ରାଜ୍ୟରେ ଲାଭରେ ଥିବା ପାନ୍ଥନିବାସଗୁଡ଼ିକର ଘରୋଇକରଣ ପାଇଁ ଚକ୍ରାନ୍ତ ଚାଲିଛି: ସଙ୍ଘ

ଯେଉଁ ପାଞ୍ଚଟି ପାନ୍ଥନିବାସକୁ ୩୦ ବର୍ଷ ପାଇଁ ଘରୋଇ ସଂସ୍ଥାକୁ ଟେକିଦେବାକୁ ଟେଣ୍ଡର ହୋଇଛି ସେଗୁଡ଼ିକ ମଧ୍ୟ ନିୟମିତ ଲାଭ କରିଆସୁଛନ୍ତି । ସେହି ପାଞ୍ଚଟି ପାନ୍ଥନିବାସ ଧଉଳି, ତପ୍ତପାଣି, ଗୋପାଳପୁର, ବାଲେଶ୍ୱର ଓ ଭଦ୍ରକରେ ଅଛନ୍ତି ।

ରାଜ୍ୟରେ ଲାଭରେ ଥିବା ପାନ୍ଥନିବାସଗୁଡ଼ିକର ଘରୋଇକରଣ ପାଇଁ ଚକ୍ରାନ୍ତ ଚାଲିଛି: ସଙ୍ଘ
ପାନ୍ଥନିବାସ
  • News18 Odia
  • Last Updated: September 16, 2020, 5:16 PM IST
  • Share this:
  • Byline Facebook
  • Byline Twitter
  • Byline Linkedin
News18 Odia Digital

ଭୁବନେଶ୍ୱର: ରାଜ୍ୟରେ ଥିବା ପାନ୍ଥନିବାସଗୁଡ଼ିକର ଘରୋଇକରଣ କରିବା ପାଇଁ ଚକ୍ରାନ୍ତ ଚାଲିଥିବା ଅଭିଯୋଗ ଆଣିଛି ଉତ୍କଳ ପର୍ଯ୍ୟଟନ ନିଗମ କର୍ମଚାରୀ ସଙ୍ଘ । ୨୦୦୩-୦୪ରୁ ରାଜ୍ୟରେ ଥିବା ୨୧ଟି ପାନ୍ଥନିବାସ ଲାଭରେ ଚାଲିଥିବା ବେଳେ ଏହାକୁ ହୋଟେଲ ସଂସ୍ଥା ହାତରେ ଟେକି ଦେବାକୁ ଏକ ହୀନ ଚକ୍ରାନ୍ତ ହେଉଛି ବୋଲି କହିଛି ସଙ୍ଘ ।

ଗତ ତିନି ବର୍ଷ ମଧ୍ୟରେ ପାନ୍ଥନିବାସଗୁଡ଼ିକ ପ୍ରଚୁର ଲାଭ କରିଛନ୍ତି ବୋଲି ଦର୍ଶାଇ ସଙ୍ଘ କହିଛି ଯେ ୨୦୧୭-୧୮ରେ ୩୧ କୋଟି ୨୪ ଲକ୍ଷ ଟଙ୍କା, ୨୦୧୮-୧୯ରେ ୩୯ କୋଟି ୩୯ ଲକ୍ଷ ଟଙ୍କା ଓ ୨୦୧୯-୨୦ରେ କରୋନା ସତ୍ୱେ ୩୩ କୋଟି ୨୬ ଲକ୍ଷ ଟଙ୍କାରୁ ଅଧିକ ଲାଭ କରିଛନ୍ତି ।

‘‘ଯେଉଁ ପାଞ୍ଚୋଟି ପାନ୍ଥନିବାସକୁ ୩୦ ବର୍ଷ ପାଇଁ ଘରୋଇ ସଂସ୍ଥାକୁ ଟେକିଦେବାକୁ ଟେଣ୍ଡର ହୋଇଛି ସେଗୁଡିକ ମଧ୍ୟ ନିୟମିତ ଲାଭ କରିଆସୁଛନ୍ତି । ସେହି ପାଞ୍ଚୋଟି ପାନ୍ଥନିବାସ ଧଉଳି, ତପ୍ତପାଣି, ଗୋପାଳପୁର, ବାଲେଶ୍ୱର ଓ ଭଦ୍ରକରେ ଅଛନ୍ତି । ପାନ୍ଥନିବାସଗୁଡ଼ିକୁ ହୋଟେଲ କମ୍ପାନୀମାନଙ୍କ ଦ୍ୱାରା ପରିଚାଳନା କରାଗଲେ ସେଗୁଡ଼ିକ ନିମ୍ନ ମଧ୍ୟବିତ୍ତ ଓ ମଧ୍ୟବିତ୍ତ ଲୋକଙ୍କ ପାଇଁ ବଜେଟ ବାହାରକୁ ଚାଲିଯିବ,’’ ଏକ ବିବୃତିରେ କହିଛି ଉତ୍କଳ ପର୍ଯ୍ୟଟନ ନିଗମ କର୍ମଚାରୀ ସଙ୍ଘ ।



