ପୁରୀ ଜିଲ୍ଲାରେ ଫନି ବାତ୍ୟା ସହାୟତା ଟଙ୍କା ଯୋଗାଇ ଦେବା ନାଁରେ ଗାଁ ଗାଁରେ ମାତିଛନ୍ତି ଠକ

News18 Odia Digital

ପୁରୀ: ଫନି ବାତ୍ୟାରେ ପୁରୀ ଜିଲ୍ଲାବାସୀମାନେ ବ୍ୟାପକ କ୍ଷୟକ୍ଷତି ସହିଥିଲେ ବି ଏଯାବତ୍‌ ସେମାନଙ୍କ ମଧ୍ୟରୁ ଅନେକଙ୍କୁ ମିଳିପାରିନି ସହାୟତା । ଜିଲ୍ଲାପାଳଙ୍କ ଅଫିସ ହେଉ କି ବ୍ଲକ ଅଫିସ, ହିତାଧିକାରୀମାନେ ସବୁ ଜାଗାକୁ ଦୌଡି ଦୌଡି ନୟାନ୍ତ ହେଲେ ବି ଫନି ସହାୟତା ମିଳୁନାହିଁ ବୋଲି କହିଛନ୍ତି । ଏହି ସ୍ଥିତିର ସୁଯୋଗ ନେଇ ଏବେ ଜିଲ୍ଲାର ଅନେକ ଅଞ୍ଚଳର ଗାଁ ଗାଁରେ ମାତିଛନ୍ତି ଠକମାନେ ।

କେତେକ ଯୁବକ ବିଭିନ୍ନ ଗାଁରେ ପହଞ୍ଚି ନିଜକୁ ଜିଲ୍ଲପାଳଙ୍କ ଅଫିସରୁ ଫନିରେ ଘର ଭଙ୍ଗା ସହାୟତା ପାଇଁ ଆସିଥିବା କହି ଲୋକଙ୍କୁ ଭୁଆଁ ବୁଲାଇ ଟଙ୍କା ଠକି ନେଉଥିବା ଦେଖାଯାଇଛି । ବହୁ ଗ୍ରାମବାସୀ ଅର୍ଥ ଲୋଭରେ ଏ ଭଳି ଠକାମିର ଶିକାର ହେଉଛନ୍ତି ।

ଏହା ବି ପଢ଼ନ୍ତୁ | ଆମେରିକାରେ ନୂଆ ଯୁଗର ଆରମ୍ଭ ହେଲା; ଜୋ ବାଇଡେନ୍ President ଓ କମଳା ହ୍ୟାରିସ୍ VP ରୂପେ ଶପଥ ନେଲେ

ସିରେଇ ଗ୍ରାମର ୫୨ ବର୍ଷୀୟ ମହିଳା ସୁଷମା ମଲ୍ଲିକ ଏମିତି ଠକାମିର ଶିକାର ହୋଇଥିବା ଲୋକଙ୍କ ମଧ୍ୟରୁ ଜଣେ । ଜାନୁଆରୀ ୧୬ ତାରିଖରେ ଜଣେ ଯୁବକ ସିରେଇରେ ପହଞ୍ଚି ଜିଲ୍ଲାପାଳଙ୍କ ଅଫିସରୁ ଆସିଛନ୍ତି ବୋଲି ତାଙ୍କୁ କହିଥିଲେ । ସେ କହିଥିଲେ ଯେ ଫନିରେ ଘର ଭଙ୍ଗା ସହାୟତା ବାବଦରେ ମଲ୍ଲିକଙ୍କ ପରିବାର ପାଇଁ ତିନି ଲକ୍ଷ କୋଡ଼ିଏ ହଜାର (୩,୨୦,୦୦୦) ଟଙ୍କାର ଚେକ୍ ଆସିଛି  ।



‘‘ସେହି ଯୁବକ ମୋତେ କହିଲେ ଯେ ତାଙ୍କୁ ୨୫ ହଜାର ଟଙ୍କା ଆଗୁଆ ଦେଲେ ସେ ଚେକ୍ ଦେବେ । ଘରେ ଟଙ୍କା ନାହଁ ବୋଲି ମୁଁ କହିଲି । ଟଙ୍କା ଯୋଗାଡ କଲେ ତାଙ୍କୁ ଦେବି ବୋଲି କହି ଚେକଟି ଦେଇକରି ଯା’ନ୍ତୁ ବୋଲି ତାଙ୍କୁ ଅନୁରୋଧ କଲି । ସେ ମୋ’ ଆଧାର କାର୍ଡର ଏକ ଫଟୋକପିରେ ଦସ୍ତଖତ କରାଇ ନେଲେ । ତା’ ପରେ ଜାଲ ଚେକ୍ ମୋତେ ଧରେଇ ଦେଇ ‘ମୁଁ ଆସୁଛି, ଆପଣ ଟଙ୍କା ଯୋଗାଡ କରନ୍ତୁ’ ବୋଲି କହି ପଳାଇଥିଲେ,’’ କହିଛନ୍ତି ସୁଷମା ମଲ୍ଲିକ ।

ଏହା ବି ପଢ଼ନ୍ତୁ | ମୁମ୍ବାଇରେ ନାମୀ-ଦାମୀ ଦେହ ବ୍ୟବସାୟ ଧରା ପଡ଼ିଲା; ୮ ଜଣ ମଡେଲଙ୍କୁ ଉଦ୍ଧାର କଲା ପୋଲିସ

ଇଣ୍ଡିଆନ ଓଭରସିଜ୍ ବ୍ୟାଙ୍କର ସେହି ଚେକଟିକୁ ନେଇ ବ୍ୟାଙ୍କର ଏକ ଶାଖାରେ ଦେଖାଇବାରୁ ତାହା ଜାଲ୍ ବୋଲି ଜାଣିଥିଲେ ମଲ୍ଲିକ । ‘‘ତା’ ପରେ ଆମ ପରିବାର ଲୋକେ ଉକ୍ତ ଯୁବକକୁ ଖୋଜା ଖୋଜି କରିଥିଲୁ, ହେଲେ ତାଙ୍କୁ ପାଇଲୁ ନାହିଁ । ଉପସ୍ଥିତ ବୁଦ୍ଧି ଯୋଗୁଁ ଠକାମିରୁ ବଞ୍ଚିଗଲୁ,’’ ସେ କହିଛନ୍ତି ।

ଏହା ବି ପଢ଼ନ୍ତୁ ଓ ଦେଖନ୍ତୁ ଫଟୋ | ତୁର୍କୀର ଏହି ଧାର୍ମିକ ନେତାଙ୍କର ୧,୦୦୦ ଜଣ ଗର୍ଲଫ୍ରେଣ୍ଡ ଥିଲେ; ତାଙ୍କୁ ୧,୦୭୫ ବର୍ଷ ଜେଲ୍ ଦଣ୍ଡ ମିଳିଛି

‘‘ଖାଲି ସୁଷମା ମଲ୍ଲିକ ନୁହଁନ୍ତି, କଣାସର ମାନପୁର, କତପଡା, ଜଙ୍ଘାର, ହରିପୁର ଓ ନାଗଣ ଆଦି ବିଭିନ୍ନ ଗ୍ରାମରୁ ଜାଲ ଚେକ୍ ଦେଇ ଟଙ୍କା ଓ ସୁନାଗହଣା କିଛି ଲୋକ ଠକି ନେଇଥିବା ଜଣାପଡିଛି । ସେମାନେ ଜିଲ୍ଲାପାଳଙ୍କ ଅଫିସରୁ ଆସିଥିବା କହି ଆଧାର କାର୍ଡ ନେଇ ୨୫ ହଜାର ବା ୫୦ ହଜାର ଟଙ୍କା ପର୍ଯ୍ୟନ୍ତ ତାଙ୍କୁ ଦେଲେ ତିନି ଲକ୍ଷ ଟଙ୍କାର ସହାୟତା ଯୋଗାଇଦେବାର ଲୋଭ ଦେଖାଇ ଲୋକଙ୍କୁ ଠକୁଛନ୍ତି । ବାରମ୍ବାର ଠକାମି ଖବର ପ୍ରସାରଣ ହେଉଥିଲେ ବି ଲୋକେ ଲୋଭର ବଶବର୍ତ୍ତୀ ହୋଇ ଏଭଳି ଠକଙ୍କ ହାବୁଡରେ ପଡିଯାଉଛନ୍ତି,’’ କହିଛନ୍ତି କଣାସ ବାସିନ୍ଦା ବିମ୍ବାଧର ବଡ଼ଜେନା ।

ଏହା ବି ପଢ଼ନ୍ତୁ ଓ ଦେଖନ୍ତୁ VIDEO | ନୋରା ଫତେହି ଓ ମଲାଇକା ଅରୋଡ଼ାଙ୍କ ମଧ୍ୟରେ ଏହି ନୃତ୍ୟ ପ୍ରତିଯୋଗିତା ଦେଖି ଲୋକେ ତାଜୁବ୍ ହେଲେ

ଉପଜିଲ୍ଲାପାଳ ଭବତାରଣ ସାହୁ କହିଛନ୍ତି, ‘‘ଫନିର ସର୍ଭେ କରାଯାଇ ବିସ୍ଥାପିତଙ୍କ ତାଲିକା ପ୍ରସ୍ତୁତ କରାଯାଇଥିଲା । ତା’ ପରେ କିଛି ଲୋକଙ୍କ ଆକାଉଣ୍ଟକୁ ଭୁଲରେ ଟଙ୍କା ଯାଇଥିବାରୁ ସେହି ଆକାଉଣ୍ଟଗୁଡ଼ିକୁ ଫ୍ରିଜ୍‌ କରାଯାଇଥିଲା । ହେଲେ ଏବେ ତା’ର ସମାଧାନ ହୋଇଛି  । ଜିଲ୍ଲାପାଳଙ୍କ ଅଫିସରୁ କୌଣସି ଅଫିସରଙ୍କୁ ଲୋକଙ୍କ ପାଖକୁ ଯାଇ ଚେକ୍‌ ଦେବା ପାଇଁ ନିର୍ଦ୍ଦେଶ ଦିଆଯାଇନି । ଯଦି କେହି ଏମିତି ଖବର ପାଉଛନ୍ତି ତୁରନ୍ତ ପ୍ରଶାସନ ବା ପୋଲିସରେ ଅଭିଯୋଗ କରି ସେମାନଙ୍କୁ ଧରିବାରେ ସହାୟତା କରନ୍ତୁ ।’’



ଫନି ସହାୟତା ସଂକ୍ରାନ୍ତୀୟ କୌଣସି ଗୁଜବରେ ବିଶ୍ୱାସ ନ କରି ଠକାମିରେ ନ ପଡ଼ିବାକୁ ଲୋକଙ୍କୁ ଅନୁରୋଧ କରିଛନ୍ତି ଉପଜିଲ୍ଲାପାଳ ।