ମାଟ୍ରିକ୍ ରେଜଲ୍ଟ ନେଇ ଗଣଶିକ୍ଷା ମନ୍ତ୍ରୀଙ୍କ ପ୍ରତିକ୍ରିୟା; ଜୁଲାଇ ପ୍ରଥମ ସପ୍ତାହରେ ବାହାରିବ ଫଳ

News18 Odia Digital

ଭୁବନେଶ୍ୱର: ସରିଛି ଖାତା ଦେଖା, ଖୁବ ଶୀଘ୍ର ଅର୍ଥାତ ଜୁଲାଇ ପ୍ରଥମ ସପ୍ତାହରେ ବାହାରିବାକୁ ଯାଉଛି ମାଟ୍ରିକ୍ ପରୀକ୍ଷା ଫଳ। ବିଦ୍ୟାଳୟ ଓ ଗଣଶିକ୍ଷା ମନ୍ତ୍ରୀ ସମୀର ରଞ୍ଜନ ଦାସ ଆଜି ଏ ସମ୍ପର୍କରେ ଗଣମାଧ୍ୟମରେ ସୂଚନା ଦେଇଛନ୍ତି ।

ମନ୍ତ୍ରୀ କହିଛନ୍ତି ଖାତାଦେଖା କାମ ସରିଥିବା ବେଳେ ବୋର୍ଡ କାର୍ଯ୍ୟାଳୟରେ ଅନ୍ୟାନ୍ୟ ପ୍ରସ୍ତୁତି ଚାଲିଛି । ସଠିକ୍ ତଥା ନିର୍ଭୁଲ୍ ଫଳ ପ୍ରକାଶ ପାଇଁ ଚେଷ୍ଟା ଚାଲିଛି । ତେବେ କେବେ ରେଜଲ୍ଚ ବାହାରିବ ସେ ସମ୍ପର୍କରେ ତାରିଖ ଘୋଷଣା ହୋଇନଥିବା ବେଳେ ଜୁଲାଇ ପ୍ରଥମ ସପ୍ତାହରେ ଫଳ ପ୍ରକାଶ ପାଇବ ବୋଲି କୁହାଯାଉଛି । ଖୁବ ଶୀଘ୍ର ଏ ନେଇ ସୂଚନା ପ୍ରଦାନ କରାଯିବ ବୋଲି ମନ୍ତ୍ରୀ କହିଛନ୍ତି ।

ଚଳିତବର୍ଷ ଓଡ଼ିଶାରେ ମାଟ୍ରିକ୍ ପରୀକ୍ଷା ଏପ୍ରିଲ୍ ୨୯ରେ ଆରମ୍ଭ ହୋଇ ମେ ୭ ତାରିଖରେ ସରିଥିଲା । କରୋନା କଟକଣା କମିବା ପରେ ଅଫଲାଇନରେ ଛାତ୍ରଛାତ୍ରୀ ପରୀକ୍ଷା ଦେଇଥିଲେ । ସମୁଦାୟ ୩,୨୦୩ଟି ପରୀକ୍ଷା କେନ୍ଦ୍ରରେ ୫,୩୧,୯୦୯ ଛାତ୍ରଛାତ୍ରୀ ପରୀକ୍ଷା ଦେଇଥିଲେ । ପରୀକ୍ଷାକୁ ସୂଚାରୁ ରୁପେ ସମ୍ପାଦନ କରିବା ପାଇଁ ୩୫ ହଜାରରୁୂ ଉର୍ଦ୍ଧ୍ବ ଶିକ୍ଷକ ଓ ଶିକ୍ଷୟତ୍ରୀ ନିୟୋଜିତ ହୋଇଥିଲେ । ପରୀକ୍ଷା ସରିବା ପରେ  ମେ ୨୧ ତାରିଖରୁ ୫୮ଟି କେନ୍ଦ୍ରରେ ଖାତା ମୂଲ୍ୟାଙ୍କନ ହୋଇଥିଲା ।