ମୁଖ୍ୟ ମନ୍ତ୍ରୀ, ପର୍ଯ୍ୟଟନ ମନ୍ତ୍ରୀ, ସଚିବ ଓ ଓଟିଡ଼ିସି ଅଧଃକ୍ଷା ଏ ବାବଦରେ ପୁନର୍ବିଚାର ନ କଲେ ସଙ୍ଘ ରାଜରାସ୍ତାକୁ ଓହ୍ଲାଇବ ବୋଲି କହିଛି । ସଙ୍ଘର କର୍ମକର୍ତ୍ତାମାନେ ମୁଖ୍ୟ ମନ୍ତ୍ରୀଙ୍କ ବାସଭବନ ସମ୍ମୁଖରେ ଆତ୍ମାହୁତି ଦେବେ ବୋଲି ବି ଚେତାବନୀ ଦେଇଛନ୍ତି ।

ଏକ ସାମ୍ବାଦିକ ସମ୍ମିଳନୀ କରି ଉତ୍କଳ ପର୍ଯ୍ୟଟନ ନିଗମ  କର୍ମଚାରୀ ସଙ୍ଘ କହିଛି ଯେ ଲୋକଙ୍କୁ ସୁଲଭ ମୂଲ୍ୟରେ ଭରସାଯୋଗ୍ୟ ଆତିଥ୍ୟ ସେବା ଯୋଗାଇଦେବା ଉଦ୍ଦେଶ୍ୟରେ ସରକାର ପାନ୍ଥନିବାସ ପରିକଳ୍ପନା କରିଥିଲେ । ଅବସର ବିନୋଦନ ନିମନ୍ତେ ପାନ୍ଥନିବାସ ନିମ୍ନ ମଧ୍ୟବିତ୍ତ ପରିବାରଙ୍କ ପ୍ରଥମ ପସନ୍ଦ ରହିଆସିଛି ।

ସାମ୍ବାଦିକ ସମ୍ମିଳନୀରେ ଉତ୍କଳ ପର୍ଯ୍ୟଟନ ନିଗମ କର୍ମଚାରୀ ସଙ୍ଘର କର୍ମକର୍ତ୍ତାମାନେ


‘‘୨୦୦୩-୦୪ରୁ ରାଜ୍ୟର ସମସ୍ତ ପାନ୍ଥ ନିବାସ ଲାଭରେ ଚାଲିଛି । ପାନ୍ଥନିବାସ ପରିଚାଳନା କରୁଥିବା ଓଡିଶା ପର୍ଯ୍ୟଟନ ନିଗମ (ଓ.ଟି.ଡି.ସି.) ସରକାରଙ୍କୁ ୨୦୧୮-୧୯ ବର୍ଷରେ ୨ କୋଟି ଟଙ୍କା ଲାଭାଂଶ ପ୍ରଦାନ କରିଛି । ଏସବୁ ସତ୍ତ୍ବେ ପର୍ୟ୍ୟଟନ ବିଭାଗର ଅଧିକାରୀଙ୍କ ଖାମଖିଆଲି ଓ ମନୋମୁଖୀ ନିଷ୍ପତ୍ତି ଠୋଗୁଁ ପାଞ୍ଚଟି ପାନ୍ଥନିବାସକୁ ହୋଟେଲ ହାତରେ ଟେକିଦେବାର ମସୁଧା ଚାଲିଛି । କେବଳ ୫ଟି ନୁହେଁ, ୨୧ଟି ପାନ୍ଥନିବାସକୁ ହୋଟେଲକୁ ଦେବା ପାଇଁ ଚକ୍ରାନ୍ତ ଚାଲିଛି,’’ କର୍ମଚାରୀ ସଙ୍ଘ ଅଭିଯୋଗ କରିଛି ।

