‘ମୋତେ ଗୁପ୍ତଚରମାନେ ବିଷ ଦେଇ ମାରିଦେବାକୁ ଚେଷ୍ଟା କରିଥିଲେ,’ କହିଲେ ISROର ବରିଷ୍ଠ ଓଡ଼ିଆ ବୈଜ୍ଞାନିକ

News18 Odia Digital

ନୂଆ ଦିଲ୍ଲୀ: ଭାରତୀୟ ମହାକାଶ ଗବେଷଣା ସଙ୍ଗଠନର (ISRO) ଜଣେ ବରିଷ୍ଠ ଓଡ଼ିଆ ବୈଜ୍ଞାନିକ ଦାବି କରିଛନ୍ତି ଯେ ତାଙ୍କୁ ୨୦୧୭ରେ ମାରାତ୍ମକ ଆର୍ସେନିକ୍ ଟ୍ରାଇକ୍ସାଇଡ୍ (Arsenic Trioxide) ବିଷ ଦିଆଯାଇଥିଲା । ବୈଜ୍ଞାନିକ ତପନ୍ ମିଶ୍ର (ISRO scientist Tapan Mishra) ନିଜ ଫେସବୁକ୍ ଆକାଉଣ୍ଟରେ ଏହି ଦାବି କରିଛନ୍ତି । ସେ କହିଛନ୍ତି ଯେ କେମିତି ଓ କାହିଁକି ଏପରି ରହସ୍ୟମୟ ସ୍ଥିତିର ସେ ସାମନା କଲେ ତାହା ସେ ଜାଣି ନାହାଁନ୍ତି ।

ମିଶ୍ର ନିଜ ଫେସବୁକ୍ ପୋଷ୍ଟରେ ଅଭିଯୋଗ କରିଛନ୍ତି ଯେ ବେଙ୍ଗାଲୁରୁର ISRO ମୁଖ୍ୟାଳୟରେ ପଦୋନ୍ନତି ପାଇଁ ଏକ ସାକ୍ଷାତକାର ସମୟରେ ତାଙ୍କ ଉପରେ ମାରାତ୍ମକ ଆର୍ସେନିକ୍ ଟ୍ରାଇକ୍ସାଇଡ୍ ବିଷାକ୍ତ ପଦାର୍ଥ ପ୍ରୟୋଗ ହୋଇଥିଲା । ସେହି ସାକ୍ଷାତକାର ମେ ୨୩, ୨୦୧୭ରେ ହୋଇଥିଲା । (ISRO scientist poison claim)

ଏହା ବି ପଢ଼ନ୍ତୁ | ମାହାଙ୍ଗା ଡବଲ ମର୍ଡର: ୪ ଜଣ ଅଭିଯୁକ୍ତ ଗିରଫ ହେଲେ; ହତ୍ୟାରେ ବ୍ୟବହୃତ ଖଣ୍ଡା ଜବତ ହେଲା

ବର୍ତ୍ତମାନ ISROରେ ସିନିୟର ଆଡଭାଇଜର୍ ଭାବରେ କାର୍ଯ୍ୟ କରୁଥିବା ଓ ଏହି ମାସ ଶେଷରେ ଅବସର ନେବାକୁ ଯାଉଥିବା ମିଶ୍ର ନିଜ ପୋଷ୍ଟରେ ଲେଖିଛନ୍ତି, “(ବିଷର) ଗୋଟିଏ ସାଙ୍ଘାତିକ ଡୋଜ୍‌ ବୋଧହୁଏ ଦୋସା ଓ ଚଟନୀ ସହିତ ମଧ୍ୟାହ୍ନ ଭୋଜନ ପରର ସ୍ନାକ୍ସରେ ମିଶାଯାଇଥିଲା ।’’ ମିଶ୍ର ଏହା ପୂର୍ବରୁ ଅହମଦାବାଦ ସ୍ଥିତ ଇସ୍ରୋର ସ୍ପେସ୍ ଆପ୍ଲିକେସନ୍ ସେଣ୍ଟରର ନିର୍ଦ୍ଦେଶକ ଭାବରେ କାର୍ଯ୍ୟ କରିଥିଲେ ।



‘‘ବହୁ ଦିନର ସାଇତା ଗୁପ୍ତ ତଥ୍ୟ’’ (Long Kept Secret) ଶୀର୍ଷକ ନିଜ ଫେସବୁକ୍ ପୋଷ୍ଟରେ ମିଶ୍ର ଆହୁରି ଦାବି କରିଛନ୍ତି ଯେ ଜୁଲାଇ ୨୦୧୭ରେ ଗୃହ ବିଭାଗର ସୁରକ୍ଷା କର୍ମୀମାନେ ତାଙ୍କୁ ଭେଟିଥିଲେ ଓ ଆର୍ସେନିକ୍ ବିଷାକ୍ତ ପଦାର୍ଥ ବିଷୟରେ ତାଙ୍କୁ ସତର୍କ କରାଇଥିଲେ । ସେମାନେ ଡାକ୍ତରମାନଙ୍କୁ ସଠିକ୍ ପ୍ରତିକାର ଉପରେ ଧ୍ୟାନ ଦେବାର ପଦ୍ଧତି ବିଷୟରେ ବି ଜଣାଇଥିଲେ ।

ଏହା ବି ପଢ଼ନ୍ତୁ | ଯାଜପୁର: ଅପହରଣକାରୀଙ୍କ କବଳରୁ ଖସିଲା ସ୍କଲ୍ ଛାତ୍ର; ଶିଶୁ କନ୍ୟା ପିହୁ ଏବେ ବି ନିଖୋଜ

ମିଶ୍ର ଏହା ମଧ୍ୟ ଦାବି କରିଛନ୍ତି ଯେ ପରବର୍ତ୍ତୀ ସମୟରେ ସେ ନିଶ୍ୱାସ ପ୍ରଶ୍ୱାସ ନେବାରେ ଅସୁବିଧା, ଅସ୍ୱାଭାବିକ ଚର୍ମ ଉଦଗୀରଣ, ଚର୍ମ ଝ଼ଡ଼ିବା ଓ ଫଙ୍ଗାଲ୍ ସଂକ୍ରମଣ ଭଳି ସ୍ୱାସ୍ଥ୍ୟ ସମସ୍ୟାରେ ପୀଡ଼ିତ ହୋଇଥିଲେ । ନିଜ ପୋଷ୍ଟ ସହିତ ସେ ସୋସିଆଲ ମିଡ଼ିଆ ପ୍ଲାଟଫର୍ମରେ ତାଙ୍କର ଡାକ୍ତରୀ ରିପୋର୍ଟର ଫଟୋ ମଧ୍ୟ ଦେଇଛନ୍ତି । ସେ କହିଛନ୍ତି ଯେ ଦିଲ୍ଲୀର AIIMS ରିପୋର୍ଟରୁ ଜଣାପଡ଼ିଥିଲା ଯେ ସେ ଆର୍ସେନିକ୍ ବିଷାକ୍ତ ରୋଗରେ ଆକ୍ରାନ୍ତ ହୋଇଛନ୍ତି ।

ଏହା ବି ପଢ଼ନ୍ତୁ | ନୟାଗଡ଼ ନାବାଳିକାର ହତ୍ୟା ଅଭିଯୁକ୍ତ ନାବାଳକ ବୋଲି ପ୍ରମାଣିତ ହେଲା; ତା’ର ନାର୍କୋ ଟେଷ୍ଟ୍ ହେବନି

“ଏହାର (ବିଷାକ୍ତ ଦ୍ରବ୍ୟ ଦେବାର) ଉଦ୍ଦେଶ୍ୟ ବୋଧ ହୁଏ ଗୁପ୍ତଚର ଆକ୍ରମଣ ଥିଲା । ସିନ୍ଥେଟିକ୍ ଆପେରଚର ରାଡାର ନିର୍ମାଣ କରିବା ସମେତ ସାମରିକ ଓ ବାଣିଜ୍ୟିକ କ୍ଷେତ୍ରରେ ମହତ୍ତ୍ୱପୂର୍ଣ୍ଣ ଅବଦାନ ଥିବା ଜଣେ ବୈଜ୍ଞାନିକଙ୍କୁ ହଟାଇବା ବୋଧହୁଏ ସେମାନଙ୍କର ଲକ୍ଷ ଥିଲା,’’ ସେ ଲେଖିଛନ୍ତି ।



ମିଶ୍ର କହିଛନ୍ତି ଯେ ସେ ଚାହୁଁଛନ୍ତି ଭାରତ ସରକାର ଏହି ଘଟଣାର ଅନୁସନ୍ଧାନ କରନ୍ତୁ, କିନ୍ତୁ ମିଶ୍ରାଙ୍କ ଦାବି ସମ୍ପର୍କରେ ISRO ତରଫରୁ କୈଣସି ପ୍ରତିକ୍ରିୟା ଆସି ନ ଥିଲା ।