି ସାଇକେଲରେ ବୁଲି ମଞ୍ଜି ସଂଗ୍ରହ କରି ଚାରା କରିଥିଲେ । ସବୁ ଠୁ ଗୁରୁତ୍ୱପୁର୍ଣ୍ଣ କଥା ହେଲା ଗଛକୁ ବଞ୍ଚାଇ ରଖିବା ପାଇଁ ସେ ଅନେକ ଯୁବକଙ୍କୁ ପରିବେଶ ଯୋଦ୍ଧା ଭାବେ ନିୟୋଜିତ କରି କାମରେ ଲଗାଇଲେ । ଡଜନ ଡଜନ ଆମ୍ବ ଗଛ ଲଗାଇଥିଲେ, ହେଲେ ସେଥିରୁ ଫନି ବାତ୍ୟା ପରେ ଦୁଇ ଡଜନ ଆଉ ବଞ୍ଚି ରହିଛି ।  କୃଷ୍ଣ ଭାଇଙ୍କ ପରିବେଶ ପାଇଁ କାର୍ଯ୍ୟ ବେଶ ପ୍ରଶଂସନୀୟ ।  ପରେ ସେ ସମୁଦ୍ର କୂଳର ୧୦୦ ମିଟର ଦୂରରେ ଚାରା ରୋପଣ କରି  ନିର୍ମାଣ କରିଛନ୍ତି ଏକ ଗ୍ରୀନ ଡ୍ୟାମ,’’ କହିଛନ୍ତି ସୌମ୍ୟ ରଞ୍ଜନ ବିଶ୍ୱାଳ ।

ଏହା ବି ପଢ଼ନ୍ତୁ | ସୁଶାନ୍ତ ସିଂ ମୃତ୍ୟୁ: ତାଙ୍କ ଗର୍ଲଫ୍ରେଣ୍ଡ୍ ରିୟା ଚକ୍ରବର୍ତ୍ତୀଙ୍କୁ ୮ ଘଣ୍ଟା ଜେରା କଲା ED

ଏହା ବି ପଢ଼ନ୍ତୁ | ଅଯୋଧ୍ୟା ରାମ ମନ୍ଦିରରେ ରାମଙ୍କ ମୂର୍ତ୍ତିରେ ନିଶ ରହିବ? ଏକ ନୂଆ ବିବାଦ ଆରମ୍ଭ ହେଲା

‘‘ଯିଏ ପ୍ରକୃତି ପ୍ରେମୀ ସେ ସବୁ ବେଳେ ପରିବେଶ ରକ୍ଷା ଓ ସୁରକ୍ଷା ପଛରେ ପଡ଼ିଥାଏ  । ଏହାର ଜ୍ୱଳନ୍ତ ଉଦାହରଣ ହେଉଛନ୍ତି ଅସ୍ତରଙ୍ଗର ଟ୍ରି ମ୍ୟାନ କୃଷ୍ଣ ରଞ୍ଜନ ବିଶ୍ୱାଳ । ବୃକ୍ଷରୋପଣ ପାଇଁ ତାଙ୍କର ଅଦମ୍ୟ ପ୍ରୟାସ ଅନ୍ୟ ପରିବେଶପ୍ରେମୀଙ୍କ ପାଇଁ ଆଦର୍ଶ ହୋଇପାରିଛି । ବାତ୍ୟାର ତାଣ୍ଡବରୁ ସୁରକ୍ଷା, ବେଳାଭୂମି ଅବକ୍ଷୟ ରୋକିବା, ଜଙ୍ଗଲରୁ ବାହାରୁ ଥିବା ଜାଳେଣୀ କାଠକୁ ଗ୍ରାମବାସୀଙ୍କ ବ୍ୟବହାର ପାଇଁ ଉପଲବ୍ଧ କରେଇବା ଓ ଶେଷରେ ପଶୁପକ୍ଷୀ ଓ ବନ୍ୟଜନ୍ତୁଙ୍କ ଆଶ୍ରୟସ୍ଥଳୀ ପାଲଟିବା, ତାଙ୍କ ତିଆରି ଜଙ୍ଗଲ ଅନେକ ପ୍ରକାରରେ ପ୍ରକୃତିର ସୁରକ୍ଷା କରୁଛି । ତାଳଗଛଗୁଡ଼ିକ ବିଜୁଳି ବା ବଜ୍ରପାତ ନିରୋଧକ କାର୍ଯ୍ୟ ବି କରିଥାଆନ୍ତି ।  କୃଷ୍ଣବାବୁଙ୍କ ପ୍ରକୃତିକୁ ଭଲପାଇବା ସମସ୍ତଙ୍କ ପାଇଁ ନିରବିଚ୍ଛିନ୍ନ ପ୍ରୟାସର ଏକ ସଫଳ କାହାଣୀ,’’ କହିଛନ୍ତି ପରିବେଶ ବିଜ୍ଞାନୀ ଜୟକୃଷ୍ଣ ପାଣିଗ୍ରାହୀ ।



ଯୁବାବସ୍ଥାରେ ଭାରତୀୟ ସେନାରେ ରହି ଦେଶ ସେବାରେ ନିଜ ଜୀବନକୁ ବାଜି ଲଗାଇ ଲଢ଼ିଥିଲେ କୃଷ୍ଣ ରଞ୍ଜନ ବିଶ୍ୱାଳ । ଅବସର ପରେ ବି ଦେଶ ଓ ଜାତି ତଥା ନିଜ ଜନ୍ମମାଟି ପାଇଁ କିଛି କରିବାର ସଫଳ ପ୍ରୟାସ ତାଙ୍କୁ ଏକ ନିଆରା ମଣିଷର ଆଖ୍ୟା ଦେଇଛି ।
Published by: Anand Shankar Thankur Das
First published: August 7, 2020, 11:57 PM IST