୧୯୯୯-୨୦୦୦ ମସିହା ଠାରୁ ପାନ୍ଥନିବାସଗୁଡ଼ିକ ସରକାରଙ୍କ ଠାରୁ କୌଣସି ଇକ୍ୟୁଟି ସେୟାର ନ ପାଇ ବି ଲାଭ କରି ଆସିଛନ୍ତି ବୋଲି ସଙ୍ଘ କହିଛି । ୨୦୧୭-୧୮ରେ ୨୧ଟି ପାନ୍ଥନିବାସରେ କାରବାର ୩୧ କୋଟି ୨୪ ଲକ୍ଷ ଟଙ୍କା ହୋଇଥିବା ବେଳେ ୨୦୧୮-୧୯ରେ ଏହା ୩୯ କୋଟି ୩୯ ଲକ୍ଷ ଟଙ୍କାରେ ପହଞ୍ଚିଛି ବୋଲି କର୍ମଚାରୀ ସଙ୍ଘର ସଭାପତି ବେଣୁ ଧର ପାତ୍ର କହିଛନ୍ତି । ସରକାର ହୋଟେଲ ହାତକୁ ଟେକିବାକୁ ଉଦ୍ୟମ କରୁଥିବା ପାଞ୍ଚଟି ପାନ୍ଥ ନିବାସ ବି ଲାଭରେ ଚାଲିଛି ।

ଏହା ବି ପଢ଼ନ୍ତୁ | ଦୁଇ ଯୁବତୀଙ୍କ ମଧ୍ୟରେ ପ୍ରେମ ହେଲା; କୋର୍ଟରେ ଗୁପ୍ତ ଭାବରେ ଦୁହେଁ ବିବାହ କଲେ

ଏହା ବି ପଢ଼ନ୍ତୁ ବଲିଉଡ୍ ଅଭିନେତା ଅକ୍ଷୟ କୁମାର କହିଛନ୍ତି ଯେ ସେ ପ୍ରତି ଦିନ ଗୋ ମୂତ୍ର ପିଅନ୍ତି

ପାନ୍ଥନିବାସ ଘରୋଇକରଣକୁ ନେଇ ବିଜେପି ମୁଖପାତ୍ର ଗୋଲକ ମହାପାତ୍ର କହିଛନ୍ତି, ‘‘ପାନ୍ଥନିବାସ ବିକ୍ରି ପାଇଁ ରାଜ୍ୟ ସରକାରଙ୍କ ଏହା ଏକ ଚକ୍ରାନ୍ତ ଓ ପୂର୍ବ-ପ୍ରସ୍ତୁତ ପରିକଳ୍ପନା, ଯାହା ଦ୍ୱାରା ଲାଭରେ ଚାଲୁଥିବା ସଂସ୍ଥା ଶାଗ ମାଛ ଦରରେ ଲୋକଙ୍କ ହାତକୁ ଟେକା ହୋଇଯିବ । ରାଜ୍ୟ ସରକାର ଏଥିରୁ କ୍ଷାନ୍ତ ହେବା ଦରକାର । ଯଦି ଏହାର ଘରୋଇକରଣ କରାଯାଉଛି ତେବେ ଏହାର ମୋଡାଲିଟି କଣ ହେବ? କର୍ମଚାରୀଙ୍କ ଚାକିରିର ସ୍ଥିରତା ଉପରେ ବି ଚିନ୍ତା କରିବା ଦରକାର । ଆମକୁ ଅନୁଭବ ହେଉଛି ଯେ ସରକାର ଏକ ପୂର୍ବ-ପ୍ରସ୍ତୁତ ଯୋଜନା ଅନୁସାରେ ଓଟିଡ଼ିସି ଜମିକୁ ବିକ୍ରି କରିବା ପାଇଁ ଚକ୍ରାନ୍ତ କରୁଛନ୍ତି । ସରକାର ଏଥିରୁ ନିବୃତ ରହିବା ଦରକାର ।’’



କର୍ମଚାରୀ ସଙ୍ଘର ଅଭିଯୋଗ ଉପରେ ପ୍ରତିକ୍ରିୟା ରଖିଛନ୍ତି ପର୍ଯ୍ୟଟନ ମନ୍ତ୍ରୀ । ‘‘ଅନୁଧ୍ୟାନ କରାଯାଇ ଯାହା ପଦକ୍ଷେପ ନିଆଯିବା କଥା ଠିକ୍‌ ସମୟରେ ନିଆଯିବ । କୌଣସି କର୍ମଚାରୀଙ୍କ କିଛି ବି ଅସୁବିଧା ହେବ ନାହିଁ । ସବୁ କର୍ମଚାରୀଙ୍କ ଚାକିରୀ ସମ୍ପୂର୍ଣ ସୁରକ୍ଷିତ,’’ କହିଛନ୍ତି ପର୍ଯ୍ୟଟନ ମନ୍ତ୍ରୀ ଜ୍ୟୋତି ପ୍ରକାଶ ପାଣିଗ୍ରାହୀ ।
Published by: Anand Shankar Thankur Das
First published: September 16, 2020, 5:16 PM IST
corona virus btn
corona virus btn
Loading