ପୁରୀ: ଚୋରି ମୋବାଇଲ ଫୋନର IMEI ନମ୍ବର ପାଇବାକୁ ମୋବାଇଲକୁ ଦୁଇ ଫାଳ କଲେ ପୋଲିସ ବାବୁ

ସାଇବର୍ କ୍ରାଇମ୍ ବଢ଼ୁଥିବା ସମୟରେ ଡିଜିଟାଲ୍ ସ୍ମାର୍ଟ ହେବା ପାଇଁ ପୋଲିସ ବିଭାଗ ଅନେକ ପଦକ୍ଷେପ ନେଉଥିବା ବେଳେ ପୁରୀ ପୋଲିସର ଜଣେ ଅଧିକାରୀ IMEI ନମ୍ବର ପାଇଁ ଏକ ମୋବାଇଲ ଫୋନକୁ ଦୁଇ ଫାଳ କରିବା ଘଟଣା ଚର୍ଚ୍ଚାର ବିଷୟ ହୋଇଛି ।

ଚନ୍ଦନପୁର ପୋଲିସ ଥାନା (ଡାହାଣ)

ଚନ୍ଦନପୁର ପୋଲିସ ଥାନା (ଡାହାଣ)

  • Share this:
News18 Odia Digital

ପୁରୀ: ଜିଲ୍ଲା ପୋଲିସ ବଳକୁ ସାଇବର ଅପରାଧ ଉପରେ ନଜର ରଖିବାକୁ ଓ ଡିଜିଟାଲ୍‌ ସ୍ମାର୍ଟ ହୋଇ ସମୟ ସହ ତାଳ ମିଳାଇ ଅପରାଧ ଦମନ କରିବାକୁ ନିର୍ଦ୍ଦେଶ ଦେଇଥିଲେ ପୁରୀ ଏସ୍‌.ପି. ଡଃ କୱଁର ବିଶାଲ ସିଂ । ହେଲେ ସାମାନ୍ୟ ଗୋଟିଏ ଆଣ୍ଡ୍ରଏଡ୍‌ ମୋବାଇଲ୍‌ ଫୋନର ଆଇ.ଏମ୍.ଇ.ଆଇ. (IMEI) ନମ୍ବର ଜାଣିବା ପାଇଁ ମୋବାଇଲ୍‌ ଫୋନଟିକୁ ଦୁଇ ଫାଳ କରିଦେଇଛି ଚନ୍ଦନପୁର ଥାନା ପୋଲିସ ।

ନିଜ ଚୋରି ହୋଇଥିବା ମୋବାଇଲ ଫୋନ୍‌ ଫେରି ପାଇବେ ବୋଲି ଖୁସି ଥିବା ଅଧ୍ୟାପିକା ଜଣକ ମୋବାଇଲ ଫୋନର ଏହି ଅବସ୍ଥା ଦେଖି ସ୍ତବ୍ଧ ହୋଇଯାଇଥିଲେ । ’’ଜଣେ ପୋଲିସ୍‌ ଏ.ଏସ୍‌.ଆଇ. ଯେ ଏମିତି କରିବେ ତାହା ମୋ’ କଳ୍ପନାର ବାହାରେ ଥିଲା,’’ କହିଛନ୍ତି ଚନ୍ଦନପୁର ପାଙ୍କଳ ନିକଟସ୍ଥ ସଂସ୍କୃତ କଲେଜରେ ଅଧ୍ୟାପିକା ରାଜଶ୍ରୀ ଦଳାଇ ।

ଦେଖନ୍ତୁ ଫଟୋ | ତିନି ମହଲା ଘରର ଛାତ ଉପରକୁ ଚଢ଼ିଗଲା ଷଣ୍ଢ; ତାକୁ କ୍ରେନ୍ ସାହାଯ୍ୟରେ ତଳକୁ ଅଣାଗଲା

ନଭେମ୍ବର ୧୫ ତାରିଖ ସନ୍ଧ୍ୟାରେ ପୁରୀ-ଭୁବନେଶ୍ୱର ଜାତୀୟ ରାଜପଥର ଚନ୍ଦନପୁର ବାଇପାସରେ ରାଜଶ୍ରୀ ସ୍କୁଟିରେ ଯାଉଥିବା ବେଳେ ତାଙ୍କ ଭ୍ୟାନିଟି ବ୍ୟାଗକୁ ଲୁଟି ନେଇଥିଲେ କିଛି ଦୁର୍ବୃତ୍ତ । ସେଥିରେ ଥିଲା ତାଙ୍କର ଏକ ଦାମୀ ଆଣ୍ଡ୍ରଏଡ ମୋବାଇଲ୍‌ ଫୋନ୍‌ । ଚୋରି ସମ୍ପର୍କରେ ଚନ୍ଦନପୁର ଥାନାରେ ସେ ଏତାଲା ଦେଇଥିଲେ । ପୋଲିସ ମାମଲା ରୁଜୁ କରି ତଦନ୍ତ କରିବା ପରେ ଅଭିଯୁକ୍ତକୁ ଧରି ମୋବାଇଲ ଫୋନକୁ ଜବତ କରିଥିଲା ।

‘‘ଲୁଟେରା ଗିରଫ ହୋଇ ତା’ ଠାରୁ ମୋ’ ଫୋନ୍‌ ପୋଲିସକୁ ମିଳିଯିବା ପରେ ସୋମବାର ନିଜ ଫୋନ୍‌ ନେବାକୁ ଥାନାକୁ ଯାଇଥିଲି । ଆଇ.ଆଇ.ସି. ଅଭିମନ୍ୟୁ ନାୟକଙ୍କ ନିର୍ଦ୍ଦେଶ କ୍ରମେ ଜଣେ ଏ.ଏସ.ଆଇ. ଏହି ମୋବାଇଲଟି ମୋ’ ଜିମା ଦେବା ପାଇଁ କାଗଜପତ୍ର ପ୍ରସ୍ତୁତ କରିଥିଲେ । ମୋବାଇଲ ଫୋନର ବିଲ ସହ ମିଳାଇବାକୁ ଏହାର ଆଇ.ଏମ୍.ଇ.ଆଇ. ନମ୍ବରର ଆବଶ୍ୟକତା ଥିଲା । ତେଣୁ ନମ୍ବର ଖୋଜିବା ପାଇଁ ଲାଗିପଡିଥିଲେ ପୋଲିସ ବାବୁ । ମାତ୍ର ସେ ଯାହା କଲେ ସେଥିରେ ମୁଁ ଚକିତ ହୋଇଗଲି,’’ କହିଛନ୍ତି ରାଜଶ୍ରୀ ।

ଏହା ବି ପଢ଼ନ୍ତୁ | ନୂଆ ବର୍ଷ ଠାରୁ UPI, ଚେକ୍ ପେମେଣ୍ଟ, GST ବୀମା ସମ୍ବନ୍ଧୀୟ ଅନେକ ନିୟମ ବଦଳିଛି; ଜାଣନ୍ତୁ

ତାଙ୍କର ଜଣେ ସମ୍ପର୍କୀୟ କହିଛନ୍ତି ଯେ ମୋବାଇଲ ଫୋନର କାଗଜପତ୍ର ଦେଖିବା ପରେ ଇ.ଏମ୍.ଇ.ଆଇ. ନମ୍ବର ଖୋଜିବା ନେଇ ଏ.ଏସ.ଆଇ.ଙ୍କ ଶୈଳୀ ଥିଲା ନିଆରା । ‘‘ପୂର୍ବରୁ ବ୍ୟାଟେରି ତଳେ ଆଇଏମଇଆଇ ନମ୍ବର ରହୁଥିଲା । ହେଲେ ଏବେ ଆଣ୍ଟ୍ରଏଡ ଫୋନରେ ବ୍ୟାଟେରି ଫିକ୍ସ ଥିବା ବେଳେ ମେକାନିକ ଛଡ଼ା ଅନ୍ୟ କେହି ଖୋଲିଲେ ମୋବାଇଲ ଫୋନ୍‌ ଖରାପ ହେଇଯିବାର ୯୦ ପ୍ରତିଶତ ସମ୍ଭାବନା ରହିଛି । ଫୋନର ସେଟିଙ୍ଗ ଅପସନକୁ ଯାଇ ଏବାଉଟରେ ସର୍ଚ୍ଚ କଲେ ସେହି ନମ୍ବର ମିଳିଥାଏ । ନହେଲେ ଷ୍ଟାର ହ୍ୟାସ୍‌ ୦୬ ହ୍ୟାସ୍‌ ଡାଏଲ୍ କଲେ ବି ଆଇ.ଏମ୍.ଇ.ଆଇ. ନମ୍ବର ଡିସପ୍ଲେରେ ଦେଖାଏ । କିନ୍ତୁ ଏ.ଏସ.ଆଇ. ବାବୁଙ୍କୁ ଏ ବିଦ୍ୟା ଜଣା ନ ଥିଲା,’’ ସେ କହିଛନ୍ତି ।

ଏହା ବି ପଢ଼ନ୍ତୁ | କରୋନା କାଳରେ ଟ୍ରେନ୍ ଟିକେଟ୍ ଟଙ୍କା ଫେରସ୍ତ ପାଇବାର ସମୟ ମାସରୁ ବଢ଼ି ମାସ ହେଲା

ପୁରୁଣା ଢଙ୍ଗରେ ଏ.ଏସ.ଆଇ. ବାବୁ ଖୋଲିଥିଲେ ମୋବାଇଲ ଫୋନର ବ୍ୟାକ୍‌ କଭର । ପାଖରେ ଥିବା ରାଜଶ୍ରୀ ଏହାକୁ ଅଟକାଇବାକୁ ଚାହୁଁଥିଲେ ସୁଦ୍ଧା ପୋଲିସ ବାବୁ କିଛି ଶୁଣିବାକୁ ଚାହୁଁ ନ ଥିଲେ । ମୋବାଇଲ ଫୋନକୁ ଫାଡ଼ି ଦେବା ପରେ ବି ନମ୍ବର ପାଇ ନ ଥିଲେ ।

‘‘ଉପର ତଳ କରି ବହୁ ସମୟ ଖୋଜିଲେ । ବାସ୍‌, ତା’ ପରେ କହିଲେ ବ୍ୟାଟେରି ତଳେ ବୋଧେ ଅଛି । ହୋମଗାର୍ଡ ମନା କରିବା ସତ୍ତ୍ୱେ ଫିକ୍ସ ଥିବା ବ୍ୟାଟେରିକୁ ତାଡ଼ିବାକୁ ଉଦ୍ୟମ କଲେ । ଫଳରେ ମୋବାଇଲ ଫୋନଟି ଦୁଇ ଫାଳ ହୋଇ ଗୋଟିଏ ଫାଳ ଏ.ଏସ.ଆଇ. ବାବୁଙ୍କ ହାତରେ ଓ ଅନ୍ୟଟି ହୋମଗାର୍ଡଙ୍କ ହାତରେ ରହିଗଲା,’’ କହିଛନ୍ତି ରାଜଶ୍ରୀ ।

ଏହା ବି ପଢ଼ନ୍ତୁ | ରାଞ୍ଚିରେ ଯୁବତୀର ମୁଣ୍ଡକଟା ଉଲଗ୍ନ ଶବ ମିଳିଲା; ଗୁପ୍ତାଙ୍ଗରେ ଗଭୀର କ୍ଷତ; ପୋଲିସ ତଦନ୍ତ ଜାରି; ପୋଲିସ ପୁରସ୍କାର ଘୋଷଣା କଲା

ପରେ ସରଳ ଉପାୟରେ ଇ.ଏମ୍.ଇ.ଆଇ. ନମ୍ବର ବାହାର କରି ଦେଖାଇବା ପରେ ଏ.ଏସ.ଆଇ. ବାବୁ ମୁରୁକି ହସି କହିଥିଲେ, ‘‘ଆମ ଦ୍ୱାରା ଏ ସବୁ ହେବନି କାରଣ ଆମେ ପୁରୁଣାକାଳିଆ ଅଫିସର ।’’ ଏବେ ରାଜଶ୍ରୀ ନିଜ ଦାମୀ ମୋବାଇଲ୍‌ ଫୋନକୁ ଠିକ୍‌ କରିବା ପାଇଁ ପ୍ରୟାସ କରି ହଇରାଣ ହେଉଛନ୍ତି ।



ସାଇବର୍‌ କ୍ରାଇମ୍‌ ବଢ଼ୁଥିବା ସମୟରେ ଡିଜିଟାଲ୍‌ ସ୍ମାର୍ଟ ହେବା ପାଇଁ ପୋଲିସ ବିଭାଗ ଅନେକ ପଦକ୍ଷେପ ନେଉଥିବା ବେଳେ ମୋବାଇଲ ଫୋନକୁ ଦୁଇ ଫାଳ କରିବାର ଏହି ଘଟଣା ପୁରୀରେ ବେଶ ଚର୍ଚ୍ଚାର ବିଷୟ ହୋଇଛି ।
Published by:Anand Shankar Thankur Das
First published: