ଆଡ଼ପ ମଣ୍ଡପରେ ଶ୍ରୀଜୀଉ... ଆଜିଠୁ ଭକ୍ତଙ୍କୁ ଦର୍ଶନ ସହ ମିଳିବ ଆଡ଼ପ ଅବଢା

News 18 Odia Digital

ପୁରୀ : ଆଜିଠୁ ମାଉସୀ ମାଆ ମନ୍ଦିରରେ ମହାପ୍ରଭୁଙ୍କ ଦର୍ଶନ କରିପାରିବେ ଭକ୍ତ ​ । ଏହାସହ ଆଜିଠୁ ୬ଦିନ ଧରି ଆଡ଼ପ ଅବଢ଼ା ମଧ୍ୟ ଭକ୍ତଙ୍କୁ ମିଳିବ।  ଗତକାଲି ଶ୍ରୀଜୀଉଙ୍କ ନୀତିକାନ୍ତି ସମାପନ ପରେ ଦିନ ୩ଟା ୧୦ମିନିଟରେ ତିନି ରଥର ଅଶ୍ୱଙ୍କୁ ବାହାର କରାଯାଇଥିଲା । ସନ୍ଧ୍ୟା ୫ଟା ୩୦ରେ ପହଣ୍ଡି କାର‌୍ୟ୍ୟକ୍ରମ ଆରମ୍ଭ କରାଯାଥିଲା । ମଦନମୋହନଙ୍କ ପରେ କୃଷ୍ଣ, ସୁଦର୍ଶନ, ବଳଭଦ୍ର ରଥରୁ ମନ୍ଦିରକୁ ବିଜେ କରିଥିଲେ । ସଂଧ୍ୟା ସମୟରେ ଝିପି ଝିପ ବର୍ଷା ସତେ ଯେମିତି ମହାପ୍ରଭୁଙ୍କୁ ସ୍ୱାଗତ କରୁଥିଲା । ଘଣ୍ଟଘଣ୍ଟା ସହ ହରିବୋଲ ଓ ଜୟ ଜଗନ୍ନାଥ ଧ୍ୱନୀରେ ପ୍ରକମ୍ପିତ ହୋଇ ଉଠୁଥିଲା ଶରଧାବାଲି । ଓଡ଼ିଶୀ ନର୍ତ୍ତକୀଙ୍କ ନୃତ୍ୟ ଓ ଭକ୍ତଙ୍କ ଉତ୍କଣ୍ଠା ମଧ୍ୟରେ ଶରଧାବାଲି ହୋଇଥିଲା ଭକ୍ତିମୟ । ସନ୍ଧ୍ୟା ୭ଟା୫୫ ସମୟରେ ମହାପ୍ରଭୁ ଜଗନ୍ନାଥ ଜନ୍ମବେଦୀରେ ପ୍ରବେଶ କରିବା ପରେ ମନ୍ଦିରର ମୁଖ୍ୟଦ୍ୱାରକୁ ବନ୍ଦ କରାଯାଇଥିଲା ।

ଆଜି ଆଡ଼ପ ଦର୍ଶନ ଆରମ୍ଭ ହେଉଥିବାରୁ ଭକ୍ତ କିପରି ସୁରୁଖୁରୁରେ ମହାପ୍ରଭୁଙ୍କୁ ଦର୍ଶନ କରିପାରିବେ ସେଥିପାଇଁ ପ୍ରଶାସନ ବ୍ୟାପକ ପ୍ରସ୍ତୁତି କରିଛି । ଅପରାହ୍ୱ ୧ଟାରୁ ୨ଟା ମଧ୍ୟରେ ଆଡ଼ପ ଅବଢା ବାହାରିବ ବୋଲି ସୂଚନା ମିଳିଛି । ରଥଯାତ୍ରା ପରେ ଏବେ ବାକି ୬ଦିନ ଭିଡ଼ ସାମାନ୍ୟ କମ ଥିବାରୁ​ ଭକ୍ତମାନେ ମହାପ୍ରଭୁଙ୍କ ଦର୍ଶନରୁ ନିଜକୁ ବଞ୍ଚିତ କରିବେ ନାହିଁ ବୋଲି କିଛି ଭକ୍ତ କହିଛନ୍ତି ।