ରାଷ୍ଟ୍ରପତି କୋବିନ୍ଦ ୫ ବର୍ଷର ହୋଇଥିବା ବେଳେ ଘରେ ନିଆଁ ଲାଗିବାରୁ ତାଙ୍କ ମା’ଙ୍କ ମୃତ୍ୟୁ ହୋଇଥିଲା

News18 Odia Digital

ନୂଆ ଦିଲ୍ଲୀ: ତୃତୀୟ ଥର ପାଇଁ ଓଡ଼ିଶା ଆସୁଥିବା ଦେଶର ମହାମହିମ ରାଷ୍ଟ୍ରପତି ରାମନାଥ କୋବିନ୍ଦଙ୍କ (President Ramnath Kovind) ବାଲ୍ୟକାଳ ଦୁଃଖରେ ବିତିଥିଲା । ଉତ୍ତର ପ୍ରଦେଶର କାନପୁର ନିକଟସ୍ଥ ଏକ ମଫସଲ ଗାଁରେ ଏକ ଗରିବ ଦଳିତ ପରିବାରରେ ଜନ୍ମ ହୋଇଥିବା ରାମନାଥ ପିଲାଟି ବେଳେ ନିଜ ମା’ଙ୍କୁ ହରେଇଥିଲେ ।

ପାଞ୍ଚ ଭାଇ ଓ ଦୁଇ ଭଉଣୀଙ୍କ ମଧ୍ୟରେ ସବୁଠୁ ସାନ ରାମନାଥ ଯେତେବେଳେ ମାତ୍ର ପାଞ୍ଚ ବର୍ଷର ହୋଇଥିଲେ, ସେତେବେଳେ ତାଙ୍କ ଚାଳ ଛପର ଘରେ ନିଆଁ ଲାଗିଯାଇଥିଲା । ନିଆଁ ଲାଗିବା ବେଳେ ରାମନାଥ ଘର ଭିତରେ ନିଜ ମା’ଙ୍କ ସହ ଥିଲେ । ରାମନାଥଙ୍କୁ ସାହି ପଡ଼ିଶା ଲୋକେ କୌଣସି ପ୍ରକାର ନିଆଁ ଭିତରୁ ବାହାରକୁ ବାହାରକରି ଆଣିଥିଲେ, ହେଲେ ତାଙ୍କ ମା’ ନିଆଁରେ ଜଳିଯାଇଥିଲେ ଓ ମୃତ୍ୟୁ ବରଣ କରିଥିଲେ । ପରେ ସେହି ଘର ଓ ଜମିକୁ ରାମନାଥ କୋବିନ୍ଦ ରାଷ୍ଟ୍ରୀୟ ସ୍ୱୟଂସେବକ ସଙ୍ଘକୁ (RSS) ଦାନ କରିଦେଇଥିଲେ ।

ଏହା ବି ପଢ଼ନ୍ତୁ ଓ PHOTO ଦେଖନ୍ତୁ | ବାଲି ଖୋଳୁ ଖୋଳୁ ମହାଦେବ: ଯାଜପୁରରେ ବୈତରଣୀ ନଦୀ ଗର୍ଭରୁ ଉଭା ହେଲେ ସ୍ବୟଂ ଶିବଶମ୍ଭୁ

ଏବେ ୭୫ ବର୍ଷ ବୟସରେ ପହଞ୍ଚିଥିବା ରାମନାଥ କୋବିନ୍ଦ (Ramnath Kovind) ପ୍ରାଥମିକ ବିଦ୍ୟାଳୟକୁ ଯିବା ପାଇଁ ଘରୁ ଆଠ କିଲୋମିଟର ଚାଲି ଚାଲି ସ୍କୁଲକୁ ଯାଉଥିଲେ । ଅସଲରେ ତାଙ୍କ ଗାଁରେ କାହାରି ପାଖରେ ସାଇକେଲ୍‌ ଖଣ୍ଡେ ନ ଥିଲା । ସେହି ଗାଁରେ ରହୁଥିବା ତାଙ୍କ କୋରି ଜାତିର ଲୋକେ ଭାରି ଗରିବ ଥିଲେ ।



ରାମନାଥଙ୍କ ବଡ଼ ଭାଇମାନେ ତାଙ୍କ ଭିତରେ ଶିକ୍ଷା ପ୍ରତି ଆଗ୍ରହ ଦେଖିବା ପରେ ତାଙ୍କୁ କାନପୁର ସହରରେ ରହୁଥିବା ନିଜ ବଡ଼ ଭଉଣୀ ଘରକୁ ପଠେଇ ଦେଇଥିଲେ । ରାମନାଥ ସେଠି ରହି ହାଇ ସ୍କୁଲ୍‌ ଓ କଲେଜ ଶିକ୍ଷା (ବି.କମ୍‌.) ପୂରା କରିଥିଲେ । ତା’ ପରେ ସେ ଆଇନ ପାଠରେ ସ୍ନାତକ ଡିଗ୍ରୀ (LlB) ହାସଲ କରିଥିଲେ ।

ଏହା ବି ପଢ଼ନ୍ତୁ | ଭୁବନେଶ୍ବର: ଭଡ଼ାଟିଆଙ୍କ ଉପରେ ଆକ୍ରମଣ ମାମଲାରେ ଗିରଫ ହୋଇପାରନ୍ତି BJP ନେତ୍ରୀ ଓ ତାଙ୍କ ସ୍ୱାମୀ

ଆଇ.ଏ.ଏସ୍‌. ଅଫିସର୍‌ (IAS officer) ହେବା ପାଇଁ ପ୍ରଥମରୁ ଆଗ୍ରହୀ ଥିବା ରାମନାଥ କୋବିନ୍ଦ ୟୁ.ପି.ଏସ୍‌.ସି. (UPSC) ପରୀକ୍ଷା ପାଇଁ ପ୍ରସ୍ତୁତ ହୋଇଥିଲେ ଓ ପରୀକ୍ଷା ଦେଉଥିଲେ । ତୃତୀୟ ଥର ପରୀକ୍ଷା ଦେବା ପରେ ସେ ପାସ୍‌ କଲେ, ହେଲେ ତାଙ୍କୁ ଏଲାୟଡ୍‌ ସର୍ଭିସେଜ୍‌ ମିଳିବାରୁ ସେ ଯୋଗ ଦେଇ ନ ଥିଲେ ଓ ୧୯୭୧ରେ ଦିଲ୍ଲୀରେ ଓକିଲାତି ଆରମ୍ଭ କରିଥିଲେ ।

ଏହା ବି ପଢ଼ନ୍ତୁ ଓ ଦେଖନ୍ତୁ PHOTOS | କେନ୍ଦୁଝର: ତୀବ୍ର ବେଗରେ ବାଇକ୍ ଚଳାଉଥିଲେ; ବ୍ୟାରିକେଡରେ ପିଟିହେବାରୁ ୨ ଯୁବକଙ୍କ ମୃତ୍ୟୁ ହେଲା

ଦିଲ୍ଲୀ ହାଇ କୋର୍ଟ ଓ ସୁପ୍ରିମ୍‌ କୋର୍ଟରେ ଓକିଲାତି କରିବା ବେଳେ ଗରିବ ଓ ତଳିଆ ସାମାଜିକ ବର୍ଗର ଲୋକଙ୍କୁ ସେ ବିନା ଫି’ରେ ଆଇନ ସେବା ଯୋଗାଇ ଦେଉଥିଲେ । ପ୍ରଥମରୁ ରାଷ୍ଟ୍ରୀୟ ସ୍ୱୟଂସେବକ ସଙ୍ଘର (RSS) ବିଚାରଧାରା ପ୍ରତି ଆକୃଷ୍ଠ ଥିବା ରାମନାଥ ୧୯୭୭ରେ ଆର୍‌.ଏସ୍‌.ଏସ୍‌.ରେ ଯୋଗଦେଇଥିଲେ । ସେ ୧୯୯୧ରେ ବିଜେପିରେ ଯୋଗ ଦେଇଥିଲେ ଓ ୧୯୯୮ରୁ ୨୦୦୨ ପର୍ଯ୍ୟନ୍ତ ବିଜେପିର ଦଳିତ ମୋର୍ଚ୍ଚାର ସଭାପତି ଥିଲେ ।



ବିଜେପିରେ ଯୋଗ ଦେବା ପରେ ରାମନାଥ କୋବିନ୍ଦ ଦୁଇ ଦୁଇ ଥର ଉତ୍ତର ପ୍ରଦେଶରେ ବିଧାନ ସଭା ନିର୍ବାଚନ ବିଜେପି ଟିକେଟରେ (ଘାତମପୁର ଓ ଭୋଗନିପୁରରୁ) ଲଢ଼ିଥିଲେ, ହେଲେ ଦୁଇ ଥର ଯାକ ସେ ହାରିଯାଇଥିଲେ । ଏପ୍ରିଲ୍‌ ୧୯୯୪ରେ କୋବିନ୍ଦ ରାଜ୍ୟ ସଭାରୁ ନିର୍ବାଚିତ ହୋଇଥିଲେ ଓ ଲଗାତର ୧୨ ବର୍ଷ ରାଜ୍ୟସଭା ସଦସ୍ଯ ରହିଥିଲେ । ଜୁଲାଇ ୨୦୧୭ରେ ରାଷ୍ଟ୍ରପତି ହେବା ପୂର୍ବରୁ ରାମନାଥ କୋବିନ୍ଦ ବିହାରର ରାଜ୍ୟପାଳ ଥିଲେ ।

ଏହା ବି ପଢ଼ନ୍ତୁ | ପିପିଲି ଉପର୍ବାଚନ ପାଇଁ ବାଜିଲା ବିଗୁଲ୍‌; ଏପ୍ରିଲ ୧୭ରେ ଭୋଟିଂ; କିଏ ବାଜି ମାରିବ ଏ ଥର?

ରାଷ୍ଟ୍ରପତି ରାମନାଥ କୋବିନ୍ଦ ଶନିବାର ସନ୍ଧ୍ୟାରେ ଓଡି଼ଶାରେ ପହଞ୍ଚିବେ । ରବିବାର ଦିନ ସେ ରାଉରକେଲା ଏନ୍‌.ଆଇ.ଟି.ର (NIT) ସମାବର୍ତ୍ତନ ଉତ୍ସବରେ ଯୋଗଦେବେ ଓ ତା’ ପରେ ପୁରୀରେ ଶ୍ରୀମନ୍ଦିରରେ ଶ୍ରୀଜିଉଙ୍କୁ ଦର୍ଶନ କରିବେ । ସେ କୋଣାର୍କ ସୂର୍ଯ୍ୟ ମନ୍ଦିର ବି ପରିଦର୍ଶନ କରିବେ ।

ଏହା ବି ପଢ଼ନ୍ତୁ | ଭୁବନେଶ୍ୱର ଯୁବକ ଅନ୍‌ଲାଇନ୍‌ରେ ଗାଈ ବିକୁଥିଲେ; ଲକ୍ଷେ ଟଙ୍କା ଲୁଟିନେଲେ ସାଇବର୍‌ ଅପରାଧୀ

ରାଷ୍ଟ୍ରପତି ଶନିବାର (ମାର୍ଚ୍ଚ ୨୦) ସନ୍ଧ୍ୟା ୬ଟା ୨୫ରେ ଭୁବନେଶ୍ବରରେ ପହଞ୍ଚି ରାଜଭବନରେ ରାତ୍ରିଯାପନ କରିବେ । ମାର୍ଚ୍ଚ ୨୧ ରବିବାର ସକାଳ ୯ଟା ୪୫ରେ ଝାରସୁଗୁଡ଼ାରେ ବିମାନ ବନ୍ଦରରେ ପହଞ୍ଚିବେ । ପୂର୍ବାହ୍ନ ୧୦ଟା ୫୫ରେ ରାଉରକେଲା NITରେ ପହଞ୍ଚିବେ ଓ NITର ସମାବର୍ତ୍ତନ ଉତ୍ସବରେ ଯୋଗଦେବେ ।

ଏହା ବି ପଢ଼ନ୍ତୁ | ବିଜେପି MLAଙ୍କ ଆତ୍ମହତ୍ୟା ଉଦ୍ୟମ ପର ଠାରୁ କ୍ଷମା ମାଗିବା ଦାବିରେ ରାଜ୍ୟ ବିଧାନ ସଭାରେ ଅଚଳାବସ୍ଥା ଜାରି

ରବିବାର (ମାର୍ଚ୍ଚ ୨୧) ମଧ୍ୟାହ୍ନ ୧୨ଟାରେ ଏନ୍‌.ଆଇ.ଟି.ରୁ ବାହାରି ରାଉରକେଲା ହାଉସରେ ମଧ୍ୟାହ୍ନ ଭୋଜନ କରିବେ କୋବିନ୍ଦ । ଅପରାହ୍ଣ ୩ଟା ୩୦ରେ ସେଠାରୁ ବାହାରି ୩.୪୦ରେ ରାଉରକେଲା ଷ୍ଟିଲ୍‌ ପ୍ଲାଣ୍ଟରେ ପହଞ୍ଚିବେ। ୩ଟା ୪୫ରେ ପ୍ଲାଣ୍ଟରେ ଏକ ସ୍ପେସିଆଲଟି ଡାକ୍ତରଖାନାର ଉଦ୍ଘାଟନ କରିବା ସହ ଲୋକଙ୍କୁ ସମ୍ବୋଧନ କରିବେ । ୪ଟା ୩୦ରେ ପ୍ଲାଣ୍ଟରୁ ବାହାରି ଝାରସୁଗୁଡ଼ାରୁ ବିମାନ ଯୋଗେ ରାଷ୍ଟ୍ରପତି ରାଉରକେଲାରୁ ଫେରି ରାଜଭବନରେ ରାତ୍ରିଯାପନ କରିବା ନେଇ ସୂଚନା ରହିଛି ।



ମାର୍ଚ୍ଚ ୨୨ ସୋମବାର ସକାଳ ୯ଟା ୫ରେ ଶ୍ରୀମନ୍ଦିରରେ ଶ୍ରୀଜିଉଙ୍କୁ ଦର୍ଶନ କରିବେ ମହାମହିମ ରାଷ୍ଟ୍ରପତି । ପୂର୍ବାହ୍ନ ୧୦ଟା ୪୫ରେ ସେ କୋଣାର୍କ ସୂର୍ଯ୍ୟ ମନ୍ଦିର ପରିଦର୍ଶନ କରିବେ । ୧୧ଟା ୩୦ରେ IOFLର ବ୍ୟାଖ୍ୟାନ କେନ୍ଦ୍ର ପରିଦର୍ଶନ କରିବେ । ଅପରାହ୍ଣ ୪ଟା ୫୫ରେ ଭୁବନେଶ୍ବରରୁ ଦିଲ୍ଲୀ ଅଭିମୁଖେ ପ୍ରତ୍ୟାବର୍ତ୍ତନ କରିବେ ।