କୋଟିଏ ଟଙ୍କାର କୋକେନ୍ ଜବତ ଘଟଣା: ସ୍ମଗଲିଂ ପାଇଁ ପୁରୀରେ ଜାଲ ବିଛାଇଥିଲା ମାଷ୍ଟରମାଇଣ୍ଡ

News18 Odia Digital

ଭୁବନେଶ୍ୱର: ରାଜଧାନୀରୁ ଜବତ କୋଟିଏ ଟଙ୍କାର କୋକେନ୍ ଘଟଣାରେ  ଗିରଫ ଦୁଇ ମାଫିଆଙ୍କ ଆନ୍ତର୍ଜାତୀୟ ଲିଙ୍କ ନେଇ ସ୍ପଷ୍ଟ କରିଛି କ୍ରାଇମବ୍ରାଞ୍ଚ।  ୫ଟି ରାଷ୍ଟ୍ରର ମାଫିଆଙ୍କ ସହ ମାଷ୍ଟରମାଇଣ୍ଡ ରବିର ସମ୍ପର୍କ ଥିବା ଜଣା ପଡ଼ିଛି । ମୋବାଇଲ ଯାଞ୍ଚ ବେଳେ ଏଭଳି ତଥ୍ୟ ପାଇଛି ତଦନ୍ତକାରୀ ଟିମ। ରିମାଣ୍ଡର ଦ୍ଵିତୀୟ ଦିନରେ ହକି ବିଶ୍ୱକପ  ପାଇଁ ଆସୁଥିବା ବିଦେଶୀ ଦର୍ଶକଙ୍କୁ ଏମାନେ ଟାର୍ଗେଟ କରିଥିବା ନେଇ ଯୋଜନା କରିଥିବା ଜଣା ପଡ଼ିଥିବା କ୍ରାଇମବ୍ରାଞ୍ଚ ପକ୍ଷରୁ ସ୍ପଷ୍ଟ କରାଯାଇଛି ।

ଭୁବନେଶ୍ୱର ଜାଭିୟର ଛକରୁ ଜବତ ୨୦୨ଗ୍ରାମ କୋକେନର ଫିଟୁଛି ଗୁମର। ୪ଦିନିଆ ରିମାଣ୍ଡରେ ଥିବା ଦୁଇ ମାଫିଆ ରବି ସିଂ ଓ ସନ୍ନି କୁମାରକୁ ଏସଟିଏଫର ମାରାଥନ ଜେରା । ୫ଟି ରାଷ୍ଟ୍ରର ମାଫିଆଙ୍କ ସହ ରହିଛି ସଂପର୍କ ଥିବା ସ୍ପଷ୍ଟ କରିଛି କ୍ରାଇମବ୍ରାଞ୍ଚ ।

"ଜେରା ବେଳେ ମାଷ୍ଟରମାଇଣ୍ଡ ରବି ସିଂର ଆନ୍ତର୍ଜାତୀୟ ଲିଙ୍କ ଥିବାନେଇ ସ୍ପଷ୍ଟ ହୋଇଛି । ସୁଇଜରଲ୍ୟାଣ୍ଡ , ଥାଇଲାଣ୍ଡ, ଚୀନ, ଫ୍ରାନ୍ସ, ଆମେରିକା ମାଫିଆଙ୍କ ସହ ଯୋଗାଯୋଗରେ ରହୁଥିଲା ରବି । ରବିର ମୋବାଇଲରେ ଅନେକ ତଥ୍ୟ ରହିଛି।  ଏସବୁକୁ ଯାଞ୍ଚ କରାଯାଉଛି । ଆଗକୁ ହକି ବିଶ୍ୱକପ ଥିବାରୁ ବିଦେଶରୁ ବହୁ ଦର୍ଶକ ଭୁବନେଶ୍ୱର ଆସିବେ । ତେଣୁ ସେମାନକୁ ଟାର୍ଗେଟ କରିଥିଲେ," କହିଛନ୍ତି କ୍ରାଇମବ୍ରାଞ୍ଚ ଏଡ଼ିଜି ସଞ୍ଜୀବ ପଣ୍ଡା  ।

ସେପଟେ କୋକେନ୍ ମାଫିଆ ରବି ପୂର୍ବରୁ ପୁରୀ ଆସିଥିବା ତଦନ୍ତ ବେଳେ ଜାଣିବାକୁ ପାଇଛି ଏସଟିଏଫ।  ପ୍ରଶ୍ନ ଉଠୁଛି, କାହିଁକି ପୁରୀ ଯାଇଥିଲା କୋକେନ୍ ମାଫିଆ ରବି ସିଂ ? ପୁରୀରେ ବିଛାଇକି କୋକେନ୍ ବ୍ୟବସାୟ ର ନେଟୱାର୍କ ? ପୁରୀରେ  ବଡ଼ ବଡ଼ ହୋଟେଲ ସହ ରବୀର ଥିଲା କି ସମ୍ପର୍କ ? କାରଣ ପୁରୀକୁ ବହୁ ବିଦେଶୀ ପର୍ଯ୍ୟଟକ ଆସି ହୋଟେଲରେ ରୁହନ୍ତି । ଆଉ ସେ ହୋଟେଲ ଗୁଡିକ ସହ ରବିର ଲିଙ୍କ ନାହିଁ ତ ? ଏଭଳି କିଛି ପ୍ରଶ୍ନକୁ ନେଇ ଏବେ ଏସଟିଏଫ ତଦନ୍ତ କରୁଛି । ସେପଟେ ଗତକାଲି NCBର ଦୁଇ ଜଣିଆ ଟିମ ଦୁଇ ଅଭିଯୁକ୍ତକୁ ଜେରା କରିଥିବା କ୍ରାଇମବ୍ରାଞ୍ଚ ପକ୍ଷରୁ କୁହାଯାଇଛି ।

ସୂଚନାଯୋଗ୍ୟ, ରବି ୨୦୧୦ମସିହାରୁ ଦିଲ୍ଲୀ ଓ ମୁମ୍ବାଇରେ କୋକେନ୍ ବ୍ୟବସାୟ ଆରମ୍ଭ କରିଛି। ବିଶ୍ୱକପ ପୂର୍ବରୁ ଓଡ଼ିଶାକୁ ଟାର୍ଗେଟ କରିଥିଲା । ଛୋଟ ଛୋଟ ଡ୍ରଗ୍ସ ପେଡଲରକୁ ଧରି ତିଆରି କରୁଥିଲା ବ୍ଲ୍ୟୁ ପ୍ରିଣ୍ଟ।ଆନ୍ତର୍ଜାତୀୟ ଲିଙ୍କ ସ୍ପଷ୍ଟ ହେବାପରେ ଆବଶ୍ୟକ ପଡ଼ିଲେ ଇଣ୍ଟରପୋଲର ସହାୟତା ନିଆଯିବ ବୋଲି ତଦନ୍ତକାରୀ ଟିମ ପକ୍ଷରୁ ସୂଚନା ମିଳିଛି।