ଘୁଞ୍ଚିଲା ଦଶମ ଶ୍ରେଣୀର ସମେଟିଭ୍-୧ ପରୀକ୍ଷା; ୫.୭ ଲକ୍ଷ ପରୀକ୍ଷାର୍ଥୀ ଫର୍ମ ପୂରଣ କରିସାରିଛନ୍ତି

News18 Odia Digital

କଟକ: ଚଳିତ ବର୍ଷ ଡିସେମ୍ବର ମାସ ଶେଷ ସପ୍ତାହରେ ଅନୁଷ୍ଠିତ ହେବାକୁ ଥିବା ଦଶମ ଶ୍ରେଣୀର ସମେଟିଭ୍-୧ ପରୀକ୍ଷାକୁ ଘୁଞ୍ଚାଇ ଦିଆଯାଇଛି । ଏବେ ଏହି ପରୀକ୍ଷା ଆସନ୍ତା ଜାନୁଆରୀ ମାସ ପ୍ରଥମ ସପ୍ତାହରେ ହେବ ବୋଲି ମଙ୍ଗଳବାର ଦିନ ମାଧ୍ୟମିକ ଶିକ୍ଷା ପରିଷଦ ଏକ ବିଦ୍ଧିବଦ୍ଧ ବିଜ୍ଞପ୍ତି ପ୍ରକାଶ କରି କହିଛି ।

ବର୍ଷ ଶେଷରେ ପଡୁଥିବା ସରକାରୀ ଛୁଟି ଦିବସକୁ ଦୃଷ୍ଟିରେ ରଖି ଦଶମ ଶ୍ରେଣୀର ସମେଟିଭ୍-୧ ପରୀକ୍ଷା ତାରିଖରେ ପରିବର୍ତ୍ତନ କରାଯାଇଥିବା ମାଧ୍ୟମିକ ଶିକ୍ଷା ପରିଷଦ ପକ୍ଷରୁ କୁହାଯାଇଛି । ଏହି ପରୀକ୍ଷା ଆସନ୍ତା ଜାନୁଆରୀ ମାସ ୫ ତାରିଖରୁ ଆରମ୍ଭ ହୋଇ ୮ ତାରିଖ ପର୍ଯ୍ୟନ୍ତ ଚାରି ଧରି ଧରି ଚାଲିବ । ପ୍ରତି ଦିନ ଦୁଇଟି ସିଟିଂରେ ଏହି ପରୀକ୍ଷା ଅନୁଷ୍ଠିତ ହେବ । ଏଥି ପାଇଁ ପ୍ରାୟ ୫ ଲକ୍ଷ ୭୦ ହଜାର ପରୀକ୍ଷାର୍ଥୀ ଫର୍ମ ପୂରଣ କରିସାରିଛନ୍ତି ।

ଏହା ବି ପଢ଼ନ୍ତୁ | English ଶିଖନ୍ତୁ [୧]: ଯଦି ଗ୍ୟାଙ୍ଗଷ୍ଟର୍ ହାଇଦର୍ ଧରାପଡ଼ି ନ ଥାନ୍ତା,… If gangster Hyder…

‘‘ପୂର୍ବରୁ ଆମେ ଏହି ପରୀକ୍ଷା ପାଇଁ ତାରିଖ ଧାର୍ଯ୍ୟ କରିଥିଲୁ । କିନ୍ତୁ ବଡ଼ ଦିନ ଛୁଟି ସହ ବର୍ଷ ଶେଷ ଥିବାରୁ ପରୀକ୍ଷାକୁ ଗୋଟିଏ ସପ୍ତାହ ଘୁଞ୍ଚାଉଛୁ । ପରୀକ୍ଷା ପାଇଁ ଫର୍ମ ପୁରଣ କାର୍ଯ୍ୟକୁ ଆମେ ସାତ ଦିନ ମଧ୍ୟରେ ଶେଷ କରିଛୁ । ଏବେ ସବୁ ଡାଟାବେସ୍ ତିଆରି କରି ପରୀକ୍ଷା ପାଇଁ ପୂର୍ଣ୍ଣ ପ୍ରସ୍ତୁତି ଆରମ୍ଭ କରିଛୁ,’’ କହିଛନ୍ତି ମାଧ୍ୟମିକ ଶିକ୍ଷା ପରିଷଦର ଉପସଭାପତି ନିହାର ରଞ୍ଜନ ମହାନ୍ତି ।



ଏହା ବି ପଢ଼ନ୍ତୁ | ଭ୍ୟାକ୍ସିନର ୨ଟି ଯାକ ଡୋଜ୍ ନେଇଥିବା ଅଧିକାଂଶ ଲୋକଙ୍କୁ କରୋନା ହେଉଛି, କହିଲେ ମମତା ବାନାର୍ଜୀ

ବୋର୍ଡ଼ର ଇତିହାସରେ ପ୍ରଥମ ଥର ଲାଗି ଅନୁଷ୍ଠିତ ହେବାକୁ ଥିବା ଏହି ପରୀକ୍ଷାକୁ ନେଇ ଉତ୍ସାହିତ ଅଛନ୍ତି ପରୀକ୍ଷାର୍ଥୀ ଓ ଶିକ୍ଷକ ଶିକ୍ଷୟତ୍ରୀମାନେ । ନୂଆ ନିୟମ ଅନୁସାରେ ଏଣିକି ବର୍ଷକୁ ଗୋଟିଏ ପରୀକ୍ଷା ବଦଳରେ ଦୁଇଟି ପରୀକ୍ଷା କରିବା ଓ ଦୁଇଟି ଯାକ ପରୀକ୍ଷା ଫଳକୁ ଆଧାର କରି ଛାତ୍ରଛାତ୍ରୀଙ୍କ ମେଧାର ମୂଲ୍ୟୟନ କରିବ ବୋର୍ଡ । ୫୦ ମାର୍କ ବିଶିଷ୍ଟ ସମେଟିଭ୍-୧ ପରୀକ୍ଷାଟି ସମ୍ପୂର୍ଣ୍ଣ ଭାବେ ଅବଜେକ୍ଟିଭ୍ ପ୍ରଶ୍ନକୁ ଆଧାର କରି ହେବାକୁ ଥିବାରୁ ଏଥି ପାଇଁ ଛାତ୍ରଛାତ୍ରୀମାନେ ନିଜ ନିଜର ପ୍ରସ୍ତୁତିରେ ଲାଗି ପଡ଼ିଛନ୍ତି । ସ୍କୁଲ ସ୍ତରରେ ଏହି ପରୀକ୍ଷା ପାଇଁ ଧାର୍ଯ୍ୟ ହୋଇଥିବା ପାଠ୍ୟକ୍ରମଗୁଡ଼ିକୁ ଶେଷ କରାଯିବା ପରେ ଏବେ ରିଭିଜନ୍ କରାଯାଉଛି । ପରୀକ୍ଷା ଗୋଟିଏ ସପ୍ତାହ ଘୁଞ୍ଜିବାରୁ କୌଣସି ସମସ୍ୟା ହେବ ନାହିଁ ଓ ପରୀକ୍ଷା ପ୍ରସ୍ତୁତିରେ ଏହାର କୌଣସି ପ୍ରଭାବ ପଡ଼ିବ ନାହିଁ ବୋଲି କହିଛନ୍ତି ଶିକ୍ଷକ ଓ ଛାତ୍ରଛାତ୍ରୀମାନେ ।

ଏହା ବି ପଢ଼ନ୍ତୁ ଓ ଦେଖନ୍ତୁ ଭିଡିଓ | VIDEO: ପ୍ରିୟଙ୍କା ଗାନ୍ଧି କହିଲେ, ‘‘ମୋ’ ଭାଇ କହିଛନ୍ତି ମୁଁ ମୋଟି ହୋଇଯାଉଛି, କମ୍ ଖାଇବା ଦରକାର’’

‘‘ପୂର୍ବ ବର୍ଷଗୁଡ଼ିକରେ ମାଟ୍ରିକ ପରୀକ୍ଷାରେ ଯେଉଁ ଭଳି ଭାବେ ଅବଜେକ୍ଟିଭ ପ୍ରଶ୍ନ ଆସୁଥିଲା ସେହି ଭଳି ପ୍ରଶ୍ନ ପ୍ରସ୍ତୁତ କରି ଆମେ ପିଲାମାନଙ୍କୁ ଅଭ୍ୟାସ କରାଇଛୁ । ଏହା ସହିତ ପିଲାମାନଙ୍କର ଯାହା କିଛି ସନ୍ଦେହ ରହୁଛି ସେମାନେ ଶିକ୍ଷକ ଶିକ୍ଷୟତ୍ରୀ ଓ ଟେଷ୍ଟ ପେପରକୁ ଦେଖି ତାକୁ ଦୂର କରୁଛନ୍ତି । ତେଣୁ ପରୀକ୍ଷା ନେଇ ପିଲାମାନଙ୍କର କୌଣସି ସମସ୍ୟା ନାହିଁ,’’ କହିଛନ୍ତି କଟକ କଲେଜଛକ ସରସ୍ବତୀ ଶିଶୁ ବିଦ୍ୟାମନ୍ଦିରର ପ୍ରଧାନ ଶିକ୍ଷକ ମନୋଜ ଦାସ ।

ଏହା ବି ପଢ଼ନ୍ତୁ | ATMରୁ ଛିଣ୍ଡା ନୋଟ୍ ବାହାରିଲା? ଏଣିକି ବ୍ୟାଙ୍କ୍ ତାକୁ ଫେରାଇ ନେବ; SBI କହିଲା ଉପାୟ

ପରୀକ୍ଷା ବ୍ୟବସ୍ଥାରେ ସଂସ୍କାର ସହ କୋଭିଡ୍‌ ଭଳି ପ୍ରତିକୂଳ ପରିସ୍ଥିତିକୁ ଦୃଷ୍ଟିରେ ରଖି ବୋର୍ଡ ପ୍ରଥମ ଥର ଲାଗି ନବମ ଓ ଦଶମ ଶ୍ରେଣୀରେ ଫର୍ମେଟିଭ୍ ଓ ସମେଟିଭ୍ ଫର୍ମାଟରେ ବର୍ଷକୁ ଶ୍ରେଣୀ ପିଛା ମୋଟ ଛଅଟି ପରୀକ୍ଷା କରୁଛି । ଫର୍ମେଟିଭ୍‌ ପରୀକ୍ଷାକୁ ସ୍କୁଲ୍‌ ଓ ସମେଟିଭ୍ ପରୀକ୍ଷାକୁ ବୋର୍ଡ଼ ପରିଚାଳନା କରିବ । ଫଳ ସ୍ବରୂପ କୌଣସି ପରିସ୍ଥିତିରେ ଯଦି ପରୀକ୍ଷା ବାତିଲ ହୋଇଯାଏ ତେବେ ପୂର୍ବରୁ ହୋଇଥିବା ଫର୍ମେଟିଭ୍ ଓ ସମେଟିଭ୍ ପରୀକ୍ଷା ଫଳକୁ ଆଧାର କରି ନବମ ଓ ଦଶମ ଶ୍ରେଣୀର ଛାତ୍ରଛାତ୍ରୀଙ୍କ ମେଧା ନିର୍ଦ୍ଧାରଣ କରାଯାଇ ପାରିବ